Daviv Thiab Tus Pojniam Anpikayis

1 Ces Xamuyees txawm tuag. Cov Ixayees sawvdaws tuaj ua ke quaj ntsuag thiab muab nws faus ntawm nws lub tsev hauv lub moos Lamas. Daviv txawm sawv kev mus rau nram tebchaws moj sab qhua Palas.

2 Muaj ib tug yawg nyob hauv lub moos Ma‑oos muaj haujlwm ntawm lub moos Khamees. Tus yawg ntawd nplua nuj heev, nws muaj peb txhiab tus yaj thiab ib txhiab tus tshis.  Nws tab tom txiav plaub yaj hauv Khamees.

3 Tus yawg ntawd npe hu ua Nanpas, nws tus pojniam hu ua Anpikayis. Tus poj niam ntawd ntse heev thiab zoo nkauj, tiamsis tus txiv ntawd mas tsiv ncauj tsiv lus thiab cuaj khaum. Nws yog Khalej caj ces.

4 Daviv nyob hauv tebchaws moj sab qhua hnov tias Nanpas tab tom txiav plaub yaj.

5 Daviv thiaj txib kaum tus tub hluas thiab hais rau cov hluas ntawd tias, cia li mus rau hauv lub moos Khamees mus cuag Nanpas thiab coj kuv cov lus mus hais rau nws.

6 Nej cia li hais tej lus no rau nws tias, koj thiab koj tsev neeg tsuas muaj uas noj qab nyob zoo, txhua yam uas yog koj li tsuas muaj uas noj qab nyob zoo.  

7 Kuv hnov tias koj muaj tibneeg txiav plaub yaj. Koj cov tibneeg txiav plaub yaj nrog peb nyob, thiab peb tsis tau ua phem rau lawv li thiab lawv tsis tu ncua ib yam abtsi rau thaum lawv nyob hauv Khamees.

8 Koj nug koj cov hluas ntawd, lawv yuav qhia rau koj.  Vim li no thov koj hlub kuv cov hluas, rau qhov peb tuaj rau hnub uas npaj noj npaj haus.  Thov koj pub tej uas koj muaj ntawm tes rau peb uas yog koj cov tub qhe thiab pub rau koj tus tub Daviv.

9 Thaum Daviv cov tub hluas tuaj txog, lawv kuj hais Daviv cov lus ntawd rau Nanpas, ces lawv txawm nyob tos.  

10 Nanpas teb Daviv cov hluas tias, Daviv yog leejtwg? Yisais tus tub yog leejtwg? Ntu no tej qhev khiav ntawm lawv tus lospav coob heev.

11 Tsim nyog kuv yuav muab kuv tej ncuav, tej dej, thiab tej nqaij uas kuv tua rau kuv cov tibneeg txiav plaub yaj noj pub rau cov tibneeg uas tuaj qhovtwg tuaj kuv tsis paub lov?

12 Daviv cov tub hluas txawm tig kiag rov los thiab piav tej ntawd huvsi rau Daviv.

13 Daviv thiaj hais rau nws cov tibneeg tias, txhua tus cia li ris ntaj ntawm duav. Ces txhua tus txawm ris ntaj. Daviv kuj ris ntaj thiab. Muaj tibneeg nrog Daviv mus kwvlam plaub puas leej, tseg ob puas leej zov tej nra.

14 Muaj ib tug tub hluas mus hais rau Anpika-yis uas yog Nanpas tus pojniam tias, saib nawj, Daviv tso tibneeg xa xov hauv tebchaws moj sab qhua tuaj hais lus zoo rau peb tus lospav, tiamsis nws ua nyaum heev rau lawv.

15 Cov tibneeg ntawd tau ua zoo rau peb ntau heev. Peb tsis raug xwm txheej phem abtsi li thiab peb tsis tu ncua ib yam abtsi rau thaum peb nrog lawv nyob hauv tshav zaub.

16 Lawv zoo yam nkaus li lub ntsa loog thaiv peb nruab hnub hmo ntuj tag txhua lub sijhawm uas peb nrog lawv nyob yug yaj.

