Daviv Tseg Sha-ul Siav Zaum Ob

1 Cov tibneeg hauv lub moos Xis tuaj hais rau Sha-ul hauv lub moos  Kinpe‑as tias, Daviv khiav nkaum saum lub roob Hakhilas uas ncaj lub moos Yesimoos.

2 Ces Sha-ul txawm sawv tsees mus rau hauv tebchaws moj sab qhua Xis, thiab tej tub rog uas nws xaiv cia lawd peb txhiab leej nrog nws mus nrhiav Daviv hauv tebchaws moj sab qhua Xis.

3 Sha-ul ua yeej rau ntawm ntug kev saum lub roob Hakhilas uas ncaj lub moos Yesimoos. Tiamsis Daviv nyob hauv teb chaws moj sab qhua. Thaum nws paub tias Sha-ul tuaj nrhiav nws hauv tebchaws moj sab qhua,

4 nws txawm tso tibneeg mus tshuaj saib thiaj paub tias Sha-ul tuaj lawm tiag.

5 Ces Daviv txawm sawv tsees mus rau ntawm lub chaw uas Sha-ul ua yeej nyob, thiab Daviv pom lub chaw uas Sha-ul thiab tus thawj rog Anaws uas yog Naws tus tub pw. Sha-ul pw rau hauv plawv yeej thiab nws cov tub rog ua chaw nyob vij ib ncig nws.  

6 Mas Daviv hais rau Ahimelej uas yog tibneeg Hithais thiab hais rau Anpisais uas yog Xeluyas tus tub thiab yog Yau‑as tus kwv hais tias, leejtwg yuav nrog kuv nqis mus rau hauv Sha-ul lub yeej? Mas Anpisais hais tias, kuv yuav nrog koj mus.

7 Ces hmo ntawd Daviv thiab Anpisais txawm mus rau hauv Sha-ul cov tub rog. Ua ciav Sha-ul pw tsaug zog hauv lub plawv yeej, nws rab hmuv rhais rau hauv av ntawm nws taubhau. Anaws thiab cov tub rog pw vij puag ncig Sha-ul.

8 Anpisais hais rau Daviv tias, hnub no (יחוח)Yahweh muab koj tus yeeb ncuab cob rau hauv koj txhais tes lawm. Nimno cia kuv xuas hmuv nkaug ib hmuv teem nkaus rau hauv av xwb tsis txog nkaug ob zaug.  

9 Tiamsis Daviv hais rau Anpisais tias, tsis txhob txov nws kiag li, rau qhov leejtwg yuav tsa tes tawm tsam tus uas (יחוח)Yahweh hliv roj tsa cia lawd es tsis txhaum?

10 Thiab Daviv hais tias, muaj (יחוח)Yahweh uas muaj txojsia nyob pom, (יחוח)Yahweh yeej yuav tua nws, lossis nws yuav tuag vim yog lub caij tuag lossis nws yuav mus ua rog li tuag.

11 Thov (יחוח)Yahweh tav tsis txhob kheev kuv tsa tes tawm tsam tus uas (יחוח)Yahweh tsa cia lawd. Nimno cia li muab nws rab hmuv ntawm nws taubhau thiab lub taub dej es wb mus.

12 Daviv txawm muab rab hmuv thiab lub taub dej ntawm Sha-ul taubhau ces nkawv txawm mus lawm tsis muaj leejtwg pom, tsis muaj leejtwg paub li, tsis muaj ib tug tsim, rau qhov lawv txhua tus tsaug zog heev vim yog (יחוח)Yahweh ua rau lawv tsaug zog heev.  

13 Ces Daviv txawm hla mus rau sab tim ub, mus sawv saum lub ncov roob deb deb, muaj ib lub hav quas.

14 Daviv hu nrov nrov rau cov tub rog thiab rau Anaws uas yog Naws tus tub hais tias, Anaws es, koj tsis teb lov? Anaws teb tias, leejtwg hu vajntxwv ne?

