1 XAMUYEES 14

Yaunathas Tua Cov Filixatees

1 Muaj ib hnub Yahnathas uas yog Sha-ul tus tub hais rau tus hluas uas nqa nws tej cuab yeej ua rog tias, wb cia li hla mus rau tim cov Filixatees pab tub rog uas zov kev.  Tiamsis nws tsis qhia rau nws txiv paub.

2 Sha-ul tsuam chaw nyob ntawm ntug moos Kinpe‑as hauv tsob qab ntoo txiv ntsiav kws hauv lub moos Miloos.  Cov tibneeg uas nrog Sha-ul nyob kwvlam muaj rau pua leej,

3 thiab Ahiyas uas coj lub efauj kuj nrog Sha-ul nyob. Ahiyas txiv yog Ahithus uas yog Ikhanpaus tus tijlaug, nws yawg yog Finehas, nws yawg koob yog Elis uas ua (יחוח)Yahweh tus pov thawj hauv lub moos Silaus. Cov tub rog kuj tsis paub tias Yahnathas mus lawm.

4 Lub dawm uas Yahnathas yuav hla mus rau cov Filixatees pab tub rog uas zov kev muaj ib ntxwj zeb zuag zuag nyob sab no hu ua Npauxes thiab ib ntxwj zeb nyob sab tid hu ua Xenes.

5 Ntxwj zeb sab ped tshwm ncaj ntawm Mimaj thiab ntxwj zeb sab nrad tshwm ncaj ntawm lub moos Kenpas.

6 Yahnathas hais rau tus hluas uas nqa nws tej cuab yeej tias, wb cia li hla mus rau ntawm pab tub rog uas yog cov tibneeg tsis ua kevcai txiav. Tej zaum (יחוח)Yahweh yuav pab peb rau qhov tsis muaj ib yam abtsi yuav tav tau qhov uas (יחוח)Yahweh cawm peb, tsis hais nws siv tibneeg coob los tsawg.   

7 Tus uas nqa nws tej cuab yeej teb nws tias, koj cia li ua txhua yam uas koj lub siab xav ua.  Kuv nrog koj ua ke thiab koj lub siab xav li cas kuv lub siab kuj ua ib yam li ntawd.

8 Ces Yahnathas txawm hais tias, wb yuav hla mus rau ntawm cov tibneeg ntawd thiab tshwm rau lawv pom.

9 Yog lawv hais rau wb tias, cia li nyob tos txog thaum peb tuaj txog neb, ces wb yuav nyob twjywm ntawm lub chaw thiab wb yuav tsis nce mus rau ntawm lawv. 10 Yog lawv hais tias, cia li nce tuaj rau ntawm peb, ces wb yuav nce mus. Qhov uas lawv teb li ntawd yuav qhia rau wb paub tias (יחוח)Yahweh twb muab lawv cob rau hauv wb txhais tes lawm.

11 Nkawv thiaj tshwm rau cov Filixatees pab tub rog pom, mas cov Filixatees hais tias, saib nawj, cov Hinplus tawm hauv qhov khiav nkaum tshwm tuaj lawm. 12 Ces cov tub rog uas zov kev ntawd txawm hu Yahnathas thiab tus uas nqa nws tej cuab yeej hais tias, cia li nce tuaj rau ntawm peb mas peb yuav qhia ib yam abtsi rau neb.  Yahnathas txawm hais rau tus uas nqa nws tej cuab yeej tias, cia li raws kuv qab los, rau qhov (יחוח)Yahweh twb muab lawv cob rau hauv cov Ixayees txhais tes lawm.

13 Ces Yahnathas txawm nkag nce mus thiab tus uas nqa nws tej cuab yeej kuj raws nws qab mus. Cov tibneeg no thiaj li tuag rau ntawm Yahnathas txhais tes thiab tus uas nqa nws tej cuab yeej kuj tua lawv raws qab mus.

14 Thawj zaug uas Yahnathas thiab tus uas nqa nws tej cuab yeej tua lawv ntawd mas tuag kwvlam nees nkaum leej. Thaj chaw uas lawv sib tua ntawd dav li ib nkawg nyuj laij teb ib tav su.

15 Cov Filixatees sawvdaws ras zom zaws tsis hais hauv lub yeej thiab ib ncig lub yeej. Pab tub rog uas zov kev thiab cov tub rog uas mus lws tebchaws kuj ntshai tshee hnyo. Av kuj ntseeg nkaws, ua rau muaj kev ras zom zaws loj heev.

16 Sha-ul cov tub rog uas faj xwm hauv lub moos Kinpe‑as hauv Npeeyamees tebchaws tsa muag saib ua ciav pom cov Filixatees coob coob ntawd khiav khiav ntxhov hnyo rau tom ub tom no.