17 Nimno thov koj paub tej no thiab xav saib koj yuav ua li cas, rau qhov lawv yeej txiav txim siab yuav ua nruj ua tsiv rau peb tus lospav lawm thiab ua rau nws tsev neeg huvsi lawm. Peb tus lospav yog tibneeg tsiv ncauj tsiv lus, leejtwg hais tsis tau li.

18 Ces Anpikayis txawm maj nroos muab ob puas lub ncuav thiab ob lub hnab tawv cawv txiv hmab thiab tsib tug yaj cov nqaij uas npaj tau lawd thiab tsib xe‑as qeb kib thiab ib puas rev txiv hmab qhuav thiab ob puas daim ncuav txiv cev rau nees luav thauj.

19 Nws hais rau nws cov tub qhe tias, cia li ua ntej mus, kuv yuav raws nej qab. Tiamsis nws tsis qhia rau nws tus txiv Nanpas paub.

20 Thaum nws caij nees luav tuaj, muaj ib lub roob thaiv lawm, Daviv thiab nws cov tibneeg kuj taug kev tuaj mas Anpikayis ntsib nthav lawv.

21 Daviv twb hais cia lawm tias, kuv twb zov tus yawg ntawd txhua yam hauv tebchaws moj sab qhua dawb dawb xwb.  Nws tej qhov txhia chaw tsis ploj ib yam abtsi li, los nws tseem ua phem pauj kuv tej kev zoo.

22 Yog tagkis sawv ntxov, kuv tseem tseg nws cov tibneeg ib tug txivneej ciaj sia, kuj thov (יחוח)Yahweh ua ib yam li ntawd thiab nyhav dua rau kuv.

23 Thaum Anpikayis pom dheev Daviv, nws nqis plhuav saum nees luav los thiab pe khwb ti nkaus av rau ntawm Daviv xubntiag.

24 Nws pe ntawm Daviv kotaw thiab hais tias, yawg hlob, lub txim no cia kuv ib leeg ris.  Thov cia koj tus nkauj qhe piav rau koj mloog, thov koj mloog kuv uas yog koj tus nkauj qhe tej lus.

25 Thov koj uas yog kuv tus tswv tsis txhob quav ntsej Nanpas uas tsiv ncauj tsiv lus ntawd.  Nws phim nkaus nws lub npe uas hu ua Nanpas, nws thiaj li ruam. Tiamsis kuv uas yog koj tus nkauj qhe tsis pom cov tub hluas uas koj txib tuaj ntawd.

26 Vim li no, yawg hlob, muaj (יחוח)Yahweh uas muaj txojsia nyob pom thiab muaj koj uas muaj txojsia nyob pom, (יחוח)Yahweh tswj tsis kheev koj ua txhaum uas tsa koj txhais tes ua pauj, ua rau lwm tus los ntshav, vim li no thov cia koj cov yeeb ncuab thiab cov uas nrhiav kev ua phem rau koj raug ib yam li Nanpas.

27 Tej uas koj tus tub qhe coj tuaj pub rau koj uas yog kuv tus tswv no, thov muab rau cov hluas uas nrog koj ua ke.

28 Thov zam txim rau koj tus tub qhe lauj. (יחוח)Yahweh yeej yuav ua kuv tus tswv caj ces kom nyob ruaj khov, vim yog koj ua rog rau (יחוח)Yahweh tej yeeb ncuab, mas thaum koj tseem muaj txojsia nyob, yuav nrhiav tsis tau ib qho kev txhaum nyob hauv koj.  

29 Yog muaj tibneeg sawv tsees caum txov koj txojsia los koj txojsia yuav raug muab khi nkaus nrog cov uas muaj txojsia nyob ua ke rau (יחוח)Yahweh uas yog koj Tus Tswv tsom kwm. Tiamsis koj cov yeeb ncuab txojsia yuav raug muab laim pov tseg ib yam li lub qe zeb uas raug muab laim tawm hauv txoj hlua fiav.

