1 Thiab Xamuyees tej lus nrov mus thoob plaws cov Ixayees sawvdaws.

Cov Filixatees Txeeb Tau (יחוח)Yahweh Lub Phij Xab

Thaum ntawd cov Ixayees txhij rog mus ua rog rau cov Filixatees. Lawv tsuam yeej rau ntawm Enpenexaws, cov Filixatees tsuam yeej rau ntawm Afes.

2 Cov Filixatees npaj tub rog mus ntaus cov Ixayees, mas thaum ua rog heev zuj zus lawm, cov Ixayees txawm swb cov Filixatees, lawv raug tua tuag hauv tshav rog kwv lam plaub txhiab leej.  

3 Thaum cov tub rog thim rov los rau hauv lub yeej, Ixayees cov kev txwj laug hais tias, ua cas hnub no (יחוח)Yahweh ua rau peb swb cov Filixatees? Cia peb mus coj (יחוח)Yahweh lub phij xab sib cog lus hauv lub moos Silaus tuaj kom (יחוח)Yahweh thiaj los rau hauv peb nruab nrab thiab cawm peb dim hauv peb cov yeeb ncuab txhais tes.

4 Lawv thiaj txib tibneeg mus coj (יחוח)Yahweh lub phij xab sib cog lus hauv lub moos Silaus tuaj, yog (יחוח)Yahweh uas muaj hwj chim loj kawg nkaus uas nyob lub zwm txwv saum cov Khelunpees. Haunis thiab Finehas uas yog Elis ob tug tub kuj nrog nraim (יחוח)Yahweh lub phij xab sib cog lus tuaj.  

5 Thaum (יחוח)Yahweh lub phij xab sib cog lus tuaj txog hauv lub yeej, cov Ixayees sawv daws qw nrov nrov ua av ntseeg nkaws.

6 Thaum cov Filixatees hnov lub suab qw nrov li ntawd, lawv txawm hais tias, lub suab qw nrov nrov hauv cov Hinplus lub yeej yog abtsi? Thaum lawv paub tias (יחוח)Yahweh lub phij xab tuaj rau hauv lub yeej lawm,

7 cov Filixatees kuj ntshai rau qhov lawv hais tias, ib tug tim tswv tuaj rau hauv lub yeej lawm. Thiab lawv hais tias, peb raug kev txom nyem lauj! Rau qhov yav nram ntej tsis tau muaj li no.

8 Peb raug txom nyem lauj! Leej twg yuav pab peb dim hauv tej tim tswv loj ntawd lub hwj chim? Tej tim tswv ntawd yog cov uas tso txhua yam vij sub vij sw raug cov Iziv hauv tebchaws moj sab qhua ntag.

9 Cov Filixatees es, cia li ua siab tuab, cia li ua khov kho li tus txiv neej yawg, xwv nej thiaj tsis ua cov Hinplus li qhev ib yam li lawv ua nej li qhev. Cia li ua khov kho li tus txiv neej yawg mus ntaus rog.

10 Cov Filixatees thiaj li txeem tuaj ntaus, ces cov Ixayees txawm swb lawm, nyias taus nyias khiav mus tsev. Thaum ntawd cov uas raug tua tuag coob kawg li, Ixayees cov tub rog tuag peb caug txhiab leej.

11 (יחוח)Yahweh lub phij xab kuj raug luag txeeb tau coj mus lawm thiab Haunis thiab Finehas uas yog Elis ob tug tub kuj raug tua tuag.

12 Tib hnub ntawd, muaj ib tug yawg xeem Npeeyamees khiav hauv tshav rog los txog lub moos Silaus, thiab nws muab ris tsho dua ntuag tag, thiab tsuab av rau saum nws taubhau.

13 Thaum nws los txog ntawd, Elis zaum saum nws lub rooj ntawm ntug kev tos saib kev ntsoov, rau qhov nws lub siab txhawj ntsuav txog (יחוח)Yahweh lub phij xab. Thaum tus yawg ntawd los rau hauv lub moos thiab tshaj tej xov ntawd rau sawvdaws mloog tag nrho, cov tibneeg hauv lub moos quaj qw nrov.

14 Thaum Elis hnov lub suab quaj qw ntawd, nws txawm nug tias, lub suab nrov ua nqaj ua nqug ntawd yog abtsi? Ces tus yawg ntawd txawm maj nroos los qhia rau Elis.

15 Elis hnub nyoog muaj cuaj caum yim xyoo, nws qhov muag tsis pom kev lawm.

16 Tus yawg ntawd hais rau Elis tias, kuv yog tus uas khiav hauv tshav rog los. Kuv khiav hauv tshav rog los hnub no ntag.  Elis hais rau nws tias, tub es, zoo li cas xwb?

17 Tus uas xa xov ntawd teb tias, cov Ixayees khiav ntawm cov Filixatees tag lawm. Cov Ixayees raug tua tuag coob kawg li. Haunis thiab Finehas uas yog koj ob tug tub kuj raug tua tuag thiab (יחוח)Yahweh lub phij xab kuj raug luag txeeb tau lawm.

18 Thaum nws hnov txog (יחוח)Yahweh lub phij xab, Elis txawm ntxeev kiag saum lub rooj uas nws zaum ntawm ib sab rooj loog. Nws caj pas lov ntho ces nws tuag lawm, rau qhov nws laus heev thiab nws lub cev nyhav heev. Nws ua thawj kav cov Ixayees tau plaub caug xyoo lawm.  

19 Nws tus nyab Finehas cev nyhav twb yuav txog caij yug menyuam. Thaum nws hnov xov tias luag txeeb tau (יחוח)Yahweh lub phij xab thiab paub tias nws txiv yawg thiab nws tus txiv tuag lawm, nws txawm mob plab yug menyuam, nws mob heev heev li.

20 Thaum nws twb yuav tuag ntawd, cov pojniam uas tu nws, hais rau nws tias, koj tsis txhob ntshai, koj twb yug tau ib tug me tub lawm. Tiamsis nws tsis teb, nws tsis quav ntsej li.

21 Nws tis tusme tub ntawd lub npe hu ua Ikhanpaus, thiab hais tias, (יחוח)Yahweh lub hwj chim ci ntsa iab ncaim ntawm cov Ixayees mus lawm, vim yog (יחוח)Yahweh lub phij xab raug luag txeeb tau lawm thiab vim nws txiv yawg thiab nws tus txiv tuag lawm.

22 Nws hais tias, (יחוח)Yahweh lub hwj chim ci ntsa iab ncaim hauv cov Ixayees mus lawm, vim yog (יחוח)Yahweh lub phij xab raug luag txeeb tau lawm.