1 Cov tibneeg hauv Khiliyas Ye‑alis thiaj tuaj coj (יחוח)Yahweh lub phij xab mus rau hauv Anpinadas lub tsev nyob saum lub pov roob. Lawv kuj muab Ele‑axas uas yog nws tus tub tsa ua tus uas dawb huv los saib xyuas (יחוח)Yahweh lub phij xab.

​

Xamuyees Ua Cov Ixayees Tus Thawj 

2 Suav txij hnub uas (יחוח)Yahweh lub phij xab nyob hauv Khiliyas Ye‑alis kuj yog sij hawm ntev txog nees nkaum xyoo. Mas cov Ixayees sawvdaws quaj nrhiav (יחוח)Yahweh.

3 Mas Xamuyees hais rau cov Ixayees sawv daws tias, yog nej rov los cuag (יחוח)Yahweh kawg siab kawg ntsws, mas cia li muab lwm haiv neeg tej dab thiab tej dab mlom Athalaus pov tseg ntawm nej mus, muab lub siab xib nkaus rau (יחוח)Yahweh thiab ua koom tu nws tib leeg xwb, nws thiaj yuav cawm nej dim hauv cov Filixatees txhais tes.

4 Cov Ixayees thiaj muab tej dab Npa‑as thiab tej dab Athalaus pov tseg thiab ua koom tu (יחוח)Yahweh tib leeg xwb.  

5 Mas Xamuyees hais tias, cia cov Ixayees sawvdaws tuaj txoos ua ke rau ntawm lub moos Mixapas es kuv yuav thov (יחוח)Yahweh pab nej.

6 Lawv thiaj tuaj txoos ua ke rau ntawm Mixapas, thiab nqa dej los hliv xyeem rau ntawm (יחוח)Yahweh xubntiag thiab hnub ntawd lawv yoo mov thiab hais tias, peb tau ua txhaum muaj txim rau (יחוח)Yahweh lawm Mas Xamuyees nyob hauv lub moos Mixapas ua tus thawj kav cov Ixayees.

7 Thaum cov Filixatees hnov tias cov Ixayees tuaj txoos ua ke hauv lub moos Mixapas, Filixatees cov thawj txawm tuaj ua rog rau cov Ixayees. Thaum cov Ixayees tau hnov li no, lawv kuj ntshai cov Filixatees heev.

8 Cov Ixayees thiaj hais rau Xamuyees tias, tsis txhob tseg qhov uas taij thov (יחוח)Yahweh uas yog peb Tus Tswv rau peb xwv nws thiaj cawm peb dim hauv cov Filixatees txhais tes.

9 Xamuyees txawm muab ib tug menyuam yaj uas tseem noj mis los xyeem ua kevcai hlawv kheej xyeem rau (יחוח)Yahweh. Thiab Xamuyees taij thov (יחוח)Yahweh pab cov Ixayees, mas (יחוח)Yahweh kuj teb nws tej lus thov.

10 Thaum Xamuyees tabtom ua kevcai hlawv xyeem ntawd, cov Filixatees txawm tuaj ze ze yuav ua rog rau cov Ixayees. Tiamsis hnub ntawd (יחוח)Yahweh ua xob quaj nrov heev kawg tawm tsam cov Filixatees ua rau lawv ntshai yoob tag, lawv thiaj swb cov Ixayees lawm.

11 Cov Ixayees thiaj tawm hauv Mixa-pas caum tua cov Filixatees mus dhau plaws lub moos Npekhas.

12 Mas Xamuyees muab ib lub pob zeb teeb rau ntawm lub moos Mixapas thiab lub moos Sees ntu nruab nrab, thiab tis npe hu ua Enpee‑exaws, rau qhov nws hais tias, (יחוח)Yahweh tau pab peb los txog nimno.  

13 Yog li no, cov Filixatees thiaj swb tsis rov tuaj rau hauv Ixayees tebchaws dua li lawm. (יחוח)Yahweh txhais tes tawm tsam cov Filixatees mus tag Xamuyees sim neej.  

14 Tej moos uas cov Filixatees txeeb ntawm cov Ixayees lawm, kuj muab thim rau cov Ixayees txij ntua lub moos Ekhoos txog lub moos Nkas. Cov Ixayees thiaj txeeb tau lawv tej tebchaws ntawm cov Filixatees txhais tes rov los.  Thaum ntawd cov Ixayees thiab cov Amaulais kuj muaj kev thaj yeeb.

15 Xamuyees ua thawj kav cov Ixayees mus tag nws sim neej.

16 Nws niaj xyoo mus ncig lub tebchaws thoob plaws, mus txog lub moos Npe‑ees, Kilakas thiab Mixapas. Thiab nws tu cov Ixayees tej plaub hauv tej moos ntawd.

17 Ces nws li rov qab mus rau hauv lub moos Lamas rau qhov nws lub tsev nyob hauv lub moos ntawd. Nws kuj tu cov Ixayees tej plaub qhov ntawd thiab nws ua ib lub thaj xyeem rau (יחוח)Yahweh qhov ntawd.