1 Sha-ul cov tibneeg thiab Daviv cov tib neeg kuj ua rog ntev loo.  Daviv kuj kov yeej zuj zus, Sha-ul cov kuj qaug zog zuj zus.

​

Daviv Cov Tub Uas Yug Hauv Henploos

2 Daviv cov tub uas yug hauv Henploos yog li no, tus tub hlob yog Asnoos, yog Ahinau‑as uas yog tibneeg Yile‑ees yug.

3 Tus ob yog Khile‑as, yog Anpikayis uas yog Nanpas hauv Khamees tus pojniam uas ua poj ntsuam yug. Tus peb yog Axaloos, yog Ma‑akhas uas yog cov Kesus tus vajntxwv Thamais tus ntxhais yug.

4 Tus plaub yog Adauniyah, yog Hakis yug. Tus tsib yog Sefathiyah, yog Anpithas yug.

5 Tus rau yog Ile‑as, yog Elag uas yog Daviv tus pojniam yug. Cov tub no, Daviv yug hauv lub moos Henploos.

​

Anaws Los Nrog Daviv Sib Raug Zoo

6 Lub sijhawm uas Sha-ul cov tibneeg thiab Daviv cov tibneeg tab tom ua rog, Anaws kuj tsab ua loj zuj zus rau hauv Sha-ul cov tib neeg.

7 Sha-ul muaj ib tug hluas nkauj hu ua Lixapas, yog Aiyag tus ntxhais. Inpauses txawm hais rau Anaws tias, ua cas koj mus nrog kuv txiv tus hluas nkauj pw?

8 Mas Anaws chim heev rau Inpauses lo lus ntawd, nws txawm hais tias, kuv yog Yahdah cov ib lub taubhau dev lov? Niaj hnub nimno kuv lub siab npuab koj txiv Sha-ul cov tibneeg thiab koj txiv kwvtij kwvluag, kuv tsis tau muab koj rau hauv Daviv txhais tes. Tiamsis hnub no koj tseem yuav xeeb plaub ntawm tus pojniam no rau kuv.

9 Yog kuv tseem tsis pab Daviv kom tiav raws li (יחוח)Yahweh cog lus rau nws lawd, kuv thov (יחוח)Yahweh rau txim rau kuv kom nyhav kawg.

10 Kuv yuav muab lub tebchaws rho hauv Sha-ul cov tibneeg thiab kuv yuav tsa Daviv lub zwm txwv rau saum cov Ixayees thiab cov Yahdah txij ntua Daj mus txog ntua Npe‑awsenpas.

11 Mas Inpauses teb tsis taus Anaws ib los li rau qhov nws ntshai Anaws. 12 Anaws tso tibneeg xa xov mus hais rau Daviv ntawm Henploos tias, lub tebchaws no yog leejtwg li? Koj nrog kuv cog lus sib raug zoo, mas kuv yuav tuaj koj tog, kuv yuav coj cov Ixayees huvsi los cob rau koj.

13 Daviv hais tias, zoo kawg.  Kuv yuav nrog koj cog lus. Kuv xav kom koj ua ib yam tso. Thaum koj yuav tuaj ntsib kuv tim ntsej tim muag, yog koj tsis coj Sha-ul tus ntxhais Mikhas tuaj rau kuv tso, mas koj yeej yuav tsis pom kuv.

14 Thiab Daviv tso xov rau Sha-ul tus tub Inpauses hais tias, muab kuv tus pojniam Mikhas rau kuv, nws yog tus uas kuv muab cov Filixatees ib puas daim tawv chaw xis qhaib lawm.

15 Inpauses txawm kom tib neeg mus coj Mikhas ntawm nws tus txiv uas yog La‑is tus tub Pati‑ees los.

16 Nws tus txiv kuj quaj raws quaj raws nws mus txog ntawm Npahulis. Anaws hais rau nws tias, cia li rov qab mus. Nws thiaj rov qab mus lawm.

17 Anaws txawm nrog Ixayees cov kev txwj laug sablaj hais tias, ntev los lawm, nej yeej xav kom Daviv ua vajntxwv kav nej.

18 Mas nimno cia li ua kom tiav, rau qhov (יחוח)Yahweh twb cog lus cia rau Daviv lawm tias, kuv yuav siv kuv tus tub qhe Daviv txhais tes cawm kuv haiv neeg Ixayees dim hauv cov Filixatees txhais tes thiab dim hauv lawv cov yeeb ncuab sawv daws txhais tes huvsi.

19 Anaws kuj hais rau cov Npeeyamees thiab. Anaws txawm mus cuag Daviv hauv lub moos Henploos qhia txhua yam uas cov Ixayees thiab xeem Npeeyamees sawvdaws pom zoo ua.

20 Thaum Anaws nrog nees nkaum leej tuaj cuag Daviv hauv lub moos Henploos, mas Daviv npaj noj haus rau Anaws thiab cov tibneeg uas nrog nws tuaj.

