1 XAMUYEES 18

Yaunathas Nrog Daviv Sib Cog Lus

1 Thaum Daviv hais rau Sha-ul tag lawd, Yahnathas txawm nrog Daviv koom ib lub siab thiab hlub Daviv ib yam li nws hlub nws tus kheej.

2 Ces hnub ntawd Sha-ul txawm kom Daviv nrog nws nyob tsis kheev Daviv rov qab mus rau nws txiv tsev.

3 Mas Yahnathas nrog Daviv cog lus sib raug zoo rau qhov nws hlub Daviv ib yam li nws hlub nws tus kheej.

4 Yahnathas hle nws lub tsho ntev pub rau Daviv. Nws lub tsho hlau thiab nws rab ntaj rab hneev thiab txoj siv tawv los nws kuj pub rau Daviv.

5 Sha-ul txib Daviv mus qhovtwg, los Daviv kuj tawm mus ua haujlwm tiav log. Vim li no Sha-ul thiaj tsa Daviv ua thawj kav cov tub rog. Tej uas Sha-ul ua ntawd mas cov pejxeem sawvdaws thiab Sha-ul cov tub teg tub taws puavleej pom zoo.

​

Sha-ul Khib Daviv 

6 Thaum Daviv tua tau tus Filixatees ntawd lawm es cov tub rog sawvdaws rov los, cov pojniam hauv Ixayees txhua lub moos txawm tawm tuaj hu nkauj seev cev tos vajntxwv Sha-ul. Lawv npuaj nruas hu nkauj zoo siab xyiv fab thiab tshuab raj ntaus nkauj nog ncas.

7 Thaum cov pojniam hu nkauj zoo siab xyiv fab ntawd lawv hu tias, Sha-ul tua tau qas txhiab leej, Daviv tua tau qas vam leej.

8 Sha-ul txawm chim heev, nws tsis txaus siab rau tej lus uas lawv hu ntawd. Nws hais tias, lawv suav qas vam leej rau Daviv, tiam sis suav qas txhiab leej rau kuv xwb. Tseem tshuav abtsi uas Daviv yuav tau, tsuas yog tshuav lub tebchaws xwb?

9 Ces txij hnub ntawd los Sha-ul txawm nyas nrhws Daviv. 10Hnub tom qab (יחוח)Yahweh cia ib tug plig phem los tshoov Sha-ul lub siab, ces Sha-ul txawm pib vwm rau hauv nws lub tsev rau thaum Daviv tab tom ntaus nkauj nog ncas ib yam li nws niaj hnub ntaus. Sha-ul tuav rawv ib rab hmuv hauv nws txhais tes.

11 Sha-ul txawm tib nkaug hmuv xav hais tias, kuv yuav nkaug Daviv ntsia nkaus rau tim phab ntsa. Tiamsis Daviv maim dhau ob zaug.

12 Sha-ul kuj ntshai Daviv rau qhov (יחוח)Yahweh nrog nraim Daviv tiamsis twb ncaim ntawm Sha-ul lawm.

13 Yog li ntawd Sha-ul thiaj muab Daviv raws tawm, muab Daviv tsa ua thawj kav ib txhiab leej tub rog, Daviv thiaj coj cov tub rog tawm mus thiab rov los.

14 Daviv ua abtsi kuj ua tau tiav huvsi, rau qhov (יחוח)Yahweh nrog nraim nws.

15 Thaum Sha-ul pom tias Daviv ua tau haujlwm tiav zoo, nws kuj ntshai Daviv.

16Tiamsis cov Ixayees thiab cov Yahdah sawvdaws nyiam Daviv rau qhov nws pheej coj lawv tawm mus ua rog thiab rov los.  

17 Ces Sha-ul hais rau Daviv tias, no yog kuv tus ntxhais hlob uas hu ua Melas.  

Kuv yuav muab nws qua rau koj yuav ua pojniam. Tsuav yog koj muaj lub siab tuab pab kuv thiab ua rog rau (יחוח)Yahweh cov yeeb ncuab xwb.  Rau qhov Sha-ul xav hais tias, tsis txhob cia kuv tsa kuv txhais tes ntaus nws, cia cov Filixatees ntaus nws.

18 Daviv hais rau Sha-ul tias, hauv cov Ixayees kuv yog leejtwg thiab kuv cov kwvtij uas yog kuv txiv tsev neeg yog leej twg es kuv yuav los ua tau vajntxwv li vauv?

19 Tiamsis thaum txog sijhawm uas Sha-ul yuav muab nws tus ntxhais Melas rau Daviv, nws txawm muab qua kiag rau Adi‑ees uas yog tibneeg hauv lub moos Mehaulas.  

20 Sha-ul tus ntxhais Mikhas kuj nyiam Daviv. Muaj tibneeg mus hais rau Sha-ul paub, Sha-ul kuj txaus siab.

21 Sha-ul xav hais tias, kuv yuav muab nws qua rau Daviv xwv nws thiaj ua tau rooj hlua cuab Daviv thiab cov Filixatees txhais tes thiaj li tawm tsam nws. Yog li no Sha-ul thiaj hais rau Daviv zaum ob tias, zaum no koj yuav ua kuv tus vauv.

22 Sha-ul hais rau nws cov tub teg tub taws tias, nej hais twjywm rau Daviv tias, saib maj, vajntxwv txaus siab rau koj thiab nws cov tub teg tub taws sawvdaws kuj nyiam koj.  Nimno koj cia li kam ua vajntxwv tus vauv los maj.

23 Sha-ul cov tub teg tub taws hais tej lus ntawd rau Daviv mloog. Daviv txawm hais tias, nej pom tias qhov uas ua vajntxwv tus vauv yog ib qho me me xwb lov? Kuv yog ib tug tibneeg pluag thiab tsis muaj koob meej abtsi li.

24 Cov tub teg tub taws thiaj piav rau Sha-ul tias Daviv hais li ub li no.

25 Sha-ul thiaj hais tias, nej cia li hais rau Daviv tias, vajntxwv tsis yuav nqi mis nqi hno abtsi li, tsuas yog yuav cov Filixatees ib puas daim tawv chaw xis xwv thiaj ua pauj tau rau vajntxwv cov yeeb ncuab. Sha-ul yeej xav hais tias yuav ua rau Daviv tuag rau hauv cov Filixatees txhais tes.   

26 Thaum Sha-ul cov tub teg tub taws piav tej lus ntawd rau Daviv mloog, mas Daviv kuj txaus siab ua vajntxwv li vauv.  Thaum tsis tau txog lub sijhawm uas teem cia,

27 Daviv thiab nws cov tibneeg txawm tawm mus tua cov Filixatees tau ob puas leej, mas Daviv muab lawv tej daim tawv chaw xis npaum nkaus li uas hais tseg lawd coj los pub rau vajntxwv es yuav ua vajntxwv tus vauv. Sha-ul thiaj muab nws tus ntxhais Mikhas qua rau Daviv yuav ua poj niam.

28 Thaum Sha-ul pom thiab paub tias (יחוח)Yahweh nrog nraim Daviv thiab nws tus ntxhais Mikhas nyiam Daviv,

29 Sha-ul yimhuab ntshai Daviv.  Yog li ntawd Sha-ul ua yeeb ncuab rau Daviv mus li.

30 Filixatees cov thawj pheej tawm tuaj ua rog.  Txhua zaus uas lawv tawm tuaj, Daviv kov yeej ntau dua Sha-ul cov thawj tub rog sawvdaws.  Ces nws lub koob meej thiaj nrov ncha heev.