Daviv Nyob Hauv Khe-ilas Hauv Tebchaws Moj Sab Qhua

1 Lawv hais rau Daviv tias, saib maj, cov Filixatees tab tom ua rog rau lub moos Khe‑ilas thiab lws tej qoob loo uas ntaus tag rau hauv tshav lawm.

2 Daviv txawm nug (יחוח)Yahweh tias, kuv yuav mus ntaus cov Filixatees ntawd los tsis mus? (יחוח)Yahweh hais rau Daviv tias, cia li mus ntaus cov Filixatees ntawd thiab pab cawm lub moos Khe‑ilas kom dim.

3 Tiamsis Daviv cov tibneeg hais rau Daviv tias, peb nyob hauv Yahdah no peb twb ntshai kawg li lawm.  Yog peb tseem mus rau Khe‑ilas es ua rog rau Filixatees cov tub rog thiab, mas peb yuav yimhuab ntshai heev kaj.  

4 Ces Daviv thiaj rov nug (יחוח)Yahweh dua mas (יחוח)Yahweh teb nws tias, cia li sawv tsees mus lawm nram Khe‑ilas ntag, rau qhov kuv yuav muab cov Filixatees rau hauv koj txhais tes.

5 Mas Daviv thiab nws cov tibneeg thiaj li mus nram Khe‑ilas, mus ua rog rau cov Fili-xatees, txeeb lawv tej tsiaj txhu rov los thiab tua cov Filixatees tuag coob kawg li.  Ua li no Daviv thiaj pab tau cov tibneeg Khe‑ilas dim.

6 Mas thaum uas Ahimelej tus tub Anpiyas-thas khiav mus cuag Daviv hauv lub moos Khe‑ilas ntawd, nws nqa lub efauj mus thiab.  

7 Muaj tibneeg mus hais rau Sha-ul tias, Daviv tuaj rau ntawm Khe‑ilas lawm, mas Sha-ul txawm hais tias, (יחוח)Yahweh muab nws rau hauv kuv txhais tes lawm, rau qhov nws twb nkag mus rau hauv lub moos uas muaj rooj loog thiab muaj las rooj kaw huvsi, kuj yog nws muab nws kaw cia rau hauv.

8 Sha-ul thiaj hu tag nrho nws cov tub rog tuaj mus ua rog, kom lawv mus nram Khe‑ilas mus vij puav Daviv thiab nws cov tibneeg.

9 Daviv paub tias Sha-ul ntaus tswv yim phem rau nws, nws thiaj hais rau pov thawj Anpiyasthas tias, coj lub efauj los ntawm no.

10 Daviv thiaj hais tias, Au (יחוח)Yahweh uas yog cov Ixayees Tus Tswv, kuv uas yog koj tub qhe tau hnov tseeb tias Sha-ul nrhiav kev tuaj rau Khe‑ilas ua kom lub moos no puam tsuaj vim yog tim kuv.

11 Mas cov tibneeg Khe‑ilas yuav muab kuv cob rau hauv Sha-ul txhais tes lov? Sha-ul yuav tuaj raws li uas kuv uas yog koj tus tub qhe tau hnov lov? Au (יחוח)Yahweh uas yog cov Ixayees Tus Tswv, thov koj hais rau kuv uas yog koj tus tub qhe paub lauj.  Mas (יחוח)Yahweh hais tias, nws yuav tuaj tiag.

12 Daviv thiaj hais tias, cov tibneeg Khe‑ilas yuav muab kuv thiab kuv cov tibneeg cob rau hauv Sha-ul txhais tes lov? Mas (יחוח)Yahweh hais tias, lawv yuav muab nej cob rau tiag.

13 Mas Daviv thiab nws cov tibneeg muaj kwvlam rau pua leej thiaj sawv tsees khiav tawm hauv Khe‑ilas lawm, lawv kuj mus li uas lawv mus tau. Thaum muaj tibneeg mus hais rau Sha-ul tias Daviv twb khiav tawm hauv Khe‑ilas lawm, Sha-ul kuj tseg tsis mus lawm.  