21 Anaws hais rau Daviv tias, kuv yuav sawv kev rov mus thiab kuv yuav sau zog cov Ixayees sawvdaws tuaj cuag vajntxwv uas yog kuv tus tswv, kom lawv thiaj tau nrog koj cog lus sib raug zoo thiab koj thiaj yuav kav tau txhua yam uas koj siab nyiam. Daviv thiaj tso Anaws rov qab. Anaws rov qab mus ua tso siab plhuav.

​

Yahas Tua Anaws

22 Lub sijhawm ntawd Yahas thiab Daviv cov tub rog mus lwg luag thiab coj qhov txhia chaw ntau kawg li mus. Tiamsis Anaws twb tsis nrog Daviv nyob ntawm Henploos lawm rau qhov Daviv twb tso nws mus thiab nws twb mus ua tso siab plhuav lawm.

23 Thaum Yahas thiab cov tub rog sawvdaws uas nrog nws los txog, muaj tibneeg hais rau Yahas tias, Naws tus tub Anaws tuaj cuag vajntxwv mas vajntxwv twb tso nws rov qab mus lawm, nws mus ua tso siab plhuav.

24 Ces Yahas txawm mus hais rau vajntxwv tias, koj ua abtsi li no?  Koj sim saib, Anaws twb tuaj cuag koj.  Ua cas koj cia li tso nws mus, nws thiaj mus lawm?

25 Koj yeej paub tias, Naws tus tub Anaws tuaj dag koj xwv thiaj paub tias koj tawm mus thiab nkag los li cas thiab paub txhua yam uas koj ua.

26 Thaum Yahas tawm ntawm Daviv los nws txawm tso tibneeg xa xov mus caum Anaws. Lawv coj Anaws ntawm lub pas dej Xilas rov los.  Daviv kuj tsis paub qhov no li.

27 Thaum Anaws rov los txog Henploos lawm, Yahas txawm coj nws tib leeg nkag mus rau hauv plawv rooj loog kom thiaj tau nrog nws tib leeg tham xwb. Ces Yahas txawm nkaug Anaws plab qhov ntawd, Anaws thiaj tuag lawm, twb yog Yahas ua pauj rau qhov uas nws tus kwv Axahees tuag.

28 Dhau ntawd, thaum Daviv paub li ntawd nws thiaj hais tias, kuv thiab kuv lub tebchaws yuav tsis ris lub txim uas Naws tus tub Anaws cov ntshav los no ib txhis tab meeg (יחוח)Yahweh xub ntiag.

29 Thov kom lub txim poob rau saum Yahas taubhau thiab poob rau saum nws txiv caj ces. Cia Yahas caj ces pheej yuav muaj tus uas muaj kua ntws los lossis muaj tus uas mob lig mob ruas lossis muaj tus uas nrig pas lossis muaj tus uas raug hniav ntaj tua lossis muaj tus uas tsis muaj mov noj.

30 Yahlas thiab nws tus kwv Anpisais tua Anaws vim Anaws tau tua nkawv tus kwv Axahees rau ntawm tshav rog Kinpe‑oos lawm.

31 Daviv kuj hais rau Yahas thiab cov tibneeg sawvdaws uas nrog nws tias, cia li dua nej tej ris tsho thiab muab khaub seev tsaj los npua thiab quaj ntsuag mus ua Anaws lub cev tuag ntej. Thiab vajntxwv Daviv raws qab lub hleb.

32 Lawv muab Anaws faus rau ntawm Henploos. Vajntxwv kuj tsa suab quaj ntawm Anaws lub ntxa thiab cov pejxeem sawvdaws kuj quaj kawg li.

33 Vajntxwv quaj ntsuag txog Anaws tias, tsim nyog Anaws yuav tuag ib yam nkaus li tus tibneeg ruam lov?

34 Twb tsis muab koj txhais tes khi, twb tsis muab koj kotaw xauv nruas phoo, koj cia li ntog tuag yam nkaus li tibneeg ntog rau ntawm tibneeg lim hiam xub ntiag.  Mas cov pejxeem sawvdaws kuj rov quaj Anaws dua ib zaug.

35 Cov pejxeem sawvdaws tuaj cheem kom Daviv noj mov rau thaum tseem nruab hnub. Tiamsis Daviv twv hais tias, yog kuv sim mentsis ncuav lossis ib yam abtsi ua ntej uas hnub poob qho, mas cia (יחוח)Yahweh rau txim rau kuv li ntawd nyhav dua thiab.

36 Cov pejxeem sawvdaws pom li ntawd mas kuj txaus siab. Txhua yam uas vajntxwv ua yeej los txaus cov pejxeem lub siab.   

37 Hnub ntawd cov pejxeem sawvdaws thiab cov Ixayees sawvdaws kuj nkag siab tias, tsis yog vajntxwv muaj nplooj siab tua Naws tus tub Anaws.

38 Vajntxwv hais rau nws cov tub teg tub taws tias, nej tsis paub lov, hnub no cov Ixayees ib tug thawj tseem ceeb tau tuag lawm?

39 Txawm yog kuv raug tsa ua vajntxwv los hnub no kuv kuj qaug zog. Xeluyah cov tub no ua nyuaj dhau rau kuv lawm. Thov (יחוח)Yahweh ua pauj rau tus uas ua txhaum raws li nws kev txhaum.