Tua Inpauses

1 Thaum Sha-ul tus tub Inpauses hnov tias Anaws tuag rau hauv Henploos lawm, nws qaug zog kiag lawm thiab cov Ixayees sawvdaws poob siab tag.

2 Sha-ul tus tub muaj ob tug ua thawj coj pab tub rog lwg luag, ib tug hu ua Npa‑anas, ib tug hu ua Lekhaj. Nkawv yog Limoos tus tub uas yog xeem Npeeyamees nyob hauv lub moos Npe‑awlaus, rau qhov kuj muab Npe‑awlaus suav ua Npeeyamees li moos.

 3Cov tibneeg hauv Npe‑awlaus tsiv mus rau lub moos Kitha‑is mas nyob qhov ntawd los txog niaj hnub nimno.

4 Sha-ul tus tub Yahnathas muaj ib tug tub mus tsis taus kev.  Thaum uas muaj xov xwm hais txog Sha-ul thiab Yahnathas hauv Yile‑ees tuaj, tus menyuam no muaj tsib xyoos. Mas tus nkauj qhe uas tu nws muab puag coj khiav.  Thaum nws maj khiav mus ntawd, tus menyuam txawm poob mas tuag ceg. Nws npe hu ua Mefinpause.

5 Mas Limoos uas yog tibneeg Npe‑awlaus ob tug tub uas yog Lekhaj thiab Npa‑anas txawm sawv kev mus. Thaum tshav ntuj kub, lawv tuaj txog Inpauses lub tsev, yog thaum tav su uas Inpauses tseem pw so.

6 Ces nkawv txawm nkag mus rau hauv tsev ua txuj yam li yuav mus nqa mentsis mog ces nkawv txawm nkaug kiag Inpauses plab, ces Lekhaj thiab nws tijlaug Npa‑anas txawm khiav lawm.

7 Thaum nkawv nkag mus rau hauv tsev, Inpauses pw hauv txaj, mas nkawv txawm ntaus nws thiab muab nws tua thiab txiav nws lub taubhau.  Nkawv coj nws lub taubhau taug txojkev hauv Alanpas mus ib hmos kaj ntug.

8 Nkawv coj Inpauses lub taubhau mus pub rau Daviv hauv lub moos Henploos thiab hais rau vajntxwv tias, no yog koj tus yeeb ncuab Sha-ul tus tub Inpauses lub taubhau, yog tus uas nrhiav txov koj txojsia. Hnub no (יחוח)Yahweh tau pab vajntxwv uas yog wb tus tswv ua pauj rau Sha-ul thiab nws tej tub ki.

9 Tiamsis Daviv teb Lekhaj thiab nws tus tijlaug Npa‑anas uas yog Limoos uas yog tibneeg hauv Npe‑awlaus ob tug tub tias, muaj (יחוח)Yahweh muaj txojsia nyob pom, yog tus uas cawm kuv dim hauv txhua txojkev txom nyem,

10 thaum muaj ib tug hais rau kuv tias, Sha-ul tuag lawm, nws xav tias yog nws coj xov zoo rau kuv, kuv muab nws ntes muab nws tua rau ntawm Xilaj lawm.  No yog kuv muab nqi zog rau nws rau qhov uas nws coj tsab xov ntawd tuaj.

11 Heev dua li ntawd, yog muaj tibneeg phem tua tus tibneeg ncaj ncees rau hauv nws lub tsev thiab saum nws lub txaj pw, kuv yuav tsis kom neb ris nws cov ntshav no lov, thiab yuav tsis muab neb ua puam tsuaj hauv ntiajteb no lov?

12 Daviv txawm hais rau nws cov tub hluas, mas lawv muab nkawv tua, muab txiav tes txiav taw muab ob lub cev dai rau ntawm ntug pas dej ntawm Henploos.  Tiamsis lawv muab Inpauses lub taubhau coj mus faus rau hauv Anaws lub qhov ntxa ntawm lub moos Henploos.