Sha-ul Tsis Mloog Lus Raug Muab Hle

1 Xamuyees hais rau Sha-ul tias, (יחוח)Yahweh txib kuv tuaj tsa koj ua vajntxwv kav nws haiv neeg Ixayees. Vim li no, nimno koj tig ntsej mloog (יחוח)Yahweh tej lus.

2 (יחוח)Yahweh uas muaj hwjchim loj kawg nkaus hais li no tias, kuv yuav rau txim rau cov Amalej rau qhov uas thaum cov Ixayees tawm hauv Iziv tebchaws los, lawv tav cov Ixayees kev.

3 Koj cia li mus ntaus cov Amalej thiab muab txhua yam uas lawv muaj ua kom puam tsuaj tag huvsi. Tsis txhob tseg ib tug dim li, cia tua tag nrho tej pojniam txivneej, tej menyuam yaus, tej menyuam noj mis thiab tej nyuj, tej yaj, tej ntxhuav thiab tej nees luav huvsi.

4 Sha-ul thiaj hu cov pejxeem tuaj ua ke rau ntawm Thela‑is suav tag nrho cov tub rog muaj 200,000 leej thiab cov tibneeg Yahdah 10,000 leej.

5 Sha-ul lawv tuaj rau ntawm Amalej lub nroog thiab nyob hauv lub hav zov tos.

6 Sha-ul hais rau cov Khenais tias, cia li tawm mus, cia li ncaim ntawm cov Amalej mus tsam ces kuv ua rau nej nrog lawv puam tsuaj tag. Rau qhov thaum cov Ixayees tawm hauv Iziv tebchaws los, nej hlub lawv. Yog li ntawd, cov Khenais thiaj ncaim cov Amalej mus lawm.

7 Sha-ul kuj ntaus cov Amalej swb txij ntua lub moos Havilas mus txog lub moos Saws uas nyob ntawm Iziv tebchaws sab hnub tuaj.

8 Nws ntes tau cov Amalej tus vajntxwv Akas ciaj sia kais thiab xuas ntaj muab cov pejxeem tua puam tsuaj tag nrho huvsi.

9 Tiamsis Sha-ul thiab nws cov tibneeg tseg Akas txojsia thiab tej tsiaj txhu uas zoo kawg, muaj yaj muaj nyuj, muaj tej tsiaj uas rog rog thiab muaj tej menyuam yaj thiab txhua yam uas zoo kawg. Lawv tsis kam muab ua kom puam tsuaj. Lawv tsuas yog muab txhua yam uas lawv tsis nyiam thiab tsis muaj qabhau ua kom puam tsuaj xwb.

10 Mas (יחוח)Yahweh hais lus tuaj rau Xamuyees tias,

11 Kuv tu siab qhov uas kuv tsa Sha-ul ua vajntxwv, rau qhov nws tau tig ntawm kuv mus lawm, tsis ua raws li kuv tej lus cob qhia. Mas Xamuyees kuj chim thiab quaj thov (יחוח)Yahweh ib hmos kaj ntug.

12 Thaum tagkis Xamuyees sawv ntxov tsees yuav mus nrhiav Sha-ul. Muaj tibneeg hais rau Xamuyees tias, Sha-ul tuaj rau ntawm lub moos Khamees thiab ua ib tug yam ntxwv cia ua lub chaw nco txog nws ces txawm hla dhau plaws mus rau lub moos Kilakas lawm.   

13 Ces Xamuyees txawm tuaj cuag Sha-ul, ces Sha-ul hais rau Xamuyees tias, thov (יחוח)Yahweh foom koob hmoov rau koj. Kuv twb ua raws li (יחוח)Yahweh tej lus cob qhia lawm.

14 Tiamsis Xamuyees hais tias, tej suab yaj quaj thiab tej suab nyuj nqov uas hnov ntawd yog abtsi?

15 Sha-ul teb tias, yog lawv coj hauv cov Amalej los, rau qhov kuv cov tibneeg tseg tej yaj tej nyuj uas zoo kawg xyeem rau koj Tus Tswv, dua li ntawd peb twb muab ua puam tsuaj tag nrho huvsi lawm.

16 Ces Xamuyees txawm hais rau Sha-ul tias, tsum lauj! Kuv yuav hais rau koj paub tias, nag hmo (יחוח)Yahweh hais li cas rau kuv.  Sha-ul teb tias, cia li hais maj.  

17 Xamuyees thiaj hais tias, txawm yog koj saib koj zoo li ib tug me kawg, los koj twb yog tus thawj hauv txhua xeem Ixayees los tsis yog? (יחוח)Yahweh tsa koj ua vajntxwv kav cov Ixayees.

