Sha-ul Thiab Cov Cuav Tubtxib

1 Kuv xav thov kom nej ua siab ntev thev tej lus ruam uas kuv hais qho mentsis. Nej twb yog thev kawg lawm. 2 Kuv yeej khib xeeb nej ib yam li Abba (יחוח)Yahweh khib xeeb, rau qhov kuv twb qhaib nej rau tib tug txiv xwb, xwv kuv thiaj muab nej ua nkauj xwb dawb huv pub rau (יהושע)Yahshua Messiah.

3 Tiamsis kuv ntshai tsam nej tej kev xav yuav raug ntxias yuam kev tsis muaj lub siab xib thiab tsis dawb huv rau (יהושע)Yahshua Messiah, ib yam li tus nab tej tswvyim phem dag ntxias Evas. 4 Yog tias leejtwg tuaj tshaj tawm txog dua ib tug (יהושע)Yahshua uas tsis yog tus (יהושע)Yahshua uas peb tshaj tawm, lossis yog nej txais dua ib tug ntsuj plig uas txawv dua tus uas nej twb txais lawm, lossis yog nej txais yuav txoj hmoo zoo uas txawv txoj uas nej twb txais lawm, kuj yog nej thev taus tej ntawd zoo tiag tiag li. 5 Kuv xav hais tias, kuv yuav tsis qes dua cov muaj lub npe hu tias, tubtxib zoo tshaj plaws ntawd ib qho li.

6 Txawm yog kuv tsis txawj hais lus, los kuv kuj txawj paub. Peb ua tej no tshwm rau nej pom tseeb rau hauv txhua yam uas peb ua.

7 Qhov uas kuv txo hwjchim, thiaj tsa kom nej tau ntsej muag, thiab kuv qhia Abba (יחוח)Yahweh txoj hmoo zoo rau nej tsis yuav nqe ntawd, yog txhaum lov? 8 Kuv lws lwm pawg ntseeg, yog qhov uas kuv txais lawv cov nyiaj los yug kuv, kom kuv thiaj ua num tau rau nej. 9 Thiab thaum kuv tseem nrog nej nyob, thiab tabtom tu ncua nyiajtxiag, los kuv tsis ua lub nra hnyav rau leejtwg ris, rau qhov cov kwvtij uas tuaj hauv lub xeev Makhedau-nias twb pub tej uas kuv tu ncua rau kuv lawm. Txhua yam mas kuv tsis ua lub nra hnyav rau nej kiag li thiab kuv yeej yuav tsis ua lub nra mus li.

10 (יהושע)Yahshua Messiah txojkev tseeb yeej nyob hauv kuv, tej uas kuv qhuas txog ntawd, mas tsis muaj ib tug uas nyob hauv lub xeev Akhayas yuav txwv tau kuv kom tsis txhob hais. 11 Vim li cas?

Yog vim kuv tsis hlub nej lov? Abba (יחוח)Yahweh paub tias, kuv yeej hlub nej. 12 Thiab yam uas kuv ua, kuv yuav ua mus li, kom thiaj tav tau cov tibneeg uas pheej nrhiav sijhawm kom luag suav tias, lawv ua haujlwm ib yam li peb ua hauv txhua yam uas lawv qhuas ntawd. 13 Lawv cov ntawd, yog cuav tubtxib, yog tub zog uas dag ntxias, thiab lawv ua txuj ua zoo li lawv yog (יהושע)Yahshua Messiah cov tubtxib. 14 Qhov uas lawv ua ntawd, tsis txhob phimhwj li, rau qhov Xatas kuj txia ua tubtxib saum ntuj uas tawm hauv qhov kaj tuaj.

15 Vim li no, yog Xatas cov tub qhe txia los ua txojkev ncaj ncees li tub qhe, kuj yoojyim ua tau. Thaum kawg lawv yuav saws raws li lawv tau ua.

​

Sha-ul Thev Kev Txom Nyem Ua Tubtxib

16 Kuv rov hais dua tias, tsis txhob cia leejtwg xav tias, kuv yog tibneeg ruam.

Tiamsis yog nej xav li ntawd, kuj cia li lees yuav kuv yam li lees yuav tus tibneeg ruam, xwv kuv thiaj zoo qhuas mentsis. 17(Tej uas kuv muaj cuab kav qhuas no, kuv tsis yog hais raws li Abba (יחוח)Yahweh kom kuv hais, tiamsis kuv hais raws li tej tibneeg ruam.

18 Vim muaj ntau leej qhuas raws li tibneeg ntiajteb, kuv kuj yuav qhuas thiab. ) 19 Nej twb zoo siab ua siab ntev thev cov tibneeg ruam, vim nej yog tibneeg txawj ntse. 20 Rau qhov nej ua tau siab ntev thev rau thaum luag yuam nej ua qhev, lossis noj nej tug, lossis tsuj yuam nej, lossis tsab ua loj, lossis ntaus nej lub plhu. 21 Kuv txaj muag lees hais tias, peb tsis muaj zog txaus ua li ntawd. Tiamsis leejtwg muaj cuab kav qhuas txog yam twg, kuv kuj kav qhuas txog yam ntawd thiab. (Kuv hais yam li tus ruam hais. ) 22 Lawv yog haiv neeg Henplais lov? Kuv kuj yog thiab.

Lawv yog tibneeg Ixayees lov? Kuv kuj yog thiab. Lawv yog Abraham caj ces lov? Kuv kuj yog thiab? 23 Lawv yog cov uas ua num rau (יהושע)Yahshua Messiah lov? Kuv kuj ua num rau nwg zoo dua lawv (kuv tabtom hais yam li tus vwm hais,) kuv ua haujlwm khwv dua lawv, kuv raug kaw hauv tsev lojfaj ntau dua lawv, kuv raug muab nplawm ntau zaus lawm, thiab kuv ntsib kev tuag ntau zaus.

24 Kuv raug cov Yahdaim nplawm tsib zaug, ib zaug twg yog peb caug cuaj nplawg. 25 Kuv raug xuas pas nplawm peb zaug, raug xuas pob zeb ntaus ib zaug. Kuv caij nkoj tawg peb zaug. Kuv ntab hauv dej hiavtxwv ib hnub ib hmos, 26 kuv taug kev tsis tu ncua, kuv ntsib xwm txheej phem hauv hav dej, ntsib xwm txheej phem ntawm tub sab, ntsib ntawm kuv haiv neeg, ntsib ntawm lwm haiv neeg, ntsib hauv lub nroog, ntsib hauv tebchaws moj sab qhua, ntsib hauv dej hiavtxwv thiab ntsib ntawm cov cuav kwvtij. 27 Kuv ua haujlwm khwv thiab txom nyem, kuv yoo dab ntub ntau zaus, tshaib nqhis, yoo