Daviv Nrog Cov Filixatees Nyob

1 Daviv xav hauv lub siab tias, muaj ib hnub twg ntshai kuv yuav tuag rau Sha-ul txhais tes xwb. Qhov zoo tshaj ces cia kuv khiav mus nyob hauv cov Filixatees teb chaws, Sha-ul thiaj tsis muaj siab nrhiav kuv hauv Ixayees tebchaws thiab kuv thiaj dim nws txhais tes.

2 Daviv txawm sawv tsees coj rau pua leej uas nrog nws ua ke khiav hla mus cuag Ma‑aus tus tub Akhij uas ua vajntxwv hauv lub moos Nkas.  

3 Mas Daviv thiab nws cov tibneeg uas nrog nws ua ke thiab lawv txhua tsev neeg kuj nrog Akhij nyob hauv lub moos Nkas. Daviv ob tug pojniam yog Ahinau‑as uas yog tibneeg Yile‑ees, thiab Anpikayis uas yog Nanpas hauv Khamees tus pojniam uas ua poj ntsuam lawm, mus thiab.

4 Thaum muaj tibneeg mus hais rau Sha-ul tias, Daviv khiav mus rau lub moos Nkas lawm, Sha-ul txawm tsis nrhiav Daviv li lawm.

5 Daviv thiaj hais rau Akhij tias, yog koj txaus siab rau kuv mas thov koj muab ib qho chaw hauv tej zej zog rau kuv nyob. Ua cas yuav cia koj tus tub qhe nrog koj nyob hauv vajntxwv lub nroog no?  

6 Ces hnub ntawd Akhij txawm muab lub moos Xilaj pub rau nws.  Xilaj thiaj poob ua vajntxwv Yahdah li moos los txog niaj hnub nimno.

7 Lub sijhawm uas Daviv mus nyob hauv cov Filixatees tebchaws ntawd yog ib xyoos thiab plaub lub hlis.

8 Daviv thiab nws cov tibneeg kuj mus ntaus cov tibneeg Kesus, cov tibneeg Kexaws thiab cov Amalej uas yog cov qub tibneeg uas ib txwm nyob hauv lub tebchaws ntawd, ntaus mus txog lub moos Saws mus txog ntua Iziv tebchaws.

9 Daviv ntaus lub tebchaws ntawd tsis tseg tej txivneej tej pojniam ciaj sia li, thiab txeeb tej yaj tej nyuj tej nees luav tej ntxhuav tej tsoos tsho li rov los rau Akhij.

10 Thaum Akhij nug tias hnub no koj mus lws leejtwg los? Daviv teb tias, mus lws Nekes uas yog Yahdah li, lossis mus lws Nekes uas yog cov Yelame‑ees li, lossis mus lws Nekes uas yog cov Khenais li.

11 Daviv yeej tsis tseg txivneej pojniam siav li tsis tso ib tug los rau hauv lub moos Nkas li, nws xav tias, tsam ces lawv yuav hais txog peb cov tias, Daviv tau ua li ub li no. No yog tej uas nws pheej ua tag lub sijhawm uas nws nyob hauv cov Filixatees tebchaws.

12 Akhij tso siab rau Daviv, nws xav tias, Daviv twb ua rau cov Ixayees uas yog nws haiv neeg ntxub nws kawg li lawm. Vim li no nws yuav ua tau kuv tus tub qhe mus li ib sim neej.