1 XAMUYEES 29

Cov Filixatees Tsis Tso Siab Rau Daviv

1 Cov Filixatees txhij cov tub rog huvsi tuaj rau ntawm Afes, mas cov Ixayees ua yeej rau ntawm lub hauv dej txhawv ntawm lub moos Yile‑ees.

2 Thaum Filixatees cov thawj coj tej pab tub rog uas ib puas leej, ib txhiab leej hla mus mas Daviv thiab nws cov tibneeg kuj ua pab tom qab uas nrog Akhij ua ke.

3 Filixatees cov thawj rog hais tias, cov tibneeg Hinplus tuaj ua abtsi ntawm no? Mas Akhij hais rau Filixatees cov thawj rog tias, no yog Daviv, uas yog cov Ixayees tus vajntxwv Sha-ul li ib tug tub teg tub taws, nws twb nrog kuv nyob tsheej xyoo lawm.  Txij hnub uas nws khiav tuaj cuag kuv, kuv kuj tsis pom nws muaj ib qho txhaum li txog niaj hnub nimno.

4 Tiamsis Filixatees cov thawj rog chim rau vajntxwv mas lawv rov hais rau vajntxwv tias, cia li xa tus yawg no rov qab mus tsev. Cia nws rov mus nyob rau hauv lub moos uas koj tu rau nws. Tsis txhob kheev nws nrog peb mus ua rog ua ke tsam ces nws ua yeeb ncuab rau peb. Rau qhov nws yuav ua li cas rov mus nrog nws tus vajntxwv sib raug zoo tau? Sub tsis yog muab peb cov tibneeg no taubhau coj mus pauv lov?

5 Tus yawg no twb yog Daviv nev, yog tus uas lawv hu nkauj seev cev hais tias, Sha-ul tua tau qas txhiab leej, Daviv tua tau qas vam leej.

6 Akhij thiaj hu Daviv los hais rau nws tias, muaj (יחוח)Yahweh uas muaj txojsia nyob pom, koj twb ua ncaj ua ncees los lawm. Yog ntawm kuv tug mas kuv pom zoo cia koj nrog kuv mus ua rog, rau qhov kuv tsis pom koj ua ib qho txhaum txij hnub uas koj los nrog kuv nyob txog niaj hnub nimno li. Tiamsis txawm li cas los xij, cov thawj rog tsis nrog kuv pom koj zoo.

7 Ua li no thov koj rov qab mus ua siab tus yees xwv thiaj tsis ua rau Filixatees cov thawj tsis txaus siab.

8 Mas Daviv hais rau Akhij tias, kuv tau ua abtsi? Txij hnub uas kuv los ua koj li haujlwm txog niaj hnub nimno koj pom kuv uas yog koj tus tub qhe ua ib yam abtsi uas yuav tsis tsim nyog kuv mus ua rog rau koj tej yeeb ncuab? Koj yog kuv tus tswv thiab kuv tus vajntxwv.

9 Akhij teb Daviv tias, kuv paub thiab kuv lub qhov muag pom koj tsis ua ib qho txhaum, koj zoo yam nkaus li (יחוח)Yahweh ib tug tub txib saum ntuj. Tiamsis Filixatees cov thawj rog hais tias, tsis txhob kheev nws nrog peb mus ua rog li.

10 Ua li no koj thiab Sha-ul cov tub teg tub taws uas nrog koj tuaj cia li sawv ntxov, mas tagkis thaum pom kev ces cia li rov qab mus.

11 Daviv txawm sawv ntxov nrog nws cov tibneeg rov qab mus rau cov Filixa-tees tebchaws. Tiamsis cov Filixatees mas nce mus pem Yile‑ees.