Xamuyees Ntuas Cov Ixayees

1Xamuyees hais rau ib tsoom Ixayees sawvdaws tias, kuv twb mloog txhua yam uas nej hais rau kuv thiab kuv twb tsa ib tug vajntxwv kav nej lawm.

2 No nawj, muaj ib tug vajntxwv coj nej lawm. Kuv twb laus plaubhau dawb tag lawm, kuv tej tub kuj nrog nej nyob. Thiab kuv coj nej txij thaum hluas los txog niaj hnub nimno. 
3 Kuv nyob ntawm no, thov nej ua timkhawv kom kuv rau ntawm (יחוח)Yahweh xubntiag thiab rau ntawm tus uas (יחוח)Yahweh tsa ua vajntxwv lub xubntiag.  Kuv tau txeeb leejtwg li nyuj leejtwg li nees luav? Kuv tau ntxias leejtwg li lossis tau quab yuam leej twg? Kuv tau yuav nyiaj xiab ntawm leejtwg txhais tes ua rau kuv lub qhov muag dig? Nej cia li hais lus mas kuv yuav thim rov rau nej.

4 Lawv hais tias, koj tsis tau ntxias peb lossis quab yuam peb lossis txeeb ib yam abtsi ntawm leejtwg txhais tes li.

5 Ces Xamuyees txawm hais rau lawv tias, (יחוח)Yahweh thiab tus uas (יחוח)Yahweh tsa los kuj ua timkhawv rau nej hnub no tias, nej tsis pom ib yam abtsi nyob hauv kuv txhais tes.  Lawv hais tias, (יחוח)Yahweh ua tau tim khawv.

6 Thiab Xamuyees hais rau cov pej xeem tias, (יחוח)Yahweh yog tus uas tsa Mauxes thiab Aloos thiab coj nej tej poj koob yawm txwv tawm hauv Iziv tebchaws los.

7 Yog li no, nej cia li sawv twj ywm es kuv yuav piav txog tej haujlwm huvsi uas (יחוח)Yahweh ua cawm nej thiab nej tej poj koob yawm txwv mas nej yuav paub nej tej kev txhaum rau ntawm (יחוח)Yahweh xubntiag. 
8 Thaum Yakhauj mus rau hauv Iziv teb chaws mas nej tej poj koob yawm txwv quaj thov (יחוח)Yahweh, (יחוח)Yahweh kuj txib Mauxes thiab Aloos coj lawv tawm hauv Iziv tebchaws thiab coj lawv los nyob ntawm no. 
9 Tiamsis lawv tsis nco qab (יחוח)Yahweh uas yog lawv Tus Tswv lawm, (יחוח)Yahweh thiaj muab lawv cob rau hauv Xixelas uas yog vajntxwv Yanpis hauv lub moos Haxaus tus thawj rog txhais tes thiab cob rau hauv cov Filixatees txhais tes thiab muab cob rau hauv Mau‑as tus vajntxwv txhais tes.  Mas cov tib neeg ntawd thiaj ua rog rau nej tej poj koob yawm txwv.

10 Lawv quaj thov (יחוח)Yahweh tias, peb tau ua txhaum muaj txim lawm, rau qhov peb tau tso (יחוח)Yahweh tseg mus ua koom tu tej dab Npa‑as thiab tej dab Athalaus. Nimno thov koj cawm peb dim hauv peb cov yeeb ncuab txhais tes mas peb yuav ua koom tu koj.
11 Ces (יחוח)Yahweh thiaj txib Yelunpa‑as thiab Npalas thiab Yethas thiab Xamuyees los, thiab (יחוח)Yahweh cawm nej dim hauv nej cov yeeb ncuab rau txhua fab, mas nej thiaj tau nyob tso siab plhuav. 
12 Thaum nej pom Nahas uas yog cov Asmoos tus vajntxwv tuaj ua rog rau nej, mas txawm yog nej Tus Tswv twb yog nej tus vajntxwv lawm los nej tseem hais rau kuv tias, peb tsis mloog koj hais, peb yuav muaj ib tug vajntxwv kav peb.

