Daviv Khiav Sha-ul

1 Ces Daviv txawm mus txog tus pov thawj Ahimelej hauv lub moos Naus.  Mas Ahimelej tawm tuaj tos Daviv ua tshee hnyo hais tias, ua cas koj yuav tib leeg tuaj xwb, tsis muaj leejtwg nrog koj tuaj?

2 Daviv hais rau tus pov thawj Ahimelej tias, vajntxwv txib kuv tuaj ua ib yam haujlwm. Nws hais rau kuv tias, tsis txhob qhia tej uas kuv txib koj mus ua ntawd thiab tej uas kuv muab cob rau koj lawd rau leejtwg paub li. Kuv twb teem cov tub hluas ntsib kuv dua rau ib qho chaw lawm.

3 Nimno koj muaj abtsi ntawm tes? Thov muab tsib lub ncuav lossis ib yam abtsi uas koj muaj ntawm no rau kuv noj.

4 Tus pov thawj teb Daviv tias, kuv tsis muaj cov ncuav uas niaj hnub noj, tsuas yog cov ncuav uas dawb huv xwb. Yuav yog koj cov hluas tsis nrog pojniam pw thiaj noj tau.

5 Daviv teb tus pov thawj tias, qhov tseeb txhua zaus uas kuv tawm mus ua haujlwm, tej pojniam yeej nyob deb ntawm peb. Txawm yog peb tawm mus ua tej haujlwm tsis tseem ceeb los tej tub hluas lub cev yeej dawb huv lawm.  Mas hnub no lawv lub cev yimhuab dawb huv.

6 Yog li ntawd tus pov thawj thiaj muab cov ncuav dawb huv rau Daviv, vim yog qhov ntawd tsis muaj lwm yam ncuav, tsuas yog cov ncuav uas xyeem txawb rau ntawm (יחוח)Yahweh lub xubntiag xwb, yog cov uas nyuam qhuav khaws ntawm (יחוח)Yahweh xubntiag los es yuav muab cov tshiab txawb rau tib hnub ntawd.  

7 Hnub ntawd muaj ib tug yawg yog Sha-ul li ib tug qhev nyob qhov ntawd, nws tuaj ua nug rau (יחוח)Yahweh. Nws npe hu ua Dau‑es, yog tibneeg Edoos, yog tus thawj uas yug Sha-ul pab yaj.  

8 Thiab Daviv hais rau Ahimelej tias, koj muaj ib rab ntaj lossis hmuv ntawm koj txhais tes los tsis muaj? Rau qhov kuv tsis coj kuv rab ntaj lossis tej cuab yeej tuaj kiag li, vim vajntxwv tej hauj lwm yog haujlwm ceev.   

9 Tus pov thawj hais tias, Kaulias uas yog tibneeg Filixatees uas koj tua hauv lub hav Elas ntawd rab ntaj nyob ntawm no, tseem qhwv ntaub nrees nyob ntawm lub efauj sab nraud. Yog koj xav tau rab ntaj ntawd kuj coj mus, tsuas yog muaj tib rab ntaj ntawd xwb. Mas Daviv hais tias, tsis muaj ib rab ntaj zoo li rab no lawm. Thov muab rau kuv lauj.  

10 Ces hnub ntawd Daviv txawm sawv kev khiav Sha-ul mus cuag vajntxwv Akhij hauv lub moos Nkas.

11 Mas Akhij cov tub teg tub taws hais tias, tus yawg no tsis yog Daviv uas ua vajntxwv kav lub tebchaws ntawd lov? Lawv tsis tau mus tos hu nkauj seev cev hais tias, Sha-ul tua tau qas txhiab leej, Daviv tua tau qas vam leej, lov?

12 Daviv kuj khaws tej lus no rau hauv nws lub siab thiab ntshai vajntxwv Akhij hauv lub moos Nkas kawg li.

13 Nws thiaj txhob txwm ua ib tug niag tsis thooj li qub rau lawv pom, nws ua txuj ua ib tug tibneeg vwm. Nws lam sau kis kaj kis kua rau ntawm tej rooj loog, thiab ua qaub ncaug nrog zwg ntawm tej hwj txwv.

14 Ces Akhij thiaj hais rau nws cov tub teg tub taws tias, saib maj, nej twb pom tias tus yawg no vwm, nej tseem coj nws tuaj cuag kuv ua abtsi?

15 Kuv tsis muaj tibneeg vwm lov es nej tseem yuav coj tus yawg no tuaj vwm rau ntawm kuv xubntiag? Tsim nyog tus yawg no tuaj rau hauv kuv lub vaj lub tsev lov?