Ua Rog Rau Cov Filixatees

1 Thaum Sha-ul pib ua vajntxwv nws hnub nyoog muaj pebcaug xyoo, thiab nws kav cov Ixayees tau plaubcaug ob xyoos.

2 Sha-ul xaiv cov txivneej Ixayees tau peb txhiab leej, faib ob txhiab leej nrog nws nyob ntawm Mimaj thiab nyob pem toj siab ntawm Npe‑ees, ib txhiab leej nrog Yahnathas nyob ntawm lub moos Kinpe‑as hauv Npeeyamees tebchaws. Dua li ntawd, nws kom cov pejxeem txhua tus nyias rov mus rau nyias vaj nyias tsev.  
3 Yaunathas ntaus yeej cov Filixatees pab tub rog uas zov hauv lub moos Kenpas swb lawm, mas cov Filixatees kuj hnov txog tej ntawd. Ces Sha-ul txawm kom tshuab raj kub yaj thoob lub tebchaws thiab hais tias, cia cov Hinplus sawvdaws tau hnov.

4 Cov Ixayees sawvdaws tau hnov xov tias Sha-ul twb ntaus yeej Filixatees ib pab tub rog lawm thiab hnov tias cov Filixatees ntxub cov Ixayees heev kawg li. Cov pejxeem thiaj raug hu tawm mus cuag Sha-ul rau ntawm Kilakas.   
5 Cov Filixatees kuj txhij tub rog tuaj ua rog rau cov Ixayees. Lawv muaj peb vam lub tsheb ua rog thiab rau txhiab tus tub rog caij nees thiab cov tub rog coob npaum li tej xuab zeb ntawm ntug hiavtxwv. Lawv tuaj ua yeej nyob rau ntawm Mimaj uas nyob Npe‑avees sab hnub tuaj.

6 Thaum cov Ixayees pom tias lawv poob rau qhov chaw ti lawm, vim cov Filixatees ntaus lawv heev, lawv thiaj khiav nkaum rau hauv tej qhov tsua, hauv tej kem zeb, hauv tej qhov ntxa thiab hauv tej qhov dej,

7 thiab muaj qee leej hla tus dej Yaladees khiav mus rau hauv Nkas thiab Kile‑as tebchaws.  Sha-ul tseem nyob hauv lub moos Kilakas thiab cov pejxeem sawv daws kuj nrog nws nyob ua tshee nyho.

8 Sha-ul nyob tos xya hnub raws li lub sijhawm uas Xamu-yees teem tseg, tiamsis Xamuyees tsis tuaj rau ntawm Kilakas, mas cov pejxeem tso Sha-ul tseg khiav ua sab ua sua tag lawm.   
9 Yog li ntawd, Sha-ul thiaj hais tias, cia li coj tej tsiaj uas muab ua kevcai hlawv xyeem thiab tej uas ua kevcai xyeem sib raug zoo tuaj rau kuv. Nws thiaj muab ua kevcai hlawv xyeem.

10 Thaum nws muab ua kevcai hlawv xyeem tag lawd, ua ciav Xamuyees txawm tuaj txog.  Sha-ul tawm mus tos thiab hu Xamuyees.

11 Xamuyees nug tias, koj twb ua abtsi lawm? Sha-ul teb tias, thaum kuv pom cov pejxeem tso kuv tseg khiav ri sua mus lawm thiab koj kuj tsis tuaj raws li lub sijhawm uas teem cia, thiab cov Filixatees los twb txhij tub rog tuaj rau ntawm Mimaj lawm,

12 mas kuv thiaj hais tias, nimno cov Filixatees yuav tuaj ntaus kuv ntawm Kilakas, thiab kuv twb tsis tau thov kom (יחוח)Yahweh hlub peb, kuv thiaj rov yuam kuv mus muab tej tsiaj ua kevcai hlawv xyeem.  
13 Ces Xamuyees hais rau Sha-ul tias, koj ua tej uas ruam kawg li. Koj twb tsis ua raws tej lus uas koj Tus Tswv hais kom koj ua. Yog koj tau ua raws li mas (יחוח)Yahweh yeej yuav tsa koj thiab koj caj ces ua vajntxwv kav cov Ixayees mus ib txhis li.

14 Tiamsis nimno koj thiab koj caj ces yuav tsis ua vajntxwv kav mus li. (יחוח)Yahweh twb nrhiav dua ib tug txivneej uas haum (יחוח)Yahweh lub siab lawm. Thiab (יחוח)Yahweh twb tsa tus ntawd ua thawj kav nws haiv neeg rau qhov koj tsis ua raws li (יחוח)Yahweh hais rau koj.

15 Ces Xamuyees txawm sawv tsees tawm ntawm Kilakas mus txog lub moos Kinpe‑as hauv Npeeyamees tebchaws. Mas Sha-ul suav cov tibneeg uas nrog nws ua ke muaj kwvlam rau pua leej.

16 Sha-ul thiab nws tus tub Yahnathas thiab cov tibneeg uas nrog nkawv kuj nyob hauv lub moos Kenpas hauv Npeeyamees tebchaws. Tiamsis cov Filixatees tseem ua yeej nyob ntawm Mimaj. 
17 Muaj peb pab tub rog tawm hauv cov Filixatees lub yeej mus lws tebchaws, ib pab mus rau ntawm lub moos Aufas uas yog Sha-ul tebchaws,

18 ib pab mus rau lub moos Npe Hauloos, thiab ib pab mus rau ciam teb uas saib rau nram hav Xenpau‑is uas ncaj teb chaws moj sab qhua. 
19 Thaum ntawd lawv nrhiav thoob plaws hauv Ixayees tebchaws tsis muaj ib tug Kws hlau kiag li, rau qhov cov Filixatees hais tias, ntshai tsam cov Hinplus yuav ntaus tau ntaj tau hmuv los siv.

20 Cov Ixayees sawvdaws mus ntiav cov Filixatees hov khais, hov hlau, hov taus, hov liag.

21 Cov nqi hov khais, thiab hov hlau, ib rab yog ib phees, cov nqi hov taus thiab hov hmuv ib rab yog ib feem peb hauv ib sekhees. 
22 Vim li no, thaum txog hnub ua rog thiaj nrhiav tsis tau ib rab ntaj, ib rab hmuv hauv Sha-ul thiab Yahnathas cov tub rog txhais tes kiag li. Tsuas yog Sha-ul thiab nws tus tub Yahnathas thiaj muaj xwb. 
23 Mas cov Filixatees ib pab tub rog mus zov lub dawm uas hla mus rau lub moos Mimaj.