Tsa Daviv Ua Vajntxwv Kav Cov Ixayees

(1 Vaj Keeb Kwm 11:1-3)

1 Cov Ixayees txhua xeem tuaj cuag Daviv hauv lub moos Henploos thiab hais tias, peb nrog koj koom nqaij koom txha.

2 Thaum ub uas Sha-ul ua vajntxwv kav peb, koj yeej yog tus uas coj cov Ixayees tawm mus thiab coj rov qab los, thiab (יחוח)Yahweh hais rau koj tias, koj yuav ua tus yug yaj kav kuv haiv neeg Ixayees thiab koj yuav ua cov Ixayees tus thawj.

3 Yog li ntawd, Ixayees cov kev txwj laug sawvdaws thiaj tuaj cuag Daviv hauv lub moos Henploos. Thiab vajntxwv Daviv nrog lawv sib cog lus hauv lub moos Henploos rau ntawm (יחוח)Yahweh xubntiag, ces lawv txawm hliv roj tsa Daviv ua vaj ntxwv kav cov Ixayees.

4 Thaum Daviv pib kav tebchaws, nws hnub nyoog muaj peb caug xyoo thiab nws kav tau plaub caug xyoo.

5 Nws nyob hauv Henploos kav cov Yahdah tau xya xyoo rau lub hli, thiab nyob hauv Yeluxalees kav cov Ixayees thiab cov Yahdah huvsi tau peb caug peb xyoos.

​

Daviv Txeeb Lub Moos Xi‑oo

(1 Vaj Keeb Kwm 11:4-9,14:1-7)

6 Vajntxwv thiab nws cov tub rog mus rau lub nroog Yeluxalees ua rog rau cov Yenpus uas nyob hauv lub tebchaws ntawd. Cov Yenpus hais rau Daviv tias, koj txeem tsis tau los rau hauv no, cov tibneeg dig muag ceg tawv kuj yuav tiv tau koj. Lawv xav tias Daviv yuav txeem los tsis tau li.

7 Txawm li ntawd los Daviv txeeb tau lub chaw ruaj khov Xi‑oo, uas yog Daviv lub nroog.  

8 Hnub ntawd Daviv hais tias, leejtwg yuav mus ntaus cov Yenpus, cia tus ntawd nce taus tus kwj deg mus tua cov dig muag ceg tawv uas Daviv lub siab ntxub kawg li. Vim li ntawd, luag thiaj hais tias, tsis txhob kheev cov dig muag ceg tawv nkag los rau hauv vajntxwv tsev.

9 Daviv nyob kiag hauv lub chaw ruaj khov thiab hu lub chaw ntawd tias, Daviv lub nroog. Thiab Daviv tsim lub nroog puag ncig txij ntua lub loog Milaus mus rau sab hauv.

10 Daviv muaj hwjchim zuj zus vim yog (יחוח)Yahweh uas yog Tus Tswv muaj hwjchim loj kawg nkaus nrog nraim nws.

11 Vajntxwv Hilas hauv lub nroog Thailab tso tibneeg xa xov tuaj cuag Daviv thiab xa ntoo ciab thiab cov Kws ntoo, cov Kws txaug pob zeb tuaj ua lub tsev rau Daviv nyob.  

12 Daviv paub tias (יחוח)Yahweh tau tsa nws ua vajntxwv ruaj khov kav cov Ixayees thiab ua rau nws lub tebchaws vam meej, vim yog saib rau nws haiv neeg Ixayees.  

13 Thaum Daviv tawm hauv lub moos Henploos los nyob rau hauv Yeluxalees nws yuav dua niam yau thiab coj tej hluas nkauj los kav, mas yug dua tub thiab ntxhais.

14 Cov menyuam uas Daviv yug hauv Yeluxalees cov npe yog li no: Samu‑as, Saunpam, Nathas, Xalaumoos,

15 Ihas, Elisu‑as, Nefes, Yafias,

16 Elisamas, Eliyadas thiab Elifeles.

​

Daviv Ntaus yeej Cov Filixatees

(1 Vaj Keeb Kwm 14:8-17)

17 Thaum cov Filixatees hnov tias Daviv raug tsa ua vajntxwv kav cov Ixayees huvsi, cov Filixatees sawvdaws txawm nce tuaj nrhiav Daviv.  Tiamsis Daviv hnov li ntawd, nws txawm mus nyob rau hauv lub chaw ruaj khov.

18 Cov Filixatees tuaj nyob thoob plaws hauv lub hav Lefa‑is.

19 Daviv txawm ua nug rau (יחוח)Yahweh tias, kuv yuav mus ntaus cov Filixatees lov? Koj yuav muab lawv rau hauv kuv txhais tes los tsis muab? (יחוח)Yahweh teb Daviv tias, cia li mus, kuv yeej yuav muab cov Filixatees rau hauv koj txhais tes.

20 Daviv thiaj mus rau ntawm lub moos Npa‑as Pelaxis, mas Daviv kov yeej cov Filixatees qhov ntawd.  Nws hais tias, (יחוח)Yahweh txeem plaws rau kuv cov yeeb ncuab yam li dej txeem plaws mus nyab. Vim li ntawd, lub chaw ntawd thiaj hu ua Npa‑as Pelaxis.  

21 Cov Filixatees thiaj muab lawv tej dab mlom tso tseg rau qhov ntawd. Daviv thiab nws cov tub rog thiaj muab nqa mus lawm.  

22 Cov Filixatees rov qab tuaj dua mus nyob thoob plaws hauv lub hav Lefa‑is.

23 Thaum Daviv rov qab ua nug rau (יחוח)Yahweh dua ib zaug, (יחוח)Yahweh hais tias, koj tsis txhob ncaj mus, cia li lug mus tom lawv qub qab, ntaus lawv ncaj ntawm cov ntoo zaub kab.

24 Thaum koj hnov suab nrov saum cov ntsis ntoo zaub kab yam li lub suab uas tub rog mus kev, koj cia li maj nroos mus, vim lub sijhawm ntawd, (יחוח)Yahweh tau ua koj ntej mus ntaus Filixatees cov tub rog lawm.

25 Daviv ua raws li (יחוח)Yahweh hais rau nws mas ntaus cov Filixatees txij ntua lub moos Kenpas mus txog ntua lub moos Kexaws