Tsa Sha-ul Ua Vajntxwv

1 Muaj ib tug yawg xeem Npeeyamees hu ua Khij, yog ib tug nplua nuj. Nws txiv yog Anpi-ees, nws yawg yog Xelaus, nws yawg koob yog Npekhaulas, nws yawg suab yog Afiyas, yog xeem Npeeyamees.

2 Nws muaj ib tug tub hu ua Sha-ul, zoo nraug ntxiag hlob tiav txiv lawm, tsis muaj ib tug txivneej hauv cov Ixayees yuav zoo nraug dua nws. Nws lub taubhau siab dhau plaws ib tsoom sawvdaws.

3 Mas Khij uas yog Sha-ul txiv tej nees luav txawm ploj lawm. Khij thiaj hais rau Sha-ul tias, koj cia li coj ib tug tub qhe nrog koj mus nrhiav cov nees luav.

4 Nkawv txawm hla mus pem toj siab Efa‑is tebchaws thiab hla mus rau Salisas tebchaws, tiamsis nkawv nrhiav tsis pom cov nees luav. Nkawv txawm mus nrhiav hauv Sa‑alis tebchaws, tiamsis cov nees luav tsis nyob qhov ntawd thiab. Nkawv hla mus rau hauv Npeeyamees tebchaws kuj nrhiav tsis tau cov nees luav thiab.

5 Thaum nkawv los txog hauv Xub teb chaws, Sha-ul txawm hais rau tus tub qhe uas nrog nws ua ke tias, wb cia li rov qab mus, ntshai tsam txiv tsis txhawj txog cov nees luav lawm, nws yuav txhawj txog wb xwb.

6 Tiamsis tus tub qhe hais rau Sha-ul tias, tos ib pliag, muaj (יחוח)Yahweh ib tug tibneeg nyob hauv lub moos no.  Nws yog ib tug uas sawvdaws hwm heev, nws hais li cas lawm yeej muaj raws li nws hais. Cia wb mus rau hauv lub moos ntawd, tej zaum nws yuav qhia rau wb paub saib wb yuav mus txojkev twg.

7 Sha-ul txawm hais rau nws tus tub qhe tias, yog wb yuav mus, wb yuav coj abtsi mus pub rau tus yawg ntawd? Tej ncuav hauv wb tej hnab kuj tag lawm, wb tsis muaj ib yam tshav ntuj uas yuav coj mus pub rau (יחוח)Yahweh tus tibneeg ntawd lawm. Wb ob leeg puas muaj abtsi?

8 Tus tub qhe teb Sha-ul tias, kuv muaj ib lub nyiaj nyhav txog ib feem plaub hauv ib sekhees, kuv yuav muab rau (יחוח)Yahweh tus tibneeg ntawd xwv nws thiaj qhia kev rau wb mus.

9 (Yav thaum ub yog cov Ixayees leej twg mus ua nug rau (יחוח)Yahweh, nws hais tias, cia peb mus cuag tus uas hais tej lus uas pom tom hauv ntej, rau qhov tus uas niaj hnub nimno hu ua tus uas cev (יחוח)Yahweh lus mas, yav thaum ub hu ua tus uas hais pom tom hauv ntej.)

10 Ces Sha-ul txawm hais rau nws tus tub qhe tias, koj hais yog qhov zoo, wb cia li mus. Nkawv thiaj mus rau hauv lub moos uas (יחוח)Yahweh tus tibneeg nyob.

11 Thaum nkawv nce toj mus rau hauv lub moos ntawd, nkawv ntsib ib co ntxhais hluas tuaj ntaus dej, ces txawm nug lawv tias, tus uas hais pom tom hauv ntej nyob ntawm no los tsis nyob?

12 Lawv teb tias, nyob thiab. Saib maj, nws nyuam qhuav ua neb ntej mus dhau lawm. Cia li maj mus. Puag tab nws nyuam qhuav tuaj rau hauv lub moos, vim yog hnub no cov pejxeem yuav ua kevcai xyeem tsiaj rau saum lub chaw siab.

13 Thaum neb mus rau hauv lub moos, neb yuav ntsib nws ua ntej uas nws tsis tau nce mus noj mov ntawm lub chaw siab. Cov pejxeem yuav tsis noj mov mus txog thaum nws tuaj txog tso, vim yog nws yuav tau foom koob hmoov rau tej uas muab xyeem tso, mas cov qhua uas hu tuaj li noj mov. Cia li mus, neb yuav ntsib nws tamsim.

