Daviv Kov Yeej Cov Amalej

1 Tau peb hnub Daviv thiab nws cov tibneeg los txog ntawm Xilaj mas cov Amalej twb mus lws Nekes thiab Xilaj lawm. Lawv kov yeej Xilaj thiab muab hlawv pov tseg,

2 thiab ntes cov pojniam thiab txhua tus uas nyob hauv coj mus, ntes cov laus thiab cov menyuam huvsi. Lawv tsis tua ib tug pov tseg li, lawv muab kuav huvsi taug kev mus.

3 Thaum Daviv thiab nws cov tibneeg los txog ntawm lub moos mas pom lub moos ntawd kub nyhiab lawm, thiab lawv tej poj niam, tej tub, tej ntxhais, kuj raug muab ntes coj tag lawm.

4 Mas Daviv thiab cov tibneeg uas nrog nws kuj tsa suab hlo quaj heev, quaj quaj qaug zog quaj tsis taus lawm.

5 Daviv ob tug pojniam kuj raug muab ntes mus, yog Ahinau‑as uas yog tibneeg Yile‑ees thiab yog Anpikayis uas yog Nanpas hauv Khamees tus pojniam uas ua poj ntsuam.

6 Daviv kuj nyuaj siab kawg li rau qhov cov pejxeem hais zom zaws tias, xuas pob zeb muab nws ntaus. Lawv kuj mob siab kawg li rau lawv tej tub tej ntxhais. Mas Daviv kuj cuab zog hauv (יחוח)Yahweh uas yog nws Tus Tswv.

7 Daviv hais rau pov thawj Anpiyasthas uas yog Ahimelej tus tub tias, coj lub efauj los rau kuv. Anpiyasthas kuj coj lub efauj los rau Daviv.

8 Daviv txawm nug (יחוח)Yahweh tias, kuv yuav mus caum pab tub rog ntawd los tsis mus? Kuv yuav mus caum cuag lawv los tsis cuag? (יחוח)Yahweh teb nws tias, cia li mus caum, koj yeej yuav caum cuag lawv thiab cawm tau lawv.

9 Daviv thiab rau pua leej uas nrog nws thiaj sawv kev mus.  Lawv mus txog lub hav Npexaus, mas cov uas mus tsis taus so qhov ntawd.

10 Daviv thiab plaub puas leej caum mus. Ob puas leej uas qaug zog heev hla tsis taus lub hav Npexaus cia li so qhov ntawd.  

11 Lawv ntsib ib tug tibneeg Iziv tom hav nroj, lawv thiaj coj nws los cuag Daviv. Lawv pub ncuav rau nws noj thiab dej rau nws haus.  

12 Lawv muab ib lub ncuav txiv cev thiab ob re txiv hmab qhuav rau nws noj. Nws noj tag mas thiaj li muaj zog tuaj, vim yog nws tsis tau mov noj tsis tau dej haus tau peb hnub peb hmo lawm.  

13 Mas Daviv nug nws tias, koj yog leejtwg cov tibneeg? Koj tuaj qhovtwg tuaj? Mas nws teb tias, kuv yog ib tug tub hluas Iziv, kuv ua ib tug tibneeg Amalej li qhev. Tau peb hnub lawm kuv muaj mob mas kuv tus lospav muab kuv tso pov tseg.  

14 Peb mus lws Nekes tebchaws thaj uas yog cov Khelethis li thiab yog Yahdah li thiab Nekes uas yog Khalej li.  Mas peb muab lub moos Xilaj hlawv pov tseg.

15 Daviv hais rau nws tias, koj yuav coj kuv kev mus caum kom cuag pab tub rog no los tsis coj? Nws teb tias, thov tuav (יחוח)Yahweh lub npe cog lus twv rau kuv tias koj yuav tsis muab kuv tua pov tseg thiab tsis muab kuv cob rau hauv kuv tus lospav txhais tes, mas kuv yuav coj koj kev mus kom txog pab tub rog ntawd.

