1 XAMUYEES 5

Lub Phij Xab Nyob Hauv Filixatees Tebchaws

1 Thaum cov Filixatees txeeb tau (יחוח)Yahweh lub phij xab mus, lawv kwv ntawm lub moos Enpenexaws mus txog lub moos Asadaus.

2 Cov Filixatees coj (יחוח)Yahweh lub phij xab mus rau hauv lub tsev teev dab Dakoos, muab txawb rau ntawm tus dab mlom Dakoos ib sab.

3 Hnub tom qab thaum sawv ntxov, cov tibneeg hauv Asadaus pom, ua ciav tus dab mlom Dakoos ntog rau hauv pem teb khwb ntawm (יחוח)Yahweh lub phij xab sab xubntiag. Lawv txawm muab tus dab mlom Dakoos tsa txawb rau lub qub chaw.

4 Hnub tom qab thaum sawv ntxov, lawv txawm pom ua ciav tus dab mlom Dakoos ntog rau hauv pem teb khwb ntawm (יחוח)Yahweh lub phij xab sab xubntiag, lub taubhau thiab ob txhais tes kuj lov dhia rau ntawm taw rooj, tshuav tus dab mlom Dakoos lub cev   xwb.

5 Vim li no, dab Dakoos cov pov thawj thiab txhua tus uas nkag mus rau hauv lub tsev teev dab Dakoos thiaj tsis tsuj lub tsev teev dab Dakoos lub taw rooj hauv lub moos Asadaus los txog niaj hnub nimno.

6 ()Yahweh txhais tes ua nyhav heev rau cov tibneeg hauv Asadaus.  Nws ua rau lawv ntshai kawg thiab nplawm lawv ua rau lawv mob faj, tsis hais cov uas nyob hauv lub moos Asadaus thiab cov uas nyob ib ncig.

7 Thaum cov tibneeg hauv Asadaus pom muaj li ntawd lawv txawm hais tias, tsis txhob cia cov Ixayees Tus Tswv lub phij xab nyob hauv peb, rau qhov nws txhais tes ua nyhav heev rau peb thiab peb tus dab Dakoos.

8 Lawv thiaj tso tibneeg mus hu Filixatees cov thawj sawv daws tuaj ua ke thiab hais tias, peb yuav ua li cas rau cov Ixayees Tus Tswv lub phij xab? Cov thawj teb tias, cia li coj cov Ixayees Tus Tswv lub phij xab mus rau lub moos Nkas. Lawv thiaj coj Ixayees Tus Tswv lub phij xab mus rau qhov ntawd.

9 Tiamsis thaum lawv coj mus rau lub moos ntawd lawd, (יחוח)Yahweh txhais tes kuj tawm tsam lub moos ntawd ua rau lub moos ntawd ras zom zaws.  Nws nplawm lub moos ntawd tag nrho tej laus tej hluas huvsi, ua rau lawv txhua tus mob faj.  

10 Lawv thiaj li xa (יחוח)Yahweh lub phij xab mus rau lub moos Ekhoos. Thaum (יחוח)Yahweh lub phij xab tuaj txog lub moos Ekhoos, cov tibneeg hauv Ekhoos qw hais tias, lawv coj cov Ixayees Tus Tswv lub phij xab tuaj rau peb xwv thiaj tua tau peb thiab peb cov tibneeg pov tseg.

11 Vim li no, lawv thiaj tso tibneeg mus hu tag nrho Filixatees cov thawj huvsi tuaj ua ke thiab hais tias, cia li xa cov Ixayees Tus Tswv lub phij xab tawm mus. Cia lub phij xab ntawd rov qab mus rau nws lub qub chaw xwv lub phij xab ntawd thiaj tsis tua peb thiab peb cov tibneeg. Thoob plaws lub moos ras ceeb zom zaws vim ntshai tuag. Thiab (יחוח)Yahweh txhais tes kuj ua nyhav heev rau lawv qhov ntawd.

12 Cov uas tsis tuag kuj mob faj, thiab lub moos ntawd tej suab quaj kuj nrov nto ntuj.