Sha-ul Nrhiav Kev Tua Daviv

1 Sha-ul hais rau nws tus tub Yahna-thas thiab nws cov tub teg tub taws sawvdaws tias kom lawv muab Daviv tua pov tseg.  Tiamsis Sha-ul tus tub Yahnathas nyiam Daviv heev.

2 Yahnathas thiaj hais rau Daviv tias, kuv txiv Sha-ul nrhiav kev tua koj pov tseg. Vim li no, tagkis sawv ntxov koj yuav tau ceev faj zoo, cia li mus khiav nkaum nyob twjywm.

3 Mas kuv yuav mus sawv ntsug ze ze kuv txiv rau hauv daim teb uas koj mus khiav nkaum ntawd, thiab kuv yuav nrog kuv txiv tham txog koj.  Yog kuv paub li cas kuv yuav qhia rau koj paub thiab.

4 Yahnathas qhuas Daviv rau nws txiv Sha-ul mloog tias, vajntxwv, thov koj tsis txhob ua txhaum rau Daviv uas yog koj tus tub qhe, rau qhov Daviv tsis tau ua ib qho txhaum rau koj thiab tej haujlwm uas nws ua kuj muaj nuj nqis ntau kawg rau koj.

5 Vim nws sev nyog nws txojsia mus tua tus Filixatees ntawd thiab (יחוח)Yahweh pab cov Ixayees sawvdaws kov yeej loj kawg. Koj twb pom thiab koj twb zoo siab kawg li lawm. Ua cas koj yuav ua txhaum rau tus uas tsis tau ua txhaum es yuav tua Daviv uas tsis to kev tua?

6 Sha-ul kuj mloog Yahnathas hais, Sha-ul thiaj twv tias, (יחוח)Yahweh uas muaj txojsia nyob pom, Daviv yuav tsis raug muab tua kiag li.

7 Ces Yahnathas txawm hu Daviv thiab qhia txhua yam no rau nws paub, thiab Yahnathas coj Daviv mus cuag Sha-ul, ces Daviv thiaj tau los nrog Sha-ul nyob li qub.

8 Rov muaj kev ua rog tuaj. Daviv kuj tawm mus ua rog rau cov Filixatees thiab tua tuag coob heev, lawv thiaj tig khiav tag lawm.

9 (יחוח)Yahweh cia ib tug plig phem los tshoov Sha-ul lub siab rau thaum nws zaum hauv nws lub tsev thiab tuav rawv rab hmuv. Daviv tab tom ntaus nkauj nog ncas.

10 Sha-ul tib nkaug xav kom ntsia nkaus Daviv rau ntawm phab ntsa, tiamsis Daviv maim dhau lawm. Sha-ul rab hmuv thiaj rhais nrees ntawm phab ntsa. Mas Daviv khiav dim hmo ntawd.

11 Sha-ul tso tibneeg mus rau ntawm Daviv lub tsev thiab zov tos yuav tua Daviv rau thaum kaj ntug. Tiamsis Daviv tus pojniam Mikhas hais rau Daviv tias, yog hmo no koj tsis cawm koj txojsia, tagkis koj yuav raug tua tuag xwb.

12 Mikhas txawm muab Daviv tso nqis ntawm qhov rais, nws thiaj khiav dim lawm.

13 Mikhas muab ib tug dab mlom los tso pw rau saum lub txaj thiab muab lub tog rau ncoo plaub tshis tso rau ntawm taubhau thiab muab pam vov rau.

14 Thaum Sha-ul tso tibneeg mus ntes Daviv, Mikhas hais tias, nws muaj mob.

15 Ces Sha-ul txawm txib tibneeg mus saib Daviv thiab hais tias, cia li nqa kiag nws lub txaj thiab nws tuaj cuag kuv xwv kuv thiaj muab nws tua tau pov tseg.

16 Thaum cov tibneeg nkag los saib ua ciav pom tus dab mlom pw saum lub txaj thiab lub tog rau ncoo plaub tshis nyob ntawm taubhau.

17 Sha-ul thiaj hais rau Mikhas tias, ua cas koj yuav dag kuv es tso kuv tus yeeb ncuab dim mus lawm? Mikhas teb Sha-ul tias, nws hais rau kuv tias, tso kuv mus, yuav cia kuv muab koj tua lov?

18 Daviv txawm khiav dim mus cuag Xamuyees hauv lub moos Lamas thiab piav txhua yam uas Sha-ul tau ua rau nws rau Xamuyees mloog. Mas Xamuyees thiab Daviv mus nyob hauv lub zos Nayauj.

19 Muaj tibneeg hais rau Sha-ul tias, Daviv nyob hauv lub zos Nayauj ntawm lub moos Lamas.

20 Sha-ul txawm tso tibneeg mus ntes Daviv. Thaum lawv mus pom ib pab xibhwb tab tom cev (יחוח)Yahweh lus thiab Xamuyees sawv ntsug ua lawv tus thawj, (יחוח)Yahweh Tus Ntsuj Plig Dawb Huv kuj los kav tag nrho cov uas Sha-ul tso tuaj ces lawv txawm cev (יחוח)Yahweh lus thiab.

21 Thaum muaj tibneeg hais rau Sha-ul, nws kuj tso dua ib pab mus, mas cov ntawd kuj cev (יחוח)Yahweh lus thiab. Sha-ul kuj tso pab uas peb mus thiab lawv kuj cev (יחוח)Yahweh lus lawm thiab.

22 Ces Sha-ul cia li sawv kev mus rau ntawm Lamas. Nws tuaj txog ntawm lub qhov dej loj hauv lub moos Xekhus mas nug tias, Xamuyees thiab Daviv nyob qhovtwg? Muaj ib tug teb tias, nkawv nyob hauv lub zos Nayauj ntawm lub moos Lamas.  

23 Ces Sha-ul txawm tawm qhov ntawd mus rau hauv Nayauj ntawm lub moos Lamas. Mas (יחוח)Yahweh Tus Ntsuj Plig Dawb huv los kav tag nrho nws lub siab, nws txawm cev (יחוח)Yahweh lus taug kev mus txog Nayauj ntawm lub moos Lamas.

24 Nws hle nws tej ris tsho tseg thiab cev (יחוח)Yahweh lus rau ntawm Xamuyees xubntiag thiab pw liab qab ib hnub ib hmos qhov ntawd. Vim li no, luag thiaj hais tias, Sha-ul yog ib tug xibhwb cev (יחוח)Yahweh lus thiab lov?