17 Ces Sha-ul txawm hais rau cov tibneeg uas nrog nws nyob tias, cia li suav saib leejtwg tawm ntawm peb mus lawm. Thaum lawv suav saib ua ciav Yahnathas thiab tus uas nqa nws tej cuab yeej tsis nyob ntawd.

18 Sha-ul txawm hais rau Ahiyas tias, cia li coj (יחוח)Yahweh lub phij xab los ntawm no, rau qhov lub sijhawm ntawd (יחוח)Yahweh lub phij xab nyob hauv cov Ixayees lawm.

19 Thaum Sha-ul nrog tus pov thawj hais lus, txawm muaj suab nrov heev zuj zus hauv cov Filixatees lub yeej. Sha-ul thiaj hais rau tus pov thawj tias, cia li nkaum tes, tsis txhob ua nug lawm.

20 Ces Sha-ul thiab nws cov tub rog txawm sau nthwv mus ntaus rog, ua ciav cov Filixatees rov sib tua ua ntxhov hnyo sib chab sib chaws.

21 Cov Hinplus uas twb mus nrog cov Filixatees nyob ua ntej los lawm thiab tuaj rau hauv lub yeej ntawd, kuj tig los koom nrog cov Ixayees uas yog Sha-ul thiab Yahnathas tog.

22 Thaum cov Ixayees uas khiav nkaum rau pem toj siab Efa‑is tebchaws tau hnov tias cov Filixatees tab tom khiav, lawv kuj caum qab mus ua rog rau thiab.  

23 Hnub ntawd (יחוח)Yahweh cawm cov Ixayees li no.  Lawv thiaj ntaus rog mus dhau plaws lub moos Npe‑avees.

24 Hnub ntawd cov Ixayees raug kev ceeblaj heev, vim yog Sha-ul twv tseg rau cov tub rog tias, leejtwg noj mov ua ntej hnub tsis tau poob qho thiab ua ntej uas kuv tsis tau ua pauj rau kuv cov yeeb ncuab tag, cia tus ntawd raug foom tsis zoo. Vim li no, cov tub rog tsis noj mov kiag li.   

25 Cov tibneeg sawvdaws mus rau hauv hav zoov mas muaj zib ntab nyob hauv pem teb.  

26 Thaum cov tibneeg mus rau hauv hav zoov lawm mas pom zib ntab tab tom nrog, tiamsis tsis muaj leejtwg cev tes muab los noj, vim yog ntshai tej lus uas twv tseg lawd.

27 Tiamsis Yahnathas tsis hnov leej txiv tej lus uas nws twv rau cov pejxeem.  Nws thiaj muab tus hau pas nrig uas nws coj tshum xub ntab cev tes muab cov zib los noj, ces nws qhov muag thiaj kaj tuaj.

28 Muaj ib tug yawg hais tias, koj txiv twv tseg rau cov tub rog tias, hnub no leejtwg noj mov yuav raug foom tsis zoo. Cov tibneeg thiaj tsaug leeg heev.

29 Yahnathas thiaj hais tias, kuv txiv ua rau lub tebchaws raug kev ceeblaj.  Sim saib kuv lub qhov muag twb kaj lawm, vim kuv tau noj mentsis zib ntab.

30 Yog hnub no cov tibneeg tau noj tej uas txeeb tau ntawm yeeb ncuab los mas yuav zoo dua ntau npaug, rau qhov nimno qhov uas tua cov Filixatees kuj tsis muaj ntau lawm.

31 Hnub ntawd lawv tua cov Filixatees ntawm Mimaj mus txog lub moos Aiyaloos. Mas cov tub rog tsaug leeg heev.

32 Lawv thiaj khiav mus muab tej uas txeeb tau los, yog yaj thiab nyuj thiab menyuam nyuj coj los tua kiag rau hauv av, noj kiag nqaij thiab ntshav ua ke.   

33 Mas luag thiaj mus hais rau Sha-ul tias, cov tibneeg ua txhaum rau ()Yahweh vim yog noj kiag nqaij thiab ntshav. Mas Sha-ul hais tias, nej ua tibneeg ntxeev siab lawm. Cia li dov ib lub pob zeb loj los rau ntawm kuv no.

34 Thiab Sha-ul hais tias, cia li mus hais thoob plaws rau cov tibneeg tias, nej txhua tus yuav tau coj nej tej nyuj tej yaj los tua rau saum lub pob zeb no noj. Tsis txhob ua txhaum rau (יחוח)Yahweh, vim yog noj nqaij thiab ntshav. Mas hmo ntawd txhua tus coj lawv tej nyuj los tua rau qhov ntawd.

35 Sha-ul ua ib lub thaj xyeem rau (יחוח)Yahweh.  Yog thawj lub thaj uas nws ua rau (יחוח)Yahweh.

36 Ces Sha-ul hais tias, peb cia li mus caum cov Filixatees hmo ntuj thiab txeeb lawv tej qhov txhia chaw ib hmos kaj ntug. Peb tsis txhob tseg ib tug dim siav li. Cov tibneeg teb tias, cia li ua raws li koj pom zoo. Tiamsis tus pov thawj hais tias, cia peb los ua nug rau (יחוח)Yahweh ntawm no tso.

