1 Ces Xamuyees txawm muab lub lam hwj roj aulib hliv rau saum Sha-ul taubhau thiab nwj nws thiab hais tias, (יחוח)Yahweh tsa koj ua thawj kav nws haiv neeg Ixayees. Koj yuav ua vajntxwv kav (יחוח)Yahweh haiv neeg thiab koj yuav cawm lawv dim hauv tej yeeb ncuab uas nyob ib ncig txhais tes. No yuav ua ib yam txujci uas (יחוח)Yahweh tsa koj ua thawj kav nws qub txeeg qub teg.

2 Hnub no thaum koj ncaim ntawm kuv mus lawd, koj yuav ntsib ob tug yawg ntawm Lachees lub ntxa hauv Npeeyamees tebchaws ntawm lub moos Xeexas, mas nkawv yuav hais rau koj tias, cov nees luav uas koj mus nrhiav mas twb nrhiav tau lawm. Nimno koj txiv tsis txhawj txog cov nees luav lawm, nws txhawj txog koj heev hais tias, kuv yuav nrhiav kuv tus tub li cas?  

3 Dhau qhov ntawd koj yuav mus txog tus ntoo xeeb ntawm Thanpaus. Mas muaj peb tug txivneej tab tom mus pe hawm (יחוח)Yahweh rau ntawm Npe‑ees yuav ntsib koj qhov ntawd, ib tug puag peb tug menyuam tshis thiab ib tug nqa peb lub ncuav thiab ib tug nqa ib hnab tawv cawv txiv hmab.

4 Lawv yuav hu koj thiab muab ob lub ncuav rau koj, mas koj yuav txais ntawm lawv txhais tes.  

5 Dhau ntawd koj yuav los txog ntawm Kinpe‑as Elauhis uas muaj ib pab tub rog Filixatees nyob hauv. Thaum koj mus rau hauv lub moos ntawd, koj yuav ntsib ib pab xibhwb cev (יחוח)Yahweh lus nqis ntawm lub chaw siab los, lawv tab tom siv zog cev lus, muaj tibneeg ntaus nkauj nog ncas loj nkauj nog ncas me, npuaj nruas, tshuab raj ua lawv ntej tuaj.

6 Mas (יחוח)Yahweh Tus Ntsuj Plig Dawb huv yuav los kav tag nrho koj, ces koj yuav nrog lawv cov ntawd siv zog cev (יחוח)Yahweh lus ua ke thiab koj yuav hloov dua tsis yog tus qub lawm.

7 Thaum tej txujci tseem ceeb no tshwm rau koj lawd, koj cia li ua txhua yam uas koj txhais tes ua tau, rau qhov (יחוח)Yahweh nrog nraim koj.

8 Koj cia li ua kuv ntej mus rau nram lub moos Kilakas.  Mas kuv yuav los ntsib koj thiab kuv yuav muab tsiaj xyeem ua kevcai hlawv huvsi xyeem thiab ua kevcai xyeem sib raug zoo. Koj yuav nyob qhov ntawd tos xya hnub, txog thaum kuv tuaj ntsib koj thiab kuv qhia koj paub tias koj yuav tau ua abtsi.  

9 Thaum Sha-ul tig hlo ntawm Xamuyees mus lawd, (יחוח)Yahweh pub dua ib lub siab rau nws, thiab tej txujci tseem ceeb no huvsi kuj tshwm los rau hnub ntawd.

10 Thaum nkawv los txog Kinpe‑as, ua ciav muaj ib pab xibhwb cev (יחוח)Yahweh lus ntsib Sha-ul. Mas (יחוח)Yahweh Tus Ntsuj Plig Dawb Huv los kav tag nrho nws ces nws txawm nrog lawv cov ntawd ua ke cev (יחוח)Yahweh lus.  

11 Thaum cov tibneeg uas paub nws pom nws nrog cov xibhwb ntawd cev (יחוח)Yahweh lus ua ke, cov tibneeg ntawd txawm sib tham hais tias, muaj abtsi tshwm rau Khij tus tub? Sha-ul ua ib tug xibhwb cev (יחוח)Yahweh lus lawm thiab lov?  

