Daviv Tseg Sha-ul Txojsia

1 Thaum Sha-ul mus caum cov Filixatees rov qab los, muaj tibneeg hais rau nws tias, Daviv nyob hauv tebchaws moj sab qhua Eekedis.

2 Ces Sha-ul txawm xaiv peb txhiab leej tub rog hauv cov Ixayees sawvdaws coj mus nrhiav Daviv thiab nws cov tibneeg rau ntawm Roob Tsuas Sai.

3 Sha-ul tuaj txog ib lub nkuaj yaj ntawm ntug kev.  Muaj ib lub qhov tsua nyob qhov ntawd ces Sha-ul txawm mus tawm rooj rau hauv. Daviv thiab nws cov tibneeg kuj nyob hauv lub qhov tsua ntawd tom qhov kawg nkaus.

4 Daviv cov tibneeg hais rau Daviv tias, hnub no yog hnub uas (יחוח)Yahweh hais rau koj tias, kuv muab koj tus yeeb ncuab cob rau hauv koj txhais tes, mas koj yuav ua rau nws raws li koj pom zoo.  Mas Daviv sawv nyas twjywm mus txiav Sha-ul lub qab tsho.

5 Dhau ntawd Daviv kuj tu siab rau qhov uas nws txiav Sha-ul lub qab tsho.

6 Daviv thiaj hais rau nws cov tibneeg tias, thov (יחוח)Yahweh tav tsis txhob kheev kuv tsa tes tawm tsam li no rau kuv tus tswv uas (יחוח)Yahweh tsa cia lawd, rau qhov nws yog tus uas (יחוח)Yahweh hliv roj tsa cia.   

7 Daviv kuj hais tej lus no cheem nws cov tibneeg, nws tsis kheev lawv ntaus Sha-ul. Sha-ul kuj sawv tsees tawm hauv qhov tsua taug kev mus lawm.

8 Dhau ntawd Daviv kuj sawv tsees tawm hauv qhov tsua mus thiab hu rau Sha-ul tias, Au vajntxwv uas yog kuv tus tswv. Thaum Sha-ul tig los saib, Daviv txawm khoov ntshis rau hauv cov av pe.

9 Daviv hais rau Sha-ul tias, ua cas koj yuav mloog tej lus uas cov tibneeg hais tias, Daviv nrhiav kev yuav txov koj?  

10 Saib maj, hnub no koj qhov muag twb pom tseeb lawm tias (יחוח)Yahweh muab koj cob rau hauv kuv txhais tes hauv lub qhov tsua no. Muaj qee leej hais kom kuv muab koj tua pov tseg, tiamsis kuv tseg koj txojsia cia. Kuv hais tias, kuv yuav tsis tsa tes tawm tsam kuv tus tswv, rau qhov nws yog tus uas (יחוח)Yahweh hliv roj tsa cia lawm.

11 Kuv txiv, koj cia li saib koj lub qab tsho uas nyob hauv kuv txhais tes no. Qhov uas kuv txiav koj lub qab tsho tiamsis kuv tsis tua koj, mas koj cia li paub thiab pom tias kuv txhais tes tsis tau ua txhaum thiab tsis ntxeev siab rau koj. Txawm yog koj caum kuv yuav txov kuv txojsia los kuv tsis tau ua txhaum rau koj.

12 Thov (יחוח)Yahweh txiav txim rau kuv thiab koj saib leejtwg txhaum. Qhov uas koj ua txhaum rau kuv, thov (יחוח)Yahweh ua pauj rau koj. Kuv txhais tes yuav tsis ua ib yam abtsi rau koj.

13 Ib yam li tej poj koob yawm txwv hais paj lug tias, kev phem yeej tawm hauv tibneeg phem los, tiamsis kuv txhais tes yuav tsis ua ib yam abtsi rau koj.

14 Cov Ixayees tus vajntxwv tawm tuaj caum leejtwg? Koj tuaj caum leejtwg? Caum tus dev uas tuag lawd, caum tus dev mub xwb.

15 Vim li no thov (יחוח)Yahweh tu plaub thiab txiav txim rau kuv thiab koj. Thov nws tshuaj saib thiab hais kuv tshaj plaub thiab cawm kuv dim hauv koj txhais tes.  

16 Thaum Daviv hais tej lus no rau Sha-ul tag lawd, Sha-ul hais tias, kuv tus tub Daviv es, ntawm kod yog koj lub suab tiag lov? Sha-ul txawm tsa suab hlo quaj. 17 Nws hais rau Daviv tias, koj ua ncaj dua kuv, vim koj ua qhov zoo pauj kuv, tiamsis kuv ua qhov phem pauj koj.

18 Koj twb piav hnub no hais tias koj ua zoo li cas rau kuv, koj tsis tua kuv txojsia rau thaum (יחוח)Yahweh muab kuv cob rau hauv koj txhais tes.

19 Yog leejtwg ntsib nws tus yeeb ncuab, nws yuav tso tus yeeb ncuab dim dawb tso siab plhuav lov? Yog li no thov (יחוח)Yahweh ua zoo rau koj pauj qhov uas hnub no koj tau ua zoo rau kuv.

20 Nimno kuv paub tseeb tias koj yuav tau ua vajntxwv tiag tiag li thiab cov Ixayees lub tebchaws yuav raug muab rau hauv koj txhais tes kav mus li.

21 Yog li no cia li tuav (יחוח)Yahweh lub npe cog lus twv rau kuv tias, thaum kuv tuag lawd koj yuav tsis txiav kuv caj ces pov tseg thiab koj yuav tsis rhuav kuv lub npe kom ploj hauv kuv txiv caj ces.

22 Daviv kuj cog lus twv rau Sha-ul li ntawd ces Sha-ul txawm rov mus tsev, tiamsis Daviv thiab nws cov tibneeg nce mus rau hauv lub chaw ruaj khov.