Daviv Tua Kaulias

1 Cov Filixatees txhij tub rog yuav tuaj ua rog, lawv tuaj txoos ua ke ntawm lub moos Xaukhaus uas nyob hauv Yahdah tebchaws. Lawv ua yeej rau ntawm Xaukhaus thiab Axekhas ntu nruab nrab ntawm Efedamis.

2 Mas Sha-ul thiab cov Ixayees txhij rog ua ke tuaj ua yeej rau hauv lub hav Elas, npaj chaw ua rog rau cov Filixatees.

3 Cov Filixatees sawv rau saum ib lub roob, cov Ixayees sawv dua rau saum ib lub roob, muaj ib lub hav quas nruab nrab.

4 Muaj ib tug yawg uas txawj ua rog heev tawm hauv cov Filixatees lub yeej tuaj, npe hu ua Kaulias.  Nws siab rau tshim thiab ib dos, nws yog tibneeg hauv lub moos Nkas.

5 Nws ntoo ib lub mom tooj liab saum nws taubhau thiab hnav lub tsho tooj liab nyhav tsib txhiab sekhees.

6 Nws rau nrhoob tooj liab thiab khuam ib rab hmuv tooj liab ntawm xub pwg laim nkaus.  

7 Tus ko hmuv ntoo uas nws tuav loj li rab nqos ntos ntaub, lub hau hmuv yog hlau nyhav rau pua sekhees. Tus tub rog uas tuav daim phiaj hlau thaiv nws mus ua nws ntej.

8 Nws tuaj sawv qw rau Ixayees cov tub rog uas nyob ib kab sab tias, nej tawm tuaj nyob ib kab sab ua abtsi li kod? Kuv yog tibneeg Filixatees los tsis yog? Nej yog Sha-ul cov qhev los tsis yog? Cia li xaiv ib tug nyob nej chaw nqis tuaj rau ntawm kuv no.

9 Yog nws muaj peevxwm nrog kuv ua rog thiab tua tau kuv, peb cov yuav yeem ua nej qhev. Yog kuv kov yeej nws thiab tua tau nws nej cov yuav tau ua peb qhev thiab tu peb.  

10 Thiab tus Filixatees ntawd hais tias, hnub no kuv twv ntxhias Ixayees cov tub rog xa ib tug tuaj mas wb yuav sib tua.  

11 Thaum Sha-ul thiab cov Ixayees sawv daws hnov tus Filixatees tej lus ntawd, lawv poob siab thiab ntshai kawg li.

12 Mas Daviv yog Yisais tus tub.  Yisais yog tibneeg Efathas nyob hauv lub moos Npelehees hauv Yahdah tebchaws, nws muaj yim tus tub.  

Thaum Sha-ul ua vajntxwv, Yisais kuj laus heev hnub nyoog nchav lawm. 13 Yisais peb tug tub hlob kuj nrog Sha-ul mus ua rog.  Nws peb tug tub uas mus ua rog ntawd tus hlob npe hu ua Elias, tus ob hu ua Anpinadas thiab tus peb hu ua Samas.

14 Daviv yog tus tub ntxawg.  Peb tug tijlaug hlob kuj nrog Sha-ul mus lawm.

15 Daviv mus mus los los rau ntawm Sha-ul thiab yug nws txiv pab yaj ntawm Npelehees.

16 Tus Filixatees ntawd tawm tuaj twv ntxhias thaum tagkis thiab thaum yuav tsaus ntuj tau plaub caug hnub.  

17 Yisais hais rau nws tus tub Daviv tias, koj cia li coj cov qeb kib ib efas thiab kaum lub ncuav no kavtsij mus rau koj cov tijlaug hauv lub yeej.  

18 Thiab coj kaum thooj nyuj mis nkoog khov no mus rau lawv tus thawj rog uas kav ib txhiab leej.  Saib koj cov tijlaug nyob zoo li cas thiab coj lawv li ib yam los rau kuv saib.  

19 Sha-ul thiab koj cov tijlaug thiab cov Ixayees sawvdaws nyob hauv lub hav Elas tab tom ua rog rau cov Filixatees.

20 Daviv thiaj sawv ntxov tsees tso pab yaj tseg rau ib tug saib, thauj zaub mov mus raws li Yisais hais rau nws. Nws tuaj txog hauv lub yeej rau thaum pab tub rog tab tom tawm mus nyob ib kab sab rau ntawm chaw ua rog thiab qw ua tsuj ua tsaug.

21 Cov Ixayees thiab cov Filixatees tawm tuaj yuav nqis tes ua rog, ob tog tub rog tuaj sawv saib ntswb ntsoov. 

22 Daviv muab tej zaub mov tso rau tus uas saib zaub mov ces txawm khiav mus rau tom chaw ua rog nrog nws tijlaug tham.

23 Thaum lawv tab tom hais lus tus yawg Filixatees uas hu ua Kaulias, uas yog tibneeg hauv lub moos Nkas uas txawj ua rog heev txawm tawm hauv pab tub rog Filixatees uas sawv ua ib kab sab ntawd txav zog tuaj, thiab hais twv ntxhias yam li yav tag los lawd, mas Daviv kuj hnov.

