Daviv Hnov Txog Sha-ul Tuag

1 Thaum Sha-ul tuag ntawd, Daviv mus tua cov Amalej rov los thiab so hauv lub moos Xilaj tau ob hnub.

2 Hnub uas peb txawm muaj ib tug yawg tuaj hauv Sha-ul lub yeej tuaj, ris tsho ntuag tag thiab muaj hmoov av saum taubhau. Thaum nws tuaj txog Daviv nws khwb ti nkaus av pe.

3 Daviv hais rau nws tias, koj tuaj qhov twg tuaj? Nws teb tias, kuv dim hauv cov Ixayees lub yeej tuaj.

4 Daviv nug nws tias, qhia rau kuv saib, xwm txheej zoo li cas? Nws teb tias, cov tibneeg khiav hauv tshav rog tag lawm, muaj tibneeg raug tua tuag coob kawg. Sha-ul thiab nws tus tub Yahnathas kuj tuag lawm.

5 Daviv txawm hais rau tus tub hluas uas xa xov ntawd tias, koj paub li cas tias Sha-ul thiab nws tus tub Yahnathas tuag lawm?

6 Tus tub hluas uas xa xov ntawd teb tias, kuv cia li mus txog saum lub roob Kinpau-as ua ciav Sha-ul chob nrees nws rab hmuv, thiab luag tej tsheb ua rog thiab tej tub rog caij nees tuaj yuav txog nws.

7 Thaum nws tig los pom kuv nws txawm hu kuv. Kuv teb tias, kuv nyob ntawm no os.

8 Nws nug kuv tias, koj yog leejtwg? Kuv teb tias, kuv yog tibneeg Amalej.

9 Nws hais rau kuv tias, cia li los sawv ze thiab muab kuv tua. Kuv mob qhuav siab kawg tiamsis kuv txojsia tsis tau tu.

10 Kuv thiaj txav mus ze muab nws tua tseg, rau qhov kuv yeej paub tseeb tias nws twb ntog lawm nws yuav tsis ciaj li. Kuv thiaj hle nws lub mom vajntxwv saum nws taubhau thiab nws lub tooj npab ntawm txhais tes, kuv coj tuaj ntawm no muab rau koj uas yog kuv Tus Tswv.

11 Daviv txawm dua rhe nws lub tsho thiab nws cov tibneeg sawvdaws kuj dua pes rhe tsho ib yam li ntawd.

12 Lawv quaj ntsuag thiab yoo mov mus txog tsaus ntuj rau Sha-ul thiab nws tus tub Yahnathas thiab cov Ixayees, vim yog lawv raug hniav ntaj tuag tag.

13 Mas Daviv hais rau tus hluas uas tuaj hais rau nws ntawd tias, koj tuaj qhov twg tuaj? Nws teb tias, kuv yog lwm haiv neeg tus tub, yog tibneeg Amalej.

14 Daviv hais rau nws tias, ua cas koj tsis ntshai qhov uas tsa tes tua tus uas (יחוח)Yahweh hliv roj tsa cia lawd?

15 Ces Daviv txawm hu ib tug hluas los thiab hais tias, cia li mus muab nws tua pov tseg. Ces nws txawm muab tus yawg ntawd tua pov tseg.

16 Daviv hais rau tus yawg ntawd tias, qhov uas koj tuag kod, koj ris koj cov ntshav, rau qhov koj lub qhov ncauj ua timkhawv tom koj hais tias, kuv tau tua tus uas (יחוח)Yahweh hliv roj tsa cia lawd.

​

Daviv Quaj Ntsuag Txog Sha-ul Thiab Yahnathas

17 Daviv kuj quaj ntsuag txog Sha-ul thiab nws tus tub Yahnathas raws li no.

18 Nws hais kom qhia tej kev quaj ntsuag no rau cov Yahdah.  Mas tej kev quaj ntsuag no kuj muab sau cia rau hauv phau ntawv Yasawm lawm. Daviv hais tias, 19 Ixayees es, nej lub koob meej raug muab tua pov tseg rau saum lub roob siab lawm. Tej txivneej uas siab tuab ntog tuag tag lawm lauj!

20 Tsis txhob piav tej no rau hauv lub moos Nkas, tsis txhob tshaj tawm rau hauv lub moos Akheloos tej kev, ntshai tsam Filixatees tej ntxhais yuav zoo siab, thiab cov uas tsis ua kevcai txiav tej ntxhais yuav zoo siab xyiv fab.

21 Kinpau‑as tej roob es, thov tsis txhob muaj lwg muaj nag rau saum nej, thiab tsis txhob cia tej teb tau qoob loo rau nej, rau qhov tus uas siab tuab daim phiaj hlau qias puas tsuas rau qhov ntawd lawm, yog Sha-ul daim phiaj hlau uas tsis muaj roj pleev dua li lawm.

22 Yahnathas rab hneev tsis tig ntawm tej ntshav uas sib tua kiag li, tsis tig ntawm cov uas siab loj siab tuab tej nqaij, thiab Sha-ul rab ntaj kuj tsis rov los do.

23 Sha-ul thiab Yahnathas, uas ntxim hlub thiab zoo kawg li, txawm yog nyob thiab tuag los tsis sib ncaim, nkawv nrawm dua tej dav, muaj zog dua li tej tsov ntxhuav.  

24 Ixayees cov ntxhais es, cia li quaj Sha-ul, yog tus uas muab tsoos tsho zoo nkauj tsam xem rau nej hnav, thiab muab tej npauj kub dai rau nej tej tsoos tsho. 25 Cov uas siab loj siab tuab ntog tuag rau hauv tshav rog lawm lauj! Yahnathas kuj pw tuag rau saum nej lub roob siab.

26 Kuv tijlaug Yahnathas es, kuv ntxhov siab kawg txog koj. Koj ua rau kuv kaj siab kawg. Qhov uas koj hlub kuv zoo tshaj plaws, zoo dua tej pojniam kev hlub.

27 Cov uas siab loj siab tuab ntog tuag lawm lauj! Tej cuab yeej ua rog puam tsuaj tag lawm lauj!