Sha-ul Thiab Nws Cov Tub Tuag

(1 Vaj Keeb Kwm. 10:1-12)

1 Cov Filixatees tuaj ua rog rau cov Ixayees, mas cov Ixayees khiav cov Filixatees thiab raug tua tuag rau saum lub roob Kinpau‑as.  

2 Cov Filixatees caum cuag Sha-ul thiab nws cov tub.  Cov Filixatees tua Yahnathas thiab Anpinadas thiab Makhisuvas, uas yog Sha-ul

cov tub tuag tag.

3 Ua rog nyhav heev tuaj ti Sha-ul, cov tub rog tua hneev ntsib Sha-ul, txawm tua raug nws mob heev.  

4 Ces Sha-ul txawm hais rau tus uas nqa nws tej cuab yeej tias, cia li rho ntaj los nkaug kuv kom tshab plaws, ntshai tsam cov uas tsis ua kevcai txiav no tuaj nkaug kuv es saib tsis taus kuv. Tiamsis tus uas nqa nws tej cuab yeej tsis kam nkaug, vim yog ntshai heev. Ces Sha-ul txawm rho kiag nws rab ntaj los cuab es nws khwb nkaus chob kiag rab ntaj ntawd.

5 Thaum tus uas nqa tej cuab yeej pom tias Sha-ul tuag lawm, nws kuj cuab nws rab ntaj khwb nkaus chob nws tuag ua ke thiab.

6 Yog li no Sha-ul thiaj tuag thiab nws peb tug tub thiab tus uas nqa tej cuab yeej thiab Sha-ul cov tibneeg sawvdaws tuag tib hnub ntawd.

7 Thaum cov Ixayees uas nyob lub hav sab tid thiab cov uas nyob ntawm tus dej Yaladees sab hnub tuaj pom Ixayees cov tub rog khiav thiab pom tias Sha-ul thiab nws cov tub tuag tag lawm, lawv txawm tso lawv tej moos tseg khiav tag, mas cov Filixatees los nyob rau hauv.

8 Hnub tom qab thaum cov Filixatees tuaj khaws cov uas raug tua tuag tej cuab yeej mus yuav, lawv pom Sha-ul thiab nws peb tug tub tuag rau saum lub roob Kinpau‑as.

9 Lawv txawm txiav Sha-ul lub taubhau thiab hle nws tej cuab yeej ua rog. Lawv tso tibneeg tshaj xo mus thoob plaws Filixatees tebchaws, coj xov zoo mus piav rau hauv lawv tej tsev teev dab thiab piav rau cov pejxeem.  

10 Lawv muab Sha-ul tej cuab yeej ua rog khaws cia rau hauv lub tsev teev dab Athalaus. Lawv muab Sha-ul lub cev khi dai rau ntawm lub moos Npesas lub ntsa loog.

11 Thaum cov tibneeg hauv lub moos Yanpes Kile‑as hnov tej uas cov Filixatees ua rau Sha-ul lub cev tuag,

12 cov txivneej uas siab loj siab tuab sawvdaws txawm sawv tsees mus ib hmos kaj ntug mus daws Sha-ul lub cev tuag thiab nws peb tug tub cov cev tuag ntawm Npesas lub ntsa loog. Lawv coj los rau ntawm lub moos Yanpes muab hlawv qhov ntawd.

13 Lawv coj cov pob txha mus faus rau hauv tsob qab ntoo tamalis hauv lub moos Yanpes, thiab yoo mov tau xya hnub.