15 Daviv teb Anaws tias, koj tsis yog txivneej lov? Hauv cov Ixayees leejtwg zoo li koj? Ua cas koj tsis zov vajntxwv uas yog koj tus tswv tib zoo? Rau qhov muaj ib tug nkag mus yuav tua vajntxwv uas yog koj tus tswv.  

16 Qhov uas koj ua li no tsis zoo kiag li. Muaj (יחוח)Yahweh uas muaj txojsia nyob pom, koj mas tsim nyog tuag lauj, vim koj tsis zov koj tus tswv tib zoo, yog tus uas (יחוח)Yahweh hliv roj tsa cia. Nimno tshuaj saib vajntxwv rab hmuv thiab lub taub dej ntawm nws taub hau dua twg lawm.

17 Sha-ul cim tau Daviv lub suab, nws thiaj hais tias, kuv tus tub Daviv es, no yog koj lub suab ntag lov? Daviv teb tias, Au vajntxwv uas yog kuv tus tswv, yog kuv lub suab ntag mas.

18 Thiab nws hais tias, ua cas kuv tus tswv yuav caum kuv uas yog koj tus tub qhe? Kuv tau ua li cas? Kuv txhais tes tau ua txhaum abtsi?

19 Nimno thov vajntxwv uas yog kuv tus tswv mloog kuv uas yog koj tus tub qhe tej lus. Yog (יחוח)Yahweh tshum koj lub siab ua kom koj tawm tsam kuv, thov cia (יחוח)Yahweh txais yuav tej qhov txhia chaw uas muab xyeem. Tiamsis yog tibneeg tshum koj no ces thov cia lawv raug foom tsis zoo rau ntawm (יחוח)Yahweh xub ntiag. Hnub no lawv tau ntiab kuv tawm kuv thiaj tsis muaj feem tau (יחוח)Yahweh qub txeeg qub teg thiab lawv hais tias, cia li mus ua koom tu luag tej dab.

20 Vim li no nimno thov tsis txhob cia kuv tej ntshav poob deb ntawm (יחוח)Yahweh xub ntiag. Cov Ixayees tus vajntxwv tawm tuaj nrhiav tib tug dev mub txojsia, yam li tus uas mus raws yij saum roob.

21 Ces Sha-ul hais tias, kuv tau ua txhaum lawm lauj. Kuv tus tub Daviv, cia li rov qab los, kuv yuav tsis ua phem rau koj dua li lawm, rau qhov hnub no koj saib kuv txojsia tsim txiaj. Kuv ua zoo nkaus li tej tibneeg ruam xwb thiab ua txhaum loj kawg li.

22 Mas Daviv teb tias, Au vajntxwv, koj rab hmuv nyob ntawm no.  Koj cia li txib ib tug hluas tuaj coj rov qab mus.

23 (יחוח)Yahweh pub nqi zog rau txhua tus raws li lawv txojkev ncaj ncees thiab qhov uas lawv lub siab xib rau (יחוח)Yahweh.  Hnub no (יחוח)Yahweh muab koj cob rau hauv kuv txhais tes lawm tiamsis kuv tsis tsa kuv txhais tes tawm tsam tus uas (יחוח)Yahweh hliv roj tsa cia lawd.  

24 Hnub no kuv saib koj txojsia tsim txiaj li cas, kuj thov (יחוח)Yahweh saib kuv txojsia tsim txiaj ib yam li ntawd, thiab thov (יחוח)Yahweh cawm kuv dim hauv txhua txojkev ceeblaj ntxhov siab.

25 Ces Sha-ul hais rau Daviv tias, kuv tus tub Daviv, thov (יחוח)Yahweh foom koob hmoov rau koj. Koj yuav ua tau ntau yam thiab ua kom tiav. Daviv txawm mus lawm, Sha-ul rov qab mus tsev.