Daviv Nyob Adulas Thiab Mixapes

1 Daviv kuj khiav qhov ntawd mus nyob hauv lub qhov tsua Adulas. Thaum nws cov tijlaug thiab nws txiv tsev neeg sawvdaws tau hnov tej xov ntawd, lawv kuj mus cuag nws qhov ntawd.

2 Txhua tus uas raug kev txom nyem thiab txhua tus uas tshuav nuj tshuav nqi thiab txhua tus uas tsis txaus siab kuj sau zog tuaj nrog nws nyob. Nws ua lawv tus thawj. Muaj tibneeg tuaj nrog nws nyob kwvlam plaub puas leej.

3 Daviv kuj tawm qhov ntawd mus rau lub moos Mixapes hauv Mau‑as tebchaws. Nws hais rau Mau‑as tus vajntxwv tias, thov cia kuv niam kuv txiv nrog koj nyob mus txog thaum kuv paub tias (יחוח)Yahweh yuav ua li cas rau kuv.

4 Ces nws txawm tseg nws niam nws txiv nrog Mau‑as tus vajntxwv nyob mas nkawv nrog vajntxwv nyob mus tag sijhawm uas Daviv nyob hauv lub chaw ruaj khov.

5 Mas pab uas yog xibhwb cev (יחוח)Yahweh lus hais rau Daviv tias, koj tsis txhob nyob hauv qhov chaw ruaj khov no, koj cia li mus rau hauv Yahdah tebchaws. Daviv thiaj tawm mus nyob lub hav zoov Helej.

​

Sha-ul Tua Cov Pov Thawj Hauv Lub Moos Naus 

6 Sha-ul hnov tias muaj tibneeg pom Daviv thiab cov tibneeg uas nrog Daviv ua ke. Thaum ntawd Sha-ul zaum hauv lub moos Kinpe‑as hauv tsob qab ntoo tamalis saum lub pov roob tuav rawv rab hmuv, nws cov tub teg tub taws sawvdaws sawv vij vog nws.  

7 Sha-ul hais rau cov tub teg tub taws uas sawv vij vog nws tias, nej cov tibneeg Npeeyamees cia li mloog kuv hais. Yisais tus tub yuav muab teb thiab vaj txiv hmab rau nej txhua tus lov? Nws yuav tsa nej txhua tus ua thawj kav ib txhiab leej, ib puas leej lov,

8 nej sawvdaws txawm xav ntxeev siab rau kuv? Thaum kuv tus tub nrog Yisais tus tub cog lus sib raug zoo ntawd tsis muaj leejtwg yuav qhia rau kuv paub li. Nej cov tsis muaj ib tug yuav hlub kuv li, thiab tsis qhia rau kuv paub tias kuv tus tub tshum kuv tus tub qhe tawm tsam kuv, tos nrhw kuv kev yam li niaj hnub nimno.

9 Dau‑es uas yog tibneeg Edoos uas sawv ze Sha-ul cov tub teg tub taws thiaj teb tias, kuv pom Yisais tus tub tuaj rau ntawm lub moos Naus tuaj cuag Ahithus tus tub Ahimelej,

10 mas Ahimelej nug (יחוח)Yahweh rau nws thiab pub mov rau nws noj thiab pub Kaulias uas yog tibneeg Filixatees rab ntaj rau nws lawm.

11 Mas vajntxwv txawm tso tib-neeg mus hu pov thawj Ahimelej uas yog Ahithus tus tub thiab nws txiv tsev neeg sawvdaws uas ua pov thawj hauv lub moos Naus kom tuaj, mas sawvdaws thiaj tuaj cuag vajntxwv.

12 Mas Sha-ul hais tias, Ahithus tus tub cia li mloog kuv hais.  Nws teb tias, kuv tus tswv kuv nyob ntawm no os.

13 Mas Sha-ul hais rau nws tias, ua cas koj yuav nrog Yisais tus tub ntxeev siab rau kuv, rau qhov uas koj muab mov thiab ntaj rau nws thiab nug (יחוח)Yahweh rau nws, mas nws thiaj tawm tsam kuv tos nrhw kuv yam li niaj hnub nimno.

14 Mas Ahimelej teb vajntxwv tias, tag nrho koj cov tub teg tub taws xwv nim muaj ib tug twg yuav npuab koj yam li koj tus vauv Daviv uas ua thawj kav cov tub rog uas tsom kwm koj thiab muaj meej hauv koj vaj koj tsev.

15 Hnub no yog thawj zaug uas kuv thov nug (יחוח)Yahweh rau nws lov? Tsis yog.  Thov vajntxwv tsis txhob muab ib yam abtsi los rau txim rau kuv uas yog koj tus tub qhe lossis rau kuv txiv tsev neeg. Rau qhov koj tus tub qhe yeej tsis paub tej no ib nyuag qhov li tsis hais ntau los tsawg.

16 Vajntxwv hais rau Ahimelej tias, koj yuav tuag tiag tiag li, koj thiab koj txiv tsev neeg sawvdaws yuav tuag xwb.  

17 Mas vajntxwv hais rau cov tub rog uas sawv vij vog nws tias, muab ()Yahweh cov pov thawj no tua pov tseg, rau qhov lawv txhais tes nrog Daviv nyob, lawv yeej paub tias Daviv khiav lawm uas lawv tsis qhia rau kuv paub. Tiamsis cov tub teg tub taws tsis kam nqis tes tua (יחוח)Yahweh cov pov thawj.  

18 Mas vajntxiv thiaj hais rau Dau‑es tias, koj cia li nqis tes tua cov pov thawj. Mas Dau‑es uas yog tibneeg Edoos thiaj mus tua cov pov thawj mas hnub ntawd nws tua cov uas hnav lub tsho efauj ntaub mag yim caum tsib leeg.

19 Nws xuas ntaj tua lub moos Naus uas yog cov pov thawj lub moos, tsis hais pojniam txiv neej thiab tej menyuam yaus thiab menyuam uas noj mis thiab tej nyuj tej nees luav thiab tej yaj huvsi.

20 Tiamsis Ahimelej ib tug tub uas yog Ahithus xeeb ntxwv hu ua Anpiyasthas khiav dim thiab raws Daviv qab mus.  

21 Mas Anpiyasthas hais rau Daviv tias, Sha-ul muab (יחוח)Yahweh cov pov thawj tua tag lawm.

22 Daviv hais rau Anpiyasthas tias, hnub ntawd thaum Dau‑es uas yog tibneeg Edoos nyob qhov ntawd, kuv yeej paub tias nws yuav qhia rau Sha-ul xwb xwb li. Yog tim kuv mas koj txiv tsev neeg sawvdaws thiaj li tuag.

23 Cia li nrog kuv nyob tsis txhob ntshai li, rau qhov yog tus uas xav tua koj los kuj xav tua kuv thiab. Koj cia li nrog kuv nyob thiaj li tso siab plhuav.