14 Daviv nyob rau hauv tebchaws moj sab qhua hauv tej qhov chaw uas ruaj khov pem toj siab hauv tebchaws moj sab qhua Xis.  Mas Sha-ul niaj hnub nrhiav Daviv tiamsis (יחוח)Yahweh tsis muab Daviv rau hauv Sha-ul txhais tes.

15 Thaum Daviv pom tias Sha-ul tawm tuaj nrhiav txov nws txojsia, nws nyob hauv tebchaws moj sab qhua Xis ntawm Haulej.

16 Mas Sha-ul tus tub Yahnathas sawv tsees mus cuag Daviv ntawm Haulej thiab txhawb nws lub zog kom muaj zog rau hauv (יחוח)Yahweh.

17 Nws hais rau Daviv tias, tsis txhob ntshai, kuv txiv Sha-ul txhais tes yuav ua tsis tau li cas rau koj. Koj yuav tau ua vajntxwv kav cov Ixayees, kuv yuav ua tus uas loo ntawm koj. Kuv txiv Sha-ul yeej paub li no lawm.

18 Yahnathas thiab Daviv nkawv thiaj cog lus sib raug zoo tab meeg (יחוח)Yahweh. Daviv tseem nyob ntawm Haulej, Yah-nathas rov qab mus tsev.

19 Cov tibneeg Xis mus hais rau Sha-ul ntawm Kinpe‑as tias, Daviv khiav nkaum rau hauv peb nruab nrab mus nyob hauv lub chaw ruaj khov ntawm Haulej, saum lub ncov roob Hakhilas uas nyob nram qab moos Yesimoos lawm.

20 Au vajntxwv, cia li tuaj raws li koj siab xav ces peb cov yuav muab nws cob rau hauv koj txhais tes ntag.

21 Mas Sha-ul hais tias, thov (יחוח)Yahweh foom koob hmoov rau nej rau qhov nej txhawj txog kuv.

22 Cia li mus tshuaj saib zoo zoo kom paub tias nws nyob qhov twg thiab leejtwg pom nws qhov ntawd, rau qhov muaj tibneeg hais rau kuv tias nws ntse heev.

23 Vim li no ua tib zoo mus tshuaj saib txhua qhov uas nws nkaum mam rov qab los qhia tseeb tseeb rau kuv.  Mas kuv mam nrog nej mus. Yog nws tseem nyob hauv lub tebchaws, kuv yuav tshawb nrhiav nws hauv txhua cum Yahdah.

24 Lawv thiaj sawv kev ua Sha-ul ntej mus rau nram Xis. Daviv thiab nws cov tibneeg nyob hauv tebchaws moj sab qhua Ma‑oos uas nyob hauv Alanpas nram qab moos Yesimoos.

25 Sha-ul thiab nws cov tub rog kuj mus nrhiav Daviv.  Muaj tibneeg qhia rau Daviv, mas Daviv thiaj khiav mus rau nram lub pob tsuas thiab nyob hauv tebchaws moj sab qhua Ma‑oos. Thaum Sha-ul hnov li ntawd, nws thiaj caum Daviv qab rau hauv tebchaws moj sab qhua Ma‑oos.

26 Sha-ul mus txog ib sab roob, Daviv thiab nws cov tibneeg mus dua rau ib sab roob.  Daviv kuj maj nroos khiav Sha-ul rau qhov Sha-ul thiab nws cov tub rog tuaj ze Daviv thiab nws cov tibneeg lawm yuav ntes nws.

27 Tiamsis muaj ib tug xa xov tuaj hais rau Sha-ul tias, cia li maj nroos rov qab, vim yog cov Filixatees txhij rog tuaj lws lub tebchaws lawm.

28 Sha-ul thiaj tseg tsis caum Daviv rov qab mus ua rog rau cov Filixatees. Lawv thiaj hu qhov chaw ntawd hais tias, Roob Zeb Ncaim Kev.

29 Mas Daviv thiaj tawm qhov ntawd mus nyob tej chaw ruaj khov hauv Eekedis.