Cov Ixayees Thov Muaj Vajntxwv

1 Thaum Xamuyees laus lawd, nws tsa nws tej tub ua thawj kav cov Ixayees.

2 Nws tus tub hlob hu ua Yahees, tus tub yau hu ua Anpiyas.  Nkawv nyob hauv lub moos Npes-npas ua thawj kav.

3 Tiamsis nws ob tug tub tsis ua lub neej raws li nws, nkawv lub siab qaug laim rau tej nyiaj uas tau los ntawm kev dag ntxias xwb. Nkawv yuav tej nyiaj xiab thiab tu plaub tsis ncaj.

4 Mas Ixayees cov kev txwj laug sawvdaws ua ke tuaj cuag Xamuyees hauv lub moos Lamas,

5 thiab hais rau nws tias, sim xav saib, koj laus lawm, koj ob tug tub tsis taug koj txojkev. Nimno thov koj tsa ib tug vajntxwv kav peb ib yam li ib tsoom tebchaws sawvdaws.

6 Thaum lawv hais tias, thov tsa vajntxwv kav peb, kuj ua rau Xamuyees tsis txaus siab. Xamuyees thiaj thov ua nug rau (יחוח)Yahweh,

7 mas (יחוח)Yahweh hais rau Xamuyees tias, cia li mloog txhua yam uas cov pejxeem thov koj ntawd, rau qhov tsis yog lawv tso koj tseg, yog lawv tso kuv tseg tsis yuav kuv ua vajntxwv kav lawv.

8 Tej uas lawv ua huvsi rau kuv txij hnub uas kuv coj lawv tawm hauv Iziv tebchaws los txog niaj hnub nimno, yog lawv tso kuv tseg mus ua koom tu luag tej dab, mas lawv kuj ua ib yam li ntawd rau koj.

9 Vim li no, cia li mloog lawv lub suab thov.  Koj tsuas muaj uas qhuab ntuas lawv xwb thiab qhia lawv paub tias vajntxwv yuav muaj kov txwv kav lawv li cas.

10 Xamuyees thiaj muab (יחוח)Yahweh tej lus huvsi hais rau cov pejxeem uas thov kom nws tsa vajntxwv rau lawv.

11 Nws hais tias, no yog vajntxwv txojkev uas yuav kav nej. Nws yuav sau nej cov tub thiab tsa ua tub rog tsav nws tsheb ua rog thiab ua nws cov tub rog caij nees thiab khiav ua nws lub tsheb ua rog ntej.

12 Nws yuav tsa lawv ua tus kav ib txhiab leej, kav tsib caug leej, thiab yuav kom ib txhia laij nws tej teb, thiab hlais nws tej qoob, thiab ua nws tej cuab yeej ua rog thiab tej cuab yeej siv hauv nws tej tsheb ua rog.

13 Nws yuav coj nej tej ntxhais mus tov tshuaj tsw qab thiab ua zaub mov thiab ci ncuav.

14 Nws yuav muab nej tej teb, nej tej vaj txiv hmab, thiab tej vaj txiv aulib, uas zoo kawg pub rau nws cov tub teg tub taws.

15 Nws yuav sau nej tej qoob loo tej txiv hmab ib feem kaum pub rau nws cov thawj rog thiab nws cov tub teg tub taws.

16 Nws yuav sau nej tej tub qhe, nkauj qhe, tej tsiaj txhu, tej nees luav uas zoo coj mus ua nws tej haujlwm.

17 Nws yuav sau nej tej yaj, tej tshis, ib tug hauv kaum thiab nej yuav ua nws cov qhev.

18 Mas hnub ntawd nej yuav quaj thov kev pab, vim yog tim nej tus vajntxwv uas nej xaiv los kav nej, tiamsis hnub ntawd (יחוח)Yahweh yuav tsis teb nej.

19 Tiamsis cov pejxeem tsis quav ntsej mloog Xamuyees tej lus, lawv hais tias, peb tsis mloog koj hais, peb yeej xav muaj vaj ntxwv kav peb xwb,

20 kom peb thiaj zoo li ib tsoom tebchaws sawvdaws thiab peb tus vajntxwv yuav kav peb thiab coj peb hauv ntej mus ntaus rog.

21 Thaum Xamuyees hnov cov pejxeem tej lus huvsi lawm, nws kuj coj mus hais rau (יחוח)Yahweh.

22 Ces (יחוח)Yahweh hais rau Xamuyees tias, cia li mloog tej lus uas lawv hais es tsa ib tug vajntxwv kav lawv. Ces Xamuyees txawm hais rau cov Ixayees kom txhua tus cia li rov qab mus rau nyias vaj nyias tsev.