16 Thaum nws coj Daviv kev mus txog mas pom lawv nyob puv nkaus ntawm tej tshav puam noj haus thiab dhia seev cev rau qhov uas lawv txeeb tau tej qhov txhia chaw hauv Filixatees tebchaws thiab hauv Yahdah teb chaws los ntau kawg li.

17 Mas Daviv tua lawv thaum tsaus ntuj zuag ib hmos thiab ib hnub tsaus ntuj. Tsis muaj ib tug txivneej khiav dim li, tsuas yog plaub puas tus hluas uas caij ntxhuav thiaj khiav dim xwb.  

18 Daviv thiaj tau tej qhov txhia chaw uas cov Amalej lws mus ntawd huvsi rov qab los thiab Daviv cawm tau nws ob tug pojniam los.

19 Tej uas lawv lws mus lawd, tsis hais laus hluas metub mentxhais mas tsis poob ib yam abtsi li, Daviv muab tau huvsi rov los.  

20 Daviv tseem ntes tau lawv tej niag pab tshis pab yaj thiab tej niag pab nyuj los. Cov pejxeem raws tej tsiaj ntawd ua Daviv ntej mas lawv hais tias, tej no yog tej uas Daviv txeeb tau los.

21 Daviv txawm rov los txog ob puas leej uas qaug zog raws tsis cuag Daviv es Daviv muab tso tseg rau ntawm lub hav Npexaus. Mas cov ntawd kuj tawm mus tos Daviv thiab tos cov tibneeg uas nrog Daviv ua ke. Thaum Daviv los ze cov tibneeg ntawd, nws hais lus zoo rau lawv.

22 Cov tibneeg phem thiab cov tibneeg siab nqaim uas nrog Daviv mus txawm hais tias, vim lawv cov no tsis nrog peb mus mas peb tsis pub tej qhov txhia chaw uas peb mus txeeb tau los rau lawv li, tsuas yog cia lawv nyias coj nyias tej pojniam menyuam mus xwb.

23 Tiamsis Daviv hais tias, kuv cov kwvtij, nej tsis txhob ua li no rau tej uas (יחוח)Yahweh pub rau peb. Nws twb tsom kwm peb cia thiab muab pab tub rog uas tuaj ntaus peb rau hauv peb txhais tes lawm.

24 Qhov no leejtwg yuav mloog nej lub suab? Cov uas nqis mus ntaus rog muaj feem tau li cas ces cov uas nyob zov nra kuj muaj feem tau sib npaug li ntawd thiab. Cia li muab faib sib npaug zos rau sawvdaws.

25 Txij hnub ntawd los Daviv kuj muab qhov no rhawv ua ib txoj kab ke thiab ib txoj kevcai rau cov Ixayees coj los txog niaj hnub nimno.

26 Thaum Daviv los txog lub moos Xilaj lawd, nws kuj xa tej uas nws txeeb tau ntawd ib qho mus rau nws tej phoojywg uas yog cov kev txwj laug hauv Yahdah, thiab hais rau lawv tias, no yog muab ib qho tshav ntuj rau nej, yog tej uas txeeb tau ntawm (יחוח)Yahweh cov yeeb ncuab los.

27 Nws muab rau cov uas nyob hauv Npe‑ees thiab cov uas nyob hauv Lamaus hauv Nekes, thiab cov uas nyob hauv Yathis,

28 thiab Alau‑aws thiab Ximaus thiab Ethemau‑as,

29 thiab Lakhas, thiab cov uas nyob hauv Yelame‑ees cum tej moos thiab hauv cov Khenais tej moos,

30 hauv Haumas thiab Npaulasas thiab Athaj,

31 thiab hauv Henploos, yog muab rau txhua lub chaw uas Daviv thiab nws cov tibneeg tau mus mus los los rau hauv.