24 Thaum cov Ixayees sawvdaws pom tus yawg ntawd, lawv txawm khiav thim rov qab ntshai kawg li.

25 Cov Ixayees sib tham hais tias, nej twb pom tus yawg uas tawm tuaj ntawd lawm lov? Nws tawm tuaj twv ntxhias cov Ixayees tiag tiag li. Yog leejtwg tua tau nws, vajntxwv yuav muab nyiaj ntau nplua mias thiab muab vajntxwv tus ntxhais rau tus ntawd yuav, thiab pub kom nws txiv tsev neeg tsis txog them se rau hauv cov Ixayees.

26 Ces Daviv txawm hais rau cov tibneeg uas nrog nws sawv ua ke ntawd tias, lawv yuav ua li cas rau tus uas tua tau tus Filixatees ntawd thiaj rhuav tau qhov uas nws ua rau cov Ixayees poob ntsej muag? Tus yawg Filixatees uas tsis ua kevcai txiav ntawd yog leejtwg es nws yuav hais twv ntxhias rau (יחוח)Yahweh uas muaj txojsia nyob pab tub rog?  

27 Cov pejxeem kuj teb nws ib yam nkaus tias, yog leejtwg tua tau tus yawg ntawd, nws yuav tau raws li hais cia lawd.

28 Thaum Elias uas yog Daviv tus tijlaug hlob hnov Daviv hais rau cov tibneeg ntawd, Elias txawm npau taws rau Daviv thiab hais tias, koj tuaj ua abtsi? Koj tseg ob peb tug nyuag yaj rau leejtwg saib xyuas hauv tebchaws moj sab qhua? Kuv yeej paub koj tej nyuag kev khav theeb thiab tej kev phem hauv koj lub siab.  Koj tsuas yog tuaj saib lawv sib tua xwb.

29 Daviv txawm teb tias, kuv tau ua li cas maj? Kuv tsuas yog hais lo lus xwb. 30 Daviv txawm tig mus hais dua rau lwm tus ib yam nkaus li ntawd.  Tej tibneeg kuj teb ib yam li qub rau nws.

31 Thaum lawv hnov Daviv tej lus, lawv txawm piav rau Sha-ul paub, Sha-ul thiaj txib tibneeg mus coj Daviv los.  

32 Daviv thiaj hais rau Sha-ul tias, tsis txhob cia leejtwg poob siab rau yawg ntawd kiag li.  Kuv uas yog koj tus tub qhe yuav mus nrog tus Filixatees ntawd sib tua.

33 Mas Sha-ul hais rau Daviv tias, koj tsis muaj peevxwm mus nrog tus Filixatees ntawd sib tua, rau qhov koj tseem yog menyuam hluas, tiamsis tus yawg ntawd yeej ua tub rog txij thaum hluas los lawm.  

34 Tiamsis Daviv hais rau Sha-ul tias, kuv uas yog koj tus tub qhe tau yug kuv txiv tej yaj, mas thaum muaj tsov ntxhuav muaj dais tuaj tom menyuam yaj,

35 kuv muab raws ntaus thiab cawm tus menyuam yaj ntawd dim hauv nws lub qhov ncauj los.  Yog tsov tig kiag los tom kuv, kuv kuj ntsiab nkaus puab tsaig muab ntaus tuag kiag.  

36 Kuv uas yog koj tus tub qhe twb tau tua tau tsov ntxhuav thiab dais los lawm. Mas tus Filixatees uas tsis ua kevcai txiav ntawd kuj yuav zoo li tej tsiaj ntawd, rau qhov nws tau hais twv ntxhias (יחוח)Yahweh uas muaj txojsia nyob cov tub rog. 37 Thiab Daviv hais tias, (יחוח)Yahweh uas cawm kuv dim hauv tsov ntxhuav tej rau tes rau taw thiab dim hauv dais tej rau tes rau taw, yuav cawm kuv dim hauv tus Filixatees ntawd txhais tes thiab. Sha-ul txawm hais rau Daviv tias, cia li mus, thov (יחוח)Yahweh nrog nraim koj.

38 Sha-ul txawm muab nws tej ris tsho ua rog rau Daviv hnav thiab muab lub mom tooj liab rau Daviv ntoo saum taubhau thiab muab lub tsho hlau rau Daviv hnav. 

39 Daviv muab Sha-ul rab ntaj los sia ris zawm lub tsho hlau rau ntawm duav, ces nws sim mus kev mas mus tsis taus rau qhov nws hnav tsis kam tej ntawd. Ces Daviv txawm hais rau Sha-ul tias, kuv hnav tej no mus tsis taus, rau qhov kuv hnav tsis kam.  Ces Daviv txawm muab hle.

40 Nws tuav rawv nws tus pas nrig thiab xaiv tsib lub qe zeb kheej kheej hauv hav los ntim rau hauv nws lub hnab thoob puab uas nws khuam yug yaj.  Nws nqa ib txoj hlua fiav ntaus qe zeb, nws nam zog mus ze tus Filixatees ntawd.