18 Thiab (יחוח)Yahweh txib koj mus ua nws tej haujlwm thiab hais tias, cia li mus ua kom cov Amalej uas yog tibneeg muaj txim puam tsuaj tag nrho huvsi, thiab ua rog rau lawv mus txog thaum lawv ploj tag huvsi.

19 Ua cas koj tsis mloog (יחוח)Yahweh tej lus? Ua cas koj mus txeeb tej qhov txhia chaw thiab ua tej uas (יחוח)Yahweh pom tias phem kawg li?

20 Sha-ul hais rau Xamuyees tias, kuv twb mloog (יחוח)Yahweh tej lus lawm. Kuv twb mus ua tej haujlwm uas (יחוח)Yahweh txib kuv mus, kuv ntes tau cov Amalej tus vajntxwv Akas coj los thiab kuv ua rau cov Amalej puam tsuaj tag huvsi.

21 Tiamsis kuv cov tibneeg muab tej qhov txhia chaw, tej yaj tej nyuj uas zoo kawg uas muab cais ua kom

puam tsuaj ntawd coj los xyeem rau koj Tus Tswv hauv lub moos Kilakas.

22 Ces Xamuyees hais tias, (יחוח)Yahweh txaus siab rau tej uas hlawv xyeem thiab tej uas muab xyeem npaum li qhov uas mloog (יחוח)Yahweh lus lov? Sim xav saib maj, qhov uas mloog lus zoo dua tej uas muab xyeem thiab qhov uas tig ntsej mloog zoo dua li tej roj txiv yaj.  

23 Vim qhov uas ntxeev siab kuj ib yam li lub txim uas saib sij saib yaig, thiab qhov uas tawv ncauj kuj zoo li lub txim phem uas pe dab. Vim koj tso (יחוח)Yahweh tej lus tseg (יחוח)Yahweh kuj tso koj tseg tsis yuav koj ua vajntxwv lawm.

24 Mas Sha-ul hais rau Xamu-yees tias, kuv ua txhaum lawm. Kuv ntxeev siab rau (יחוח)Yahweh tej lus cob qhia thiab koj tej lus, vim yog kuv ntshai cov pejxeem thiab mloog lawv tej lus.   

25 Yog li no thov koj zam kuv lub txim thiab nrog kuv rov qab mus, kom kuv thiaj tau pe hawm (יחוח)Yahweh.

26 Mas Xamuyees hais rau Sha-ul tias, kuv yuav tsis nrog koj rov qab mus, vim yog koj tso (יחוח)Yahweh tej lus tseg, mas (יחוח)Yahweh twb tso koj tseg tsis yuav koj ua vajntxwv kav cov Ixayees lawm.

27 Thaum Xamuyees tig hlo mus lawm, Sha-ul thiaj tuav nkaus Xamuyees lub qab tsho ces lub tsho txawm ntuag.

28 Ces Xamuyees hais rau nws tias, hnub no (יחוח)Yahweh muab cov Ixayees lub tebchaws dua rhe ntawm koj mus lawm thiab muab cob rau koj li ib tug kwvtij uas zoo dua koj.  

29 Tus uas yog cov Ixayees lub meej mom tsis txawj dag tsis txawj hloov siab. Nws tsis yog tibneeg es yuav hloov siab.

30 Sha-ul txawm hais tias, kuv tau ua txhaum muaj txim lawm. Nimno thov koj saib rau kuv tab meeg kuv cov tibneeg tej kev txwj laug thiab cov Ixayees. Thov nrog kuv rov qab kom kuv thiaj tau pe hawm (יחוח)Yahweh uas yog koj tus (יחוח)Yahweh.

31 Mas Xamuyees thiaj nrog Sha-ul rov qab mus, Sha-ul thiaj tau pe hawm (יחוח)Yahweh.

32 Mas Xamuyees hais tias, cia li coj cov Amalej tus vajntxwv Akas los rau kuv. Ces Akas thiaj zoo siab hlo los rau ntawm nws. Akas hais tias, txojkev lwj siab, txojkev tuag dhau tag lawm lauj!  

33 Xamuyees hais tias, koj rab ntaj ua rau tej pojniam tsis muaj tub li cas, koj niam yuav nrog luag ib tsoom pojniam tsis muaj tub ib yam li ntawd thiab. Ces Xamuyees txawm tsuav Akas ua tej ywb yav rau ntawm (יחוח)Yahweh xubntiag hauv lub moos Kilakas.

34 Ces Xamuyees txawm mus rau ntawm lub moos Lamas. Sha-ul txawm mus rau nws lub vaj lub tsev hauv Kinpe‑as uas yog Sha-ul lub moos.

35 Ces Xamuyees tsis rov pom Sha-ul mus txog tag Xamuyees sim neej, mas Xamu-yees nyuaj siab kawg rau Sha-ul. (יחוח)Yahweh tu siab qhov uas nws tau tsa Sha-ul ua vajntxwv kav cov Ixayees.