30 Thaum (יחוח)Yahweh ua raws li txhua yam zoo uas nws tau hais cia rau koj lawm thiab tsa koj ua tus thawj kav kiag cov Ixayees,

31 yuav tsis muaj ib yam abtsi ua rau kuv tus tswv ntxhov siab nyuaj siab, rau qhov uas koj tau ua rau tej tibneeg tsis txhaum los ntshav thiab koj ua pauj koj ib leeg. Thaum (יחוח)Yahweh ua zoo rau kuv tus tswv lawd, thov koj nco txog kuv uas yog koj tus nkauj qhe thiab.

32 Daviv thiaj hais rau Anpikayis tias, qhuas (יחוח)Yahweh uas yog cov Ixayees Tus Tswv uas txib koj tuaj ntsib kuv hnub no.

33 Thov cia koj txojkev ntse tau hmoov zoo thiab thov kom koj tus kheej tau koob hmoov rau qhov hnub no koj tau tswj tsis kheev kuv ua txhaum uas tsa kuv txhais tes ua pauj rau kuv tus kheej, ua rau lwm tus los ntshav.

34 Muaj (יחוח)Yahweh uas yog cov Ixayees Tus Tswv muaj txojsia nyob pom, nws yog tus uas tswj kuv tsis pub kuv ua phem rau koj. Yog koj tsis tau maj nroos tuaj ntsib kuv, tagkis sawv ntxov yeej yuav tsis tshuav ib tug txivneej rau Nanpas kiag li.

35 Ces Daviv txawm txais txhua yam uas Anpikayis coj tuaj thiab hais rau nws tias, cia li rov qab mus zoo rau koj vaj koj tsev lauj.  Kuv twb mloog koj tej lus thiab kuv yuav ua raws li uas koj thov kuv.

36 Anpikayis txawm rov mus rau ntawm Nanpas, ua ciav nws tab tom noj haus loj hauv tsev yam nkaus li tej vajntxwv noj. Nanpas kuj zoo siab heev, vim nws qaug cawv heev. Mas Anpikayis tsis hais abtsi rau nws paub mus txog tagkis kaj ntug.  

37 Tagkis sawv ntxov thaum cawv txiv hmab xam tag hauv Nanpas lawm, nws tus pojniam li piav tej xwm txheej ntawd rau nws mloog, ces nws lub plawv cia li tsis ua haujlwm, nws zoo li lub pob zeb lawm.

38 Nyob tau kwvlam kaum hnub (יחוח)Yahweh ua rau Nanpas tuag lawm.

39Thaum Daviv hnov tias Nanpas tuag lawm, nws txawm hais tias, qhuas (יחוח)Yahweh uas ua pauj rau qhov uas Nanpas saib tsis taus kuv, thiab tswj tsis kheev kuv ua phem. (יחוח)Yahweh pauj qhov uas Nanpas ua phem kom poob rov rau saum nws taubhau. Ces Daviv txawm tso tibneeg mus hais Anpikayis kom los ua nws tus pojniam.

40 Thaum Daviv cov tub teg tub taws tuaj txog Anpikayis hauv lub moos Khamees, lawv hais rau nws tias, Daviv txib peb tuaj coj koj mus ua nws poj niam.

41 Anpikayis txawm sawv tsees khoov ntshis rau hauv av thiab hais tias, saib maj, kuv uas yog nej tus nkauj qhe zoo siab ua qhev ntxuav kuv tus tswv tej tub qhe kotaw.  

42 Anpikayis kuj maj nroos sawv tsees caij ib tug nees luav thiab nws tsib tug nkauj qhe nrog Daviv cov tibneeg mus thiaj tau mus ua Daviv pojniam. 

43 Daviv kuj yuav Ahinau‑as uas yog tibneeg hauv lub moos Yile‑ees thiab.  

44 Sha-ul muab nws tus ntxhais Mikhas uas yog Daviv pojniam qua ib tom rau La‑is tus tub Patis hauv lub moos Kalis lawm.