12 Muaj ib tug yawg uas nyob qhov ntawd teb tias, lawv cov uas cev (יחוח)Yahweh lus ntawd txiv yog leejtwg?  Yog li no thiaj muaj paj lug hais tias, Sha-ul yog ib tug cev (יחוח)Yahweh lus lawm thiab lov?  

13 Thaum Sha-ul kub siab lug cev (יחוח)Yahweh lus tag lawd nws txawm los rau ntawm lub chaw siab.

14 Sha-ul tus yawg laus nug Sha-ul thiab nws tus tub qhe tias, neb mus abtsi los? Sha-ul teb tias, wb mus nrhiav cov nees luav, thiab thaum wb pom tias wb nrhiav tsis tau nees luav lawm, wb txawm mus cuag Xamuyees.

15 Sha-ul tus yawg laus hais tias, Xamuyees hais li cas rau neb, thov piav rau kuv mloog saib.

16 Sha-ul hais rau nws tus yawg laus tias, Xamuyees hais meej rau wb tias, twb nrhiav tau cov nees luav lawm. Tiamsis tej uas Xamuyees hais txog kav lub tebchaws, nws tsis piav kiag li.

17 Xamuyees hu cov Ixayees tuaj txoos ua ke rau hauv Mixapas rau ntawm (יחוח)Yahweh xub ntiag.

18 Mas nws hais rau cov Ixayees tias, (יחוח)Yahweh uas yog Ixayees Tus Tswv hais li no tias, kuv coj cov Ixayees tawm hauv Iziv tebchaws los thiab cawm lawv dim hauv cov Iziv txhais tes thiab dim hauv txhua lub tebchaws uas quab yuam lawv.

19 Tiamsis hnub no nej tso nej Tus Tswv tseg, yog tus uas cawm nej dim hauv nej txojkev txom nyem lwj siab thiab nej tej kev ceeblaj huvsi. Los nej hais tias, peb tsis mloog koj hais, thov koj tsa ib tug vajntxwv kav peb. Vim li no nimno nej cia li los rau ntawm (יחוח)Yahweh xubntiag los zuj zus ua ib xeem thiab ib cum.  

20 Mas Xamuyees kuj coj txhua xeem los ze, mas rho ntawv tau xeem Npeeya-mees.

21 Nws thiaj coj xeem Npeeyamees los zuj zus ua ib cum ib cum mas rho tau Matis cum.  Thaum kawg rho tau Khij tus tub Sha-ul. Tiamsis lawv nrhiav tsis pom Sha-ul.  

22 Lawv thiaj rov nug (יחוח)Yahweh tias, tus yawg ntawd tuaj ntawm no los tsis tuaj? (יחוח)Yahweh teb tias, saib maj, nws khiav nkaum hauv tej pawg nra uas thauj tuaj lawm.

23 Lawv thiaj khiav mus coj nws qhov ntawd los. Thaum nws los sawv hauv nruab nrab cov pejxeem, nws lub taubhau siab dhau plaws lawv txhua tus huvsi.

24 Xamuyees thiaj hais rau cov pejxeem sawvdaws tias, nej pom tus uas (יחוח)Yahweh xaiv lawm lov? Tag nrho cov tibneeg tsis muaj ib tug zoo li nws. Ces cov pejxeem sawvdaws qw nrov nrov hais tias, thov kom vajntxwv muaj txoj siav loj siav ntev.

25 Mas Xamuyees qhia rau cov pejxeem paub txog vajntxwv tes haujlwm thiab tej uas vajntxwv muaj cai ua, thiab muab sau cia rau hauv ntawv thiab muab khaws cia rau ntawm (יחוח)Yahweh xubntiag. Ces Xamuyees txawm hais kom cov pejxeem sawvdaws nyias rov mus nyias tsev.

26 Sha-ul kuj rov qab mus rau nws vaj tsev hauv Kinpe‑as, thiab muaj cov tibneeg siab loj siab tuab uas (יחוח)Yahweh ua haujlwm rau hauv lub siab lawd kuj nrog nws mus.

27 Tiamsis muaj cov tibneeg tsis tsheej haj qee leej hais tias, tus yawg no yuav cawm peb li cas? Ces lawv txawm saib tsis taus Sha-ul thiab tsis coj tshav ntuj tuaj pub rau nws. Tiamsis Sha-ul kuj nyob twjywm tsis hais li cas.