Tsa Daviv Ua Vajntxwv

1 (יחוח)Yahweh hais rau Xamuyees tias, koj yuav quaj Sha-ul mus ntev li cas, rau qhov kuv twb muab nws tso tseg tsis yuav nws ua vajntxwv kav cov Ixayees lawm? Cia li muab koj lub khob kub nyuj ntim roj aulib es sawv kev mus. Kuv yuav txib koj mus rau ntawm Yisais hauv lub moos Npelehees, rau qhov kuv twb xaiv nws cov tub ib tug ua vajntxwv lawm.  

2 Xamuyees hais tias, kuv yuav ua li cas mus tau? Yog Sha-ul hnov, nws yuav muab kuv tua pov tseg xwb. Ces (יחוח)Yahweh hais tias, cia li coj ib tug maum nyuj mus thiab hais tias, kuv tuaj xyeem tsiaj rau (יחוח)Yahweh.

3 Mas hu Yisais tuaj nrog koj ua kevcai xyeem tsiaj mas kuv yuav qhia rau koj paub tias koj yuav tau ua abtsi. Koj yuav hliv roj rau tus uas kuv qhia lub npe rau koj.  

4 Xamuyees ua raws li (יחוח)Yahweh hais. Nws tuaj rau ntawm lub moos Npelehees. Cov kev txwj laug hauv lub moos ntawd tuaj cuag nws ua ib ce ntshai tshee hnyo thiab hais tias, koj tuaj ua qhov zoo lov?  

5 Xamuyees teb tias, kuv tuaj ua qhov zoo, kuv tuaj xyeem tsiaj rau (יחוח)Yahweh.

Cia li tu kom nej dawb huv thiab tuaj nrog kuv ua kevcai xyeem tsiaj. Xamuyees kuj tu kom Yisais thiab nws cov tub dawb huv thiab hu lawv tuaj nrog nws ua kevcai xyeem tsiaj.  

6 Thaum lawv tuaj lawd, nws saib ntsoov Elias, xav hais tias, tus uas (יחוח)Yahweh tsa kuj tuaj rau ntawm (יחוח)Yahweh lub xub ntiag lawm lauj.

7 Tiamsis (יחוח)Yahweh hais rau Xamuyees tias, tsis txhob saib rau nws lub cev thiab saib qhov uas nws siab, rau qhov kuv tsis yuav nws. (יחוח)Yahweh saib tsis thooj li tibneeg saib.  Tibneeg saib lub cev sab nraud xwb, tiamsis (יחוח)Yahweh saib lub siab.

8 Ces Yisais txawm hu Anpinadas los hla Xamuyees xubntiag.  Xamuyees hais tias, (יחוח)Yahweh tsis xaiv tus no.

9 Ces Yisais txawm kom Samas hla los mus. Mas Xamuyees kuj hais tias, (יחוח)Yahweh tsis xaiv tus no.   

10 Yisais kom xya leej tub hla mus ntawm Xamuyees xubntiag. Mas Xamuyees hais rau Yisais tias, (יחוח)Yahweh tsis xaiv cov no.

11 Ces Xamuyees txawm hais rau Yisais tias, koj cov tub nyob txhij ntawm no lawm lov? Yisais teb tias, tseem tshuav tus tub ntxawg, nws mus yug yaj lawm. Mas Xamuyees hais rau Yisais tias, cia li txib tibneeg mus coj nws los.  Peb yuav tsis zaum mus txog thaum nws los txog ntawm no.

12 Yisais kuj txib tibneeg mus coj nws los. Nws yog ib tug ntsej muag tshiab liab ploog lub cev ntaj ntsug zoo nraug ntxiag. (יחוח)Yahweh hais tias, cia li sawv tsees hliv roj rau tus ntawd, yog tus ntawd ntag.

13 Ces Xamuyees txawm muab lub khob kub nyuj roj los hliv ua kevcai tsa nws tab meeg cov tijlaug. Mas (יחוח)Yahweh Tus Ntsuj Plig Dawb Huv los nrog nraim Daviv nyob txij hnub ntawd mus. Ces Xamuyees txawm sawv tsees rov qab mus rau hauv lub moos Lamas lawm.

​

Daviv Nrog Sha-ul Nyob 

14 Mas (יחוח)Yahweh Tus Ntsuj Plig Dawb Huv tawm hauv Sha-ul lawm, ces (יחוח)Yahweh cia ib tug plig phem los tsim txom Sha-ul.

15 Sha-ul cov tub teg tub taws hais rau nws tias, sim saib, (יחוח)Yahweh cia ib tug plig phem los tsim txom koj lawm.  

16 Vajntxwv, thov koj txib koj cov tub qhe uas nyob ntawm koj xubntiag no mus nrhiav ib tug uas txawj ntaus nkauj nog ncas tuaj. Thaum twg (יחוח)Yahweh cia tus plig phem tshoov koj lub siab, tus ntawd yuav ntaus nkauj nog ncas ces koj yuav zoo. 

17 Sha-ul thiaj hais rau nws cov tub teg tub taws tias, cia li mus nrhiav ib tug yawg uas txawj ntaus nkauj nog ncas coj tuaj cuag kuv.

18 Cov tub hluas ntawd muaj ib tug hais tias, kuv pom Yisais hauv Npelehees ib tug tub txawj ntaus nkauj nog ncas.  Nws siab loj siab tuab thiab txawj ua rog, hais lus zoo thiab ntsej muag zuag plias. Thiab (יחוח)Yahweh nrog nraim nws.

19 Sha-ul thiaj txib tibneeg mus hais rau Yisais tias, koj cia li tso koj tus tub Daviv uas yug yaj tuaj cuag kuv.

20 Ces Yisais thiaj li muab ib tug nees luav thauj mov noj thiab ib hnab tawv cawv txiv hmab thiab ib tug menyuam tshis rau nws tus tub Daviv coj mus pub rau Sha-ul.

21 Daviv kuj tuaj cuag Sha-ul thiab ua nws li haujlwm.  Sha-ul hlub Daviv heev, Daviv kuj ua tus uas nqa Sha-ul tej cuab yeej ua rog.

22 Sha-ul xa xov mus rau Yisais tias, cia li kheev Daviv nyob ua kuv tes haujlwm, vim kuv txaus siab rau nws.

23 Thaum (יחוח)Yahweh cia tus plig phem los tshoov Sha-ul lub siab thaum twg, Daviv kuj khaws nkauj nog ncas los ntaus ces Sha-ul siab thiaj tus thiab zoo thiab tus plig phem thiaj khiav tawm ntawm nws mus lawm.