14 Nkawv txawm mus rau hauv lub moos. Thaum nkawv nkag mus mas nkawv pom Xamuyees tab tom tawm tuaj yuav mus rau lub chaw siab ntawd.

15 Hnub uas Sha-ul tsis tau tuaj txog, (יחוח)Yahweh twb qhia rau Xamuyees tias,

16 tagkis kwvlam lub sijhawm no, kuv yuav xa ib tug txivneej uas nyob hauv Npeeyamees tebchaws tuaj. Koj yuav tsa nws ua thawj kav kuv haiv neeg Ixayees. Nws yuav cawm kuv haiv neeg dim hauv cov Filixatees txhais tes, rau qhov kuv twb pom kuv haiv neeg txojkev txom nyem lawm, lawv lub suab quaj thov twb tuaj txog kuv lawm.

17 Thaum Xamuyees pom dheev Sha-ul, (יחוח)Yahweh hais rau Xamuyees tias no yog tus txivneej uas twb hais rau koj lawd. Nws yog tus uas yuav kav kuv haiv neeg.

18 Ces Sha-ul txawm tuaj cuag Xamuyees ntawm rooj loog thiab hais tias, thov qhia rau kuv saib tus uas hais pom tom hauv ntej lub tsev nyob qhov twg.

19 Xamuyees teb Sha-ul tias, kuv yog tus uas hais pom tom hauv ntej ntag.  Cia li ua kuv ntej mus rau ntawm lub chaw siab, rau qhov hnub no neb yuav nrog kuv noj mov ua ke, mas tagkis sawv ntxov kuv li kheev koj mus thiab kuv yuav qhia txhua yam uas koj nyuaj siab rau koj.

20 Cov nees luav uas ploj tau peb hnub lawd, koj tsis txhob txhawj, vim yog lawv twb nrhiav tau lawm. Cov Ixayees sawvdaws ntshaw leej twg? Tsis yog koj thiab koj txiv tsev neeg sawvdaws lov?

21 Sha-ul teb tias, kuv tsis yog xeem Npeeyamees lov? Yog lub xeem uas me dua cov Ixayees txhua xeem huvsi, thiab kuv tsev neeg kuj me dua txhua tsev neeg hauv xeem Npeeyamees. Ua cas koj yuav hais li kod rau kuv?

22 Ces Xamuyees txawm coj Sha-ul thiab nws tus tub qhe mus rau hauv chav tsev loj thiab kom nyob rau ntawm hau rooj uas npaj rau cov qhua nyob, muaj kwv-lam peb caug leej.

23 Xamuyees hais rau tus uas ua zaub mov tias, cia li nqa tej txhais nqaij uas kuv twb muab rau koj kom koj tshwj rau ib qho lawd los.

24 Tus uas ua zaub mov thiaj muab tej nqaij ncej qab thiab tej noob nqaig los rau rau ntawm Sha-ul xubntiag. Mas Xamuyees hais tias, saib maj, tej uas tshwj cia lawd muab rau rau ntawm koj xubntiag.  Koj cia li noj, vim yog muab khaws cia rau koj txog lub sijhawm lawm, kuv twb hu tej qhua tuaj tag lawm. Hnub ntawd Sha-ul thiaj li nrog Xamuyees noj mov ua ke.

25 Thaum lawv nqis ntawm lub chaw siab los rau hauv lub moos, Xamuyees nrog Sha-ul hais lus saum txheej tsev las tshav.

26 Nkawv sawv ntxov thaum pom kev lawd, mas Xamuyees hu Sha-ul uas nyob saum txheej tsev las tshav tias, cia li sawv los es kuv yuav xa koj mus.  Sha-ul thiaj sawv los nrog Xamuyees tawm rau tom txoj kev.

27 Thaum lawv tab tom taug kev los txog ntawm ntug moos, Xamuyees txawm hais rau Sha-ul tias, cia li hais kom koj tus tub qhe ua ntej mus. Thaum tus tub qhe mus dhau lawd, koj cia li nres ntawm no ib pliag, xwv kuv thiaj qhia tau (יחוח)Yahweh tej lus rau koj paub.