Cov Filixatees Thim (יחוח)Yahweh Lub Phij Xab

1 (יחוח)Yahweh lub phij xab nyob hauv cov Filixatees tebchaws tau xya lub hli.

2 Cov Filixatees txawm hu cov pov thawj thiab cov txiv neeb txiv yaig tuaj hais tias, peb yuav ua li cas rau (יחוח)Yahweh lub phij xab? Thov nrog peb xav saib peb yuav muab abtsi xa nrog (יחוח)Yahweh lub phij xab mus rau lub qub chaw.

3 Lawv teb tias, yog nej yuav xa cov Ixayees Tus Tswv lub phij xab mus, tsis txhob xa dawb dawb do do xwb, txawm li cas los yuav tau xa tej uas ntxuav kev txhaum thiab. Mas nej tej mob thiaj li zoo thiab nej thiaj li paub tias yog tim li cas (יחוח)Yahweh tsis tshem nws txhais tes saum nej mus.  

4 Cov pejxeem hais tias, yuav muab abtsi xa mus rau nws ua kevcai ntxuav kev txhaum? Lawv teb tias, muab kub ua tsib lub faj kub thiab ua tsib tug tsuag kub, npaum li Filixa-tees cov thawj, rau qhov tib yam mob ntawd kis rau nej thiab nej cov thawj.

5 Nej yuav tau ua tej lub yam ntxwv zoo li cov faj uas nej mob thiab zoo li cov tsuag uas txov nej lub tebchaws piam tag, thiab ua rau cov Ixayees Tus Tswv tau koob meej. Tej zaum nws yuav tshem nws txhais tes kom sib saum nej thiab nej tej dab thiab nej lub tebchaws.

6 Ua cas nej yuav ua nej lub siab tawv yam nkaus li cov Iziv thiab Falaus tau ua lawv lub siab tawv? Thaum (יחוח)Yahweh ua tej xwm txheej nyhav los tawb lawv lawd, lawv li tso nws haiv neeg mus mas cov Ixayees thiaj tau tawm mus los tsis yog?

7 Nimno cia li npaj ib lub tsheb nyuj tshiab tshiab los thiab muab ib nkawg maum nyuj coj menyuam uas tsis tau cab dua tsheb nruab rau lub tsheb ntawd, thiab muab ob tug menyuam cais ntawm leej niam coj mus tsev.

8 Cia li muab (יחוח)Yahweh lub phij xab tso rau saum lub tsheb nyuj, thiab muab tej yam ntxwv uas nej muab kub ua ntxuav kev txhaum ntawd ntim rau dua ib lub phij xab muab txawb rau ntawm (יחוח)Yahweh lub phij xab ib sab, es tso nkawm nyuj cab lub tsheb mus.

9 Thiab ua tib zoo saib, yog taug kev mus rau nws lub tebchaws, mus rau lub moos Npesemes, yeej yog (יחוח)Yahweh ua tej xwm txheej phem loj no los raug peb ntag. Yog nyuj tsis mus li no, peb thiaj paub tias tsis yog (יחוח)Yahweh txhais tes nplawm peb, tsuas yog tej yam uas cia li tshwm los ncaj raug peb xwb.

10 Cov pejxeem kuj ua raws li ntawd, coj ib nkawg maum nyuj los nruab lub tsheb thiab muab ob tug menyuam kaw cia hauv tsev.

11 Lawv muab (יחוח)Yahweh lub phij xab thiab lub phij xab uas rau cov tsuag kub thiab tej lub yam ntxwv zoo li cov faj uas lawv mob ntawd tso rau saum lub tsheb nyuj.  

12 Ob tug maum nyuj kuj taug kev ncaj nraim mus rau lub moos Npesemes, taug txoj niag kev nqov qas qaws tsis mus rau sab xis lossis sab laug li. Filixatees cov thawj kuj raws qab mus txog ntua lub moos Npesemes ciam teb.  

13 Cov tibneeg hauv lub moos Npesemes tab tom hlais mog hauv lub vuas hav. Thaum lawv tsa muag saib pom lub phij xab, lawv kuj zoo siab heev kawg.

14 Lub tsheb nyuj txawm los rau hauv Yahshua uas yog tibneeg Npese-mes daim teb thiab nres qhov ntawd. Muaj ib lub pob zeb loj loj nyob qhov ntawd, lawv txawm muab lub tsheb nyuj phua ua taws rauv muab ob tug nyuj hlawv xyeem rau (יחוח)Yahweh.

15 Cov Levis kuj txo (יחוח)Yahweh lub phij xab thiab lub phij xab nyob ib sab uas muaj tej yam ntxwv kub ntawd los txawb rau saum lub pob zeb loj ntawd. Mas cov tibneeg hauv Npesemes thiaj ua kevcai hlawv xyeem thiab tua tsiaj xyeem rau (יחוח)Yahweh hnub ntawd.

16 Thaum Filixatees tsib tug thawj pom li ntawd lawd, hnub ntawd lawv txawm rov qab mus rau lub moos Ekhoos.

17 No yog cov faj kub uas cov Filixatees xa mus xyeem rau (יחוח)Yahweh ntxuav kev txhaum, ib lub rau lub moos Asadaus, ib lub rau lub moos Kaxas, ib lub rau lub moos Akheloos, ib lub rau lub moos Nkas thiab ib lub rau lub moos Ekhoos. 18 Cov tsuag kub kuj npaum li cov Filixatees tej moos uas tsib tug thawj ntawd kav, yog tej moos muaj ntsa loog thiab tej zej zog uas nyob ib ncig.  Lub pob zeb loj uas lawv muab (יחוח)Yahweh lub phij xab txawb rau saum kuj ua timkhawv los txog niaj hnub nimno rau hauv Yahshua uas yog tibneeg Npesemes daim teb.

19 (יחוח)Yahweh tua cov tibneeg hauv Npesemes qee leej, vim lawv xauj rau hauv (יחוח)Yahweh lub phij xab. Nws tua xya caum leej mas cov pejxeem quaj quaj ntsuag vim (יחוח)Yahweh tua cov tibneeg coob heev.

20 Cov tibneeg hauv Npesemes txawm hais tias, leejtwg sawv taus rau ntawm (יחוח)Yahweh uas yog Tus Tswv dawb huv lub xub ntiag? Peb yuav xa nws mus rau qhov twg kom nyob nrug deb ntawm peb?

21 Lawv thiaj xa xov mus rau cov tibneeg hauv lub moos Khiliyas Ye‑alis hais tias, cov Filixatees twb thim (יחוח)Yahweh lub phij xab los lawm. Thov nej tuaj coj lub phij xab mus nrog nej nyob.