Tsa Daviv Ua Vajntxwv Kav Yahdah

1 Dhau ntawd Daviv nug (יחוח)Yahweh tias, kuv yuav nce mus rau hauv Yahdah tej moos ib lub twg los tsis mus? (יחוח)Yahweh hais rau nws tias, cia li nce mus. Daviv thiaj hais tias, kuv yuav mus rau lub twg? (יחוח)Yahweh hais tias, mus rau lub moos Henploos.

2 Daviv thiaj nce mus qhov ntawd thiab nws ob tug pojniam kuj nrog nws mus, yog Ahinau‑as uas yog tibneeg Yile‑ees thiab Anpikayis uas yog Nanpas hauv Khamees tus pojniam uas ua poj ntsuam lawm.

3 Daviv kuj coj cov tibneeg uas nrog nws ua ke mus thiab. Txhua tus kuj nyias coj nyias tsev neeg mus mas lawv nyob hauv tej zej zog ntawm Henploos.

4 Cov tibneeg Yahdah tuaj ua ke mas tsa Daviv ua vajntxwv kav xeem Yahdah rau qhov ntawd. Thaum muaj tibneeg hais rau Daviv tias, cov tibneeg hauv Yanpes Kile‑as yog cov uas faus Sha-ul,

5 mas Daviv txib tibneeg mus hais rau cov tibneeg Yanpes Kile‑as tias, thov (יחוח)Yahweh foom koob hmoov rau nej, rau qhov nej tau ua zoo ua ncaj ua ncees rau Sha-ul uas yog nej tus tswv es nej muab nws faus.

6 Mas thov (יחוח)Yahweh ua nws txojkev hlub uas ruaj khov thiab nws txojkev ncaj tshwm rau nej. Thiab kuv yuav ua zoo rau nej vim yog nej yog cov uas faus Sha-ul.  

7 Vim li no, nej txhais tes cia li muaj zog, cia li ua siab loj siab tuab, rau qhov nej tus tswv Sha-ul twb tuag lawm, mas xeem Yahdah twb tsa kuv ua vajntxwv kav lawv lawm.

​

Daviv Ua Rog Rau Sha-ul Cov Tibneeg

8 Mas Naws tus tub Anaws uas yog Sha-ul tus thawj kav tub rog tau coj Sha-ul tus tub Inpauses hla mus rau lub moos Mahana‑is,

9 thiab tsa nws ua vajntxwv kav Kile‑as thiab cov Asulais thiab Yile‑ees thiab Efa‑is thiab Npeeyamees thiab Ixayees huvsi.

10 Thaum Sha-ul tus tub Inpauses pib kav cov Ixayees, nws hnub nyoog muaj plaub caug xyoo.  Nws kav tau ob xyoos tiamsis xeem Yahdah nrog nraim Daviv.

11 Daviv nyob hauv lub moos Henploos ua vajntxwv kav xeem Yahdah tau xya xyoo thiab rau lub hli.  

12 Naws tus tub Anaws thiab Sha-ul tus tub Inpauses cov tub teg tub taws tawm hauv Mahana‑is mus rau lub moos Kinpe‑oos.   

13 Thiab Xeluyah tus tub Yahas thiab Daviv cov tub teg tub taws kuj tawm mus ntsib lawv ntawm lub pas dej hauv lub moos Kinpe‑oos. Lawv zaum ntawm ntug pas dej, ib pab nyob ib sab pas dej.

14 Anaws hais rau Yahas tias, cia cov hluas ob tog sawv sib ntaus rau peb saib. Yahas hais tias, kom lawv sawv los maj.

15 Cov Npeeyamees uas yog Sha-ul tus tub Inpauses tog kaum ob leeg, thiab Daviv tog kaum ob leeg, lawv sawv los sib ntaus.

16 Nyias taus nyias ntsiab nkaus taubhau thiab xuas ntaj nyias nkaug nyias tus phab tav mas ob tog tuag tag huvsi li. Lawv thiaj hu lub chaw ntawd ua Heekhas Haxulis uas nyob ntawm Kinpe‑oos.

17 Kev ua rog hnub ntawd thiaj heev kawg li. Anaws thiab cov tibneeg Ixayees kuj swb Daviv cov tub rog.  

18 Xeluyah peb tug tub kuj nyob ntawd, yog Yahas, Anpisais thiab Axahees. Axahees mas khiav nrawm cuag nkaus kauv seb.

19 Axahees caum Anaws qab, nws caum qab tsis tig rau sab xis lossis sab laug li.

20 Anaws tig los saib mas hais tias, koj yog Axahees lov? Axahees teb tias, yog kawg.

21 Anaws hais rau nws tias, tig rau sab xis lossis sab laug mus ntes ib tug hluas es txeeb nws qhov txhia chaw mus. Tiamsis Axahees tsis thim li, nws ywj caum

Anaws qab xwb.

22 Anaws thiaj hais dua rau Axahees tias, cia li tseg tsis txhob caum kuv.  Yuav cia kuv ntaus koj kom ntog hauv pem teb ua abtsi? Ces kuv yuav ua li cas tsa muag saib tau koj tus tijlaug Yahas?  

23 Tiamsis nws tsis yeem tseg qhov uas caum Anaws. Vim li ntawd Anaws thiaj xuas qab hmuv nkaug rov tom qab thiaj chob nplho Axahees lub plab tshab plaws nrob qaum, nws thiaj ntog tuag rau qhov ntawd. Mas txhua tus uas tuaj rau ntawm lub chaw uas Axahees ntog tuag ntawd txawm nres twj ywm rau ntawd. 24 Tiamsis Yahas thiab Anpisais tseem caum Anaws qab mus.  Thaum hnub poob qho lawv mus txog ntawm lub pov roob Asmas uas nyob ncaj ntawm Kiyas ntawm txojkev uas mus rau tebchaws moj sab qhua Kinpe‑oos.  

25 Cov Npeeyamees sau zog tuaj tom Anaws qab mus ua kiag ib pab tiv rau saum ib lub ncov roob.

26 Anaws qw nrov rau Yahas tias, yuav cia hniav ntaj noj tibneeg mus li lov? Koj tsis paub tias thaum kawg yuav lwj siab no lov? Yuav ntev li cas es koj mam hais koj cov tib neeg kom tseg tsis txhob caum lawv cov kwvtij lawm?  

27 Yahlas thiaj hais tias, muaj (יחוח)Yahweh muaj txojsia nyob pom, yog koj cheem tagkis no sawv ntxov, ces cov tub rog yeej tseg tsis caum lawv cov kwvtij lawm. 28 Yahlas thiaj tshuab raj kub yaj, cov tib neeg sawvdaws thiaj tseg tsis caum cov Ixayees thiab tsis ua rog dua li lawm.  

29 Mas hmo ntawd, Anaws thiab nws cov tibneeg thiaj mus ib hmos kev hauv Alanpas. Lawv hla tus dej Yaladees thiab hla lub hav Npiloos mam mus txog Mahana‑is.

30 Yahlas thiaj thim tsis caum Anaws.  Mas thaum nws txheeb cov tibneeg sawvdaws los ua ke, Daviv cov tub rog ploj lawm kaum cuaj leeg tsis suav Axahees.

31 Tiamsis Daviv cov tub rog tua cov Npeeyamees tuag lawm peb puas rau caum leej uas yog Anaws cov tibneeg.

32 Lawv kwv Axahees mus faus rau hauv nws txiv lub qhov ntxa hauv lub moos Npelehees. Yahas thiab nws cov tibneeg mus ib hmos kev mas thaum kaj ntug lawv thiaj mus txog lub moos Henploos.