13 Nimno cia li saib tus vajntxwv uas nej tau xaiv, yog tus uas nej thov. Saib maj, (יחוח)Yahweh twb tsa vaj ntxwv kav nej lawm.

14 Yog nej yuav hwm thiab paub ntshai (יחוח)Yahweh thiab ua koom tu nws thiab mloog nws tej lus, thiab tsis txhob ntxeev siab rau (יחוח)Yahweh tej lus cob qhia, thiab yog nej thiab tus vajntxwv uas kav nej nrog nraim nej Tus Tswv, mas kuj 
yog qhov zoo.

15 Tiamsis yog nej tsis mloog (יחוח)Yahweh tej lus thiab ntxeev siab rau nws tej lus cob qhia, ces nws txhais tes yuav tawm tsam nej ib yam li tawm tsam nej tej poj koob yawm txwv. 
16 Yog li no, nimno nej cia li sawv twjywm tos saib tej xwm txheej loj uas (יחוח)Yahweh yuav ua tab meeg nej.

17 Nimno yog lub caij hlais mog los tsis yog?  Kuv yuav thov (יחוח)Yahweh ua xob quaj thiab tso nag los, mas nej yuav paub thiab pom tseeb tias nej txojkev limhiam uas nej ua rau ntawm (יחוח)Yahweh xubntiag loj kawg, yog qhov uas nej thov kom muaj ib tug vajntxwv kav nej.  
18 Xamuyees txawm thov (יחוח)Yahweh mas (יחוח)Yahweh txawm ua xob quaj thiab los nag rau hnub ntawd. Cov pejxeem kuj ntshai (יחוח)Yahweh thiab Xamuyees heev kawg. 
19 Mas cov pejxeem sawvdaws hais rau Xamuyees tias, thov koj thov (יחוח)Yahweh uas yog koj Tus Tswv rau peb uas yog koj cov tub qhe xwv peb thiaj tsis tuag, rau qhov peb muab txojkev phem no tsav ntxiv rau peb lub txim huvsi, vim peb tau thov kom muaj vaj ntxwv kav peb. 
20 Mas Xamuyees hais rau cov pejxeem tias, tsis txhob ntshai.  Nej tau ua tej kev phem no huvsi lawm tiag, tiamsis nej tsis txhob tso qhov uas nrog nraim (יחוח)Yahweh tseg, nej cia li ua koom tu (יחוח)Yahweh kawg siab kawg ntsws.

21 Tsis txhob mus raws kua tej uas tsis muaj qabhau. Tej ntawd pab tsis tau nej thiab cawm tsis tau nej, vim tej ntawd tsis muaj qabhau kiag li.

22 Rau qhov (יחוח)Yahweh saib rau nws lub npe uas loj kawg nws thiaj tsis muab nws haiv neeg tso pov tseg, vim (יחוח)Yahweh txaus siab coj nej los ua ib haiv neeg uas yog nws teej nws tug.

23 Tsis tag li ntawd xwb, kuv tus kheej los thov kom kuv tsis txhob ua txhaum rau (יחוח)Yahweh, rau qhov uas tseg tsis thov nws pab nej. Thiab kuv yuav qhia nej taug txojkev uas zoo thiab txojkev uas raug cai.

24 Nej yuav tau hwm thiab paub ntshai (יחוח)Yahweh xwb thiab muab lub siab xib ua koom tu nws kawg siab kawg ntsws. Cia li ua tib zoo xav txog tej hauj lwm loj uas nws ua pab nej lawm. 
25 Yog nej tseem mus ua lim hiam, nej yuav raug muab kuav pov tseg puam tsuaj tag, tsis hais nej thiab nej tus vaj ntxwv huvsi.