Yaunathas Thiab Daviv

1 Daviv txawm khiav hauv Nayauj ntawm lub moos Lamas los cuag Yahnathas hais tias, kuv tau ua li cas? Kuv tau ua txhaum abtsi? Kuv tau ua txhaum muaj txim li cas rau koj txiv es nws yuav nrhiav txov kuv txojsia?

2 Yahnathas teb tias, tsis muaj li cas kiag li. Koj yuav tsis tuag kiag li. Kuv txiv tsis ua ib yam loj los me uas nws yuav tsis qhia rau kuv paub.  Kuv txiv yuav ua cas zais tej no tsis qhia rau kuv? Yeej tsis muaj li ntawd.

3 Tiamsis Daviv twv tias, koj txiv yeej paub zoo tias, koj txaus siab rau kuv heev mas nws yuav xav tias, tsis txhob kheev Yahnathas paub tej no kiag li tsam ces nws ntxhov siab. Muaj (יחוח)Yahweh uas muaj txojsia nyob pom thiab muaj koj uas muaj txojsia nyob pom, kuv mas tshuav ib qeb xwb ces mus txog qhov tuag.

4 Yahnathas thiaj hais rau Daviv tias, koj hais li cas kuv yuav ua raws li ntawd rau koj.

5 Daviv thiaj hais rau Yahnathas tias, tagkis yog hnub uas hli xiab, tsis tsim nyog kuv yuav tseg tsis koom noj vajntxwv lub rooj mov. Cia kuv mus khiav nkaum tom teb peb hnub txog hnub peb tsaus ntuj.

6 Yog koj txiv pom tias kuv tsis tuaj, thov koj hais rau nws tias, Daviv twb thov kuv tso nws mus rau nws lub moos Npelehees lawm, vim yog nws tsev neeg sawvdaws ua kevcai xyeem tsiaj txwm xyoo.

7 Yog nws hais tias, zoo lauj, ces kuv uas yog koj tus tub qhe yuav tau zoo. Tiamsis yog nws chim, koj yuav paub tias nws yeej txiav txim siab ua phem rau kuv.   

8 Thov koj hlub es koj ua li no rau kuv uas yog koj tus tub qhe, rau qhov koj twb nrog kuv cog lus sib raug zoo tab meeg (יחוח)Yahweh lawm. Tiamsis yog kuv tau ua txhaum, thov koj muab kuv tua pov tseg, ua cas koj tseem coj kuv mus cuag koj txiv?

9 Yahnathas hais tias, thov kom tsis txhob muaj li ntawd kiag li. Yog kuv paub tias kuv txiv txiav txim siab ua phem rau koj, kuv yuav tsis qhia koj lov?

10 Daviv thiaj hais rau Yahnathas tias, yog koj txiv teb nyaum kawg leejtwg yuav qhia tau rau kuv?

11 Yaunathas hais rau Daviv tias, cia wb mus rau tom teb. Nkawv txawm mus rau tom teb.

12 Mas Yahnathas hais rau Daviv tias, muaj (יחוח)Yahweh uas yog cov Ixayees Tus Tswv pom, tagkis lossis nagkis kwvlam lub sijhawm no, thaum kuv twb tshuaj saib kuv txiv lawm, yog nws lub siab zoo rau koj kuv yuav tsis tso tibneeg tuaj qhia rau koj paub tamsid lov?

13 Tiamsis yog kuv txiv npaj siab ua phem rau koj, mas yog kuv tsis qhia rau koj thiab tsis xa koj mus kom tso siab plhuav, thov (יחוח)Yahweh ua ib yam li ntawd thiab nyhav dua rau kuv. Thov (יחוח)Yahweh nrog nraim koj yam li uas nws nrog nraim kuv txiv.

14 Yog kuv tseem muaj txojsia nyob ntxiv mus, thov koj hlub kuv ruaj khov ib yam li (יחוח)Yahweh txojkev hlub, xwv kuv thiaj tsis tuag.

15 Thaum (יחוח)Yahweh rhuav tshem Daviv cov yeeb ncuab tag nrho huvsi hauv qab ntuj lawm, thov tsis txhob txiav koj txojkev hlub uas ruaj khov ntawm kuv caj ces mus ib txhis.  

16 Yaunathas thiaj nrog Daviv caj ces cog lus sib raug zoo, hais tias, thov (יחוח)Yahweh ua pauj rau Daviv cov yeeb ncuab.

17 Thiab Yahnathas rov kom Daviv cog lus dua ib zaug rau nws vim yog nkawv muaj kev sib hlub, rau qhov Yahnathas hlub Daviv ib yam li nws hlub nws tus kheej.

18 Ces Yahnathas txawm hais rau Daviv tias, tagkis yog hnub hli xiab, lawv yuav pom tias koj tsis nyob koj lub rooj.

19 Mas nagkis koj cia li mus rau nram lub chaw uas koj tau khiav nkaum rau hnub uas pib muaj tej xwm txheej no, thiab nyob ntawm lub pob zeb Exees tos. 20 Kuv yuav tua peb xub hneev rau ib sab ntawd ib yam li kuv tua phiaj.

21 Kuv yuav txib ib tug metub hais tias, cia li mus nrhiav rab xub. Yog kuv hais rau tus metub ntawd tias, saib nawj, rab xub nyob sab tom no, cia li muab los, ces koj cia li rov los, rau qhov muaj (יחוח)Yahweh uas muaj txojsia nyob pom, koj kuj nyob tso siab plhuav, tsis muaj xwm txheej phem abtsi.