37 Ces Sha-ul thiaj nug (יחוח)Yahweh tias, kuv yuav mus caum cov Filixatees los tsis txhob mus? Koj yuav muab lawv cob rau hauv cov Ixayees txhais tes los tsis muab? Tiamsis hnub ntawd (יחוח)Yahweh tsis teb Sha-ul.

38 Sha-ul thiaj hais tias, nej sawvdaws uas yog cov thawj, cia li los ntawm no, nej cia li tshuaj saib yog vim li cas hnub no muaj lub txim no tshwm los.

39 Muaj (יחוח)Yahweh tus uas cawm cov Ixayees muaj txojsia nyob pom, txawm yog txojkev txhaum nyob ntawm kuv tus tub Yahnathas los nws yeej yuav tuag xwb. Tiamsis cov tibneeg sawvdaws ntawd tsis muaj ib tug teb nws li.

40 Ces Sha-ul txawm hais rau cov Ixayees sawvdaws tias, cia nej tuaj ib tog, mas kuv thiab kuv tus tub Yahnathas tuaj ib tog.  Mas cov pejxeem hais rau Sha-ul tias, cia li ua raws li koj pom zoo.

41 Ua li ntawd Sha-ul thiaj thov hais tias, Au (יחוח)Yahweh uas yog cov Ixayees Tus Tswv, ua cas hnub no koj tsis teb kuv uas yog koj tus tub qhe? Yog lub txim nyob ntawm kuv thiab kuv tus tub Yahnathas, thov teb rau Ulis, yog lub txim nyob ntawm cov Ixayees, thov teb rau Thumis. Ces Sha-ul thiab Yahnathas thiaj yog tog uas ua txhaum mas cov pejxeem dim.  

42 Ces Sha-ul thiaj hais tias, rov qab saib Ulis thiab Thumis rau kuv thiab kuv tus tub Yah-nathas. Mas kev txhaum poob rau Yahnathas.  

43 Ces Sha-ul thiaj hais rau Yahnathas tias, koj tau ua abtsi lawm? Cia li hais rau kuv saib.  Yahnathas thiaj hais tias, kuv tau sim noj mentsis zib ntab ntawm tus hau pas nrig hauv kuv txhais tes. Kuv nyob ntawm no, kuv yeem tuag.

44 Sha-ul thiaj hais tias, yog kuv tsis tua koj, thov (יחוח)Yahweh ua nyhav dua ntawd rau kuv.  Yahnathas koj yuav tuag tiag tiag li.  

45 Cov pejxeem hais rau Sha-ul tias, tsim nyog Yahnathas uas coj kev kov yeej loj kawg los rau cov Ixayees tuag lov? Tsis txhob ua li ntawd. Muaj (יחוח)Yahweh uas muaj txojsia nyob pom, tsis tseev nws ib txoj plaubhau poob rau hauv av li, vim hnub no nws tau koom nrog (יחוח)Yahweh ua rog.  

Cov pej xeem thiaj txhiv tau Yahnathas nws thiaj tsis tuag.

46 Ces Sha-ul txawm tsis raws caum cov Filixatees lawm. Cov Filixatees rov mus rau lawv qub teb qub chaw.

47 Thaum Sha-ul tau ua vajntxwv kav cov Ixayees, nws ua rog rau nws cov yeeb ncuab rau txhua fab, yog ua rog rau Mau‑as thiab Asmoos thiab Edoos thiab cov vajntxwv hauv Xaunpas tebchaws thiab cov Filixatees. Nws mus rau qhovtwg kuj ntaus yeej qhov ntawd.

48 Nws muaj siab loj siab tuab ua rog thiab ntaus yeej cov Amalej thiab cawm cov Ixayees dim hauv cov uas tuaj lws lawv txhais tes.

49 Sha-ul cov tub yog Yahnathas, Isavis thiab Makhisuvas. Nws ob tug ntxhais tus hlob hu ua Melas, tus yau hu ua Mikhas.

50 Sha-ul tus pojniam hu ua Ahinau-as, nws yog Ahima‑as tus ntxhais. Sha-ul tus thawj rog yog Anaws uas yog Naws tus tub, Naws yog Sha-ul yawg laus.

51 Khij yog Sha-ul txiv, Naws yog Anaws txiv, Naws thiab Khij yog Anpi‑ees li tub.

52 Sha-ul sim neej mas muaj kev ua rog rau cov Filixatees loj heev. Thaum Sha-ul pom leej twg muaj zog thiab siab loj siab tuab, nws coj

los nrog nws nyob ua nws li tubtxib.