41 Tus yawg Filixatees ntawd kuj nam zog tuaj ze Daviv, tus uas tuav daim phiaj hlau thaiv kuj ua nws ntej.

42 Thaum tus Filixatees tsa muag saib pom Daviv, nws kuj saib tsis taus Daviv rau qhov Daviv tsuas yog ib tug hluas ntsej muag tshiab liab ploog zoo nraug ntxiag xwb.

43 Nws txawm hais rau Daviv tias, kuv yog dev lov es koj yuav coj ib tug nyuag pas tuaj ntawm kuv? Ces nws txawm tuav nws tej dab qhua lub npe tsawm foom Daviv.  

44 Tus Filixatees hais rau Daviv tias, cia li los rau ntawm kuv no. Kuv yuav muab koj tej nqaij rau tej liaj dav saum nruab ntug thiab tej tsiaj qus noj.

45 Ces Daviv hais rau nws tias, koj coj ntaj coj hmuv thiab coj hmuv nkaug tuaj tawm tsam kuv. Tiamsis kuv tuav (יחוח)Yahweh uas muaj hwjchim loj kawg nkaus lub npe tuaj tawm tsam koj. Nws yog Ixayees pab tub rog Tus Tswv uas koj twv ntxhias.

46 Hnub no (יחוח)Yahweh yuav muab koj cob rau hauv kuv txhais tes, kuv yuav muab koj tua thiab muab koj lub taubhau txiav pov tseg.  Hnub no kuv yuav muab Filixatees cov tub rog tej cev tuag rau tej liaj dav saum nruab ntug thiab tej tsiaj qus hauv ntiajteb noj, mas ib tsoom tibneeg hauv qab ntuj yuav paub tias muaj ib tug (יחוח)Yahweh nyob hauv Ixayees.

47 Thiab tej tibneeg uas tuaj ua ke no huvsi yuav paub tias (יחוח)Yahweh tsis yog siv ntaj siv hmuv cawm tibneeg, rau qhov kev ua rog zaum no yog (יחוח)Yahweh ua, mas nws yuav muab nej cob rau hauv peb txhais tes.

48 Thaum tus Filixatees ntawd sawv tsees nam zog tuaj ze yuav ntaus Daviv, Daviv kuj khiav ceev nrooj mus rau ntawm lub chaw ua rog rau tus Filixatees ntawd.

49 Daviv cev tes rho kiag ib lub qe zeb hauv lub hnab los fiav ntawm txoj hlua ntaus raug tus Filixatees ntawd hauv pliaj.  Lub qe zeb ntsia nkaus rau ntawm hauv pliaj ua rau nws ntog khwb nkaus rau hauv av.

50 Yog li no, Daviv thiaj siv txoj hlua fiav thiab ib lub qe zeb xwb kov yeej tus Filixatees ntawd. Nws muab tus Filixatees ntaus thiab muab tua pov tseg. Daviv tsis muaj ntaj hauv nws txhais tes li.

51 Daviv thiaj khiav mus sawv kiag saum tus ntawd lub cev tuag thiab rho kiag rab ntaj hauv tus Filixatees ntawd lub hnab los txiav lub taubhau tu nrho. Thaum cov Filixatees pom tus tub rog uas nyob lawv chaw ua rog tuag lawm, lawv thiaj tig kiag khiav.

52 Cov Ixayees thiab cov Yahdah txawm sawv tsees qw nrov mus raws caum cov Filixatees mus txog ntua lub moos Nkas thiab txog lub rooj loog lub moos Ekhoos. Cov Filixatees uas raug mob thiaj ntog taug kev ntawm lub moos Sa‑ala‑is mus txog ntua lub moos Nkas thiab lub moos Ekhoos.

53 Mas cov Ixayees thiaj rov qab los tsis caum cov Filixatees lawm thiab mus lws tej qhov txhia chaw hauv lawv lub yeej.

54 Daviv kuj coj tus Filixatees ntawd lub taubhau mus rau hauv lub nroog Yeluxalees. Tiamsis tej cuab yeej mas Daviv coj mus khaws rau hauv nws lub tsev ntaub.

55 Thaum Sha-ul pom Daviv tawm mus ntaus rog rau tus Filixatees ntawd, nws txawm hais rau Anaws uas yog nws tus thawj rog tias, Anaws, tus hluas ntawd yog leejtwg tus tub? Anaws teb tias, vajntxwv uas muaj txojsia nyob, kuv yeej tsis paub thiab.

56 Vajntxwv txawm hais tias, cia li mus nug saib tus nyuag hluas ntawd yog leejtwg tus tub. 

57 Thaum Daviv mus tua tus Filixatees rov los, Anaws coj nws mus cuag Sha-ul. Daviv nqa rawv tus Filixatees ntawd lub taubhau mus thiab.

58 Sha-ul thiaj nug tias, tub hluas es, koj yog leejtwg tus tub? Daviv teb tias, kuv yog koj tus tub qhe Yisais tus tub, yog tibneeg hauv Npelehees.