22 Tiamsis yog kuv hais rau tus metub ntawd tias, saib nawj, rab xub nyob tom koj hauv ntej ub, ces koj cia li khiav mus, rau qhov (יחוח)Yahweh yog tus xa koj mus lawm.

23 Qhov uas koj thiab kuv tau hais cia ntawd, mas muaj (יחוח)Yahweh ua timkhawv rau kuv thiab koj mus ib txhis.

24 Daviv thiaj khiav nkaum tom teb. Thaum txog hnub hli xiab, vajntxwv los nyob ntawm rooj mov.

25 Vajntxwv nyob saum nws lub rooj uas npuas ntawm ib sab phab ntsa ib yam li nws ib txwm nyob. Yahnathas sawv ntsug thiab Anaws nyob ntawm Sha-ul ib sab. Tiam sis Daviv lub rooj tsis muaj leejtwg nyob.  

26 Tiamsis hnub ntawd Sha-ul tsis hais abtsi li, rau qhov nws xav tias, ntshai yog Daviv khuam cheem tej yam lawm.  Nws tsis dawb huv, nws yeej tsis dawb huv kaj.

27 Tiamsis hnub tom qab uas hli xiab ob Daviv lub rooj kuj tsis muaj leejtwg nyob.  Ces Sha-ul txawm hais rau nws tus tub Yahnathas tias, ua cas nag thiab hnub no Yisais tus tub tsis tuaj noj mov?  

28 Yahnathas txawm teb Sha-ul tias, Daviv thov thov kuv tso cai rau nws rov mus rau lub moos Npelehees.

29 Nws hais tias, thov tso kuv mus, rau qhov kuv tsev neeg yuav ua kevcai xyeem tsiaj rau hauv lub moos, mas kuv tus tijlaug hais kom kuv mus nrog lawv koom kom tau. Yog koj txaus siab rau kuv, thov tso kuv mus saib kuv cov tijlaug.  Yog li ntawd, nws thiaj tsis tau tuaj rau ntawm vaj ntxwv lub rooj mov no.

30 Ces Sha-ul txawm npau taws rau Yahnathas thiab hais rau nws tias, koj yog niag pojniam uas ntxeev siab thiab siab phem li tub, kuv tsis paub lov? Koj twb xaiv Yisais tus tub los rhuav koj ntsej muag thiab ua rau koj niam uas yug koj raug txaj muag.

31 Thaum twg Yisais tus tub tseem muaj txojsia nyob hauv lub ntiajteb, ces koj thiab koj caj ces yuav tsis raug tsa ua vaj ntxwv nyob ruaj li. Vim li no cia li tso tib neeg mus coj nws tuaj cuag kuv, nws yeej yuav tuag xwb.

32 Mas Yahnathas teb nws txiv Sha-ul tias, ua cas Daviv yuav tau raug muab tua tuag? Nws tau ua li cas lawm?  

33 Sha-ul txawm tib nkaug hmuv rau Yahna-thas xav tua nws. Yog li ntawd Yahnathas thiaj paub tias nws txiv txiav txim siab tua Daviv pov tseg lawm.

34 Yahnathas thiaj sawv tsees ntawm rooj mov chim tsawv, thiab nws tsis noj abtsi kiag li rau hnub xiab ob ntawd, rau qhov nws txhawj txog Daviv vim nws txiv tau rhuav Daviv ntsej muag.

35 Thaum kaj ntug Yahnathas thiaj mus rau tom teb raws li teem rau Daviv lawd, muaj ib tug metub nrog nws mus thiab.  

36 Nws hais rau tus metub ntawd tias, cia li khiav mus nrhiav rab xub uas kuv tua mus. Thaum tus metub ntawd khiav mus lawd, Yahnathas tua ib rab xub dhau rau tom nws hauv ntej.

37 Thaum tus metub ntawd mus txog ntawm rab xub uas Yahnathas tua ntawd, Yahnathas qw rau tus metub hais tias, rab xub nyob dhau tom koj hauv ntej ub los tsis yog?

38 Thiab Yahnathas qw rau tus metub ntawd tias, cia li kavtsij maj nroos mus tsis txhob tos. Tus metub txawm khaws cov xub thiab rov los rau ntawm Yahnathas.

39 Tus metub ntawd tsis paub abtsi li tsuas yog Yahnathas thiab Daviv paub xwb. 40 Ces Yahnathas txawm muab nws tej cuab yeej rau tus metub ntawd thiab hais rau nws tias, cia li coj tej no mus rau hauv lub nroog. 

41 Thaum tus metub ntawd mus lawm, Daviv txawm tawm ntawm lub pob zeb sab nrad los khwb nkaus rau hauv av pe peb pes. Ces nkawv sib nwj thiab quaj. Daviv quaj heev kawg nkaus.  

42 Yahnathas hais rau Daviv tias, cia li mus zoo rau qhov wb twb tuav (יחוח)Yahweh lub npe cog lus twv hais tias, (יחוח)Yahweh yuav ua tim khawv rau kuv thiab koj, thiab rau kuv caj ces thiab koj caj ces mus ib txhis. Daviv txawm sawv kev mus lawm.  Yahnathas rov mus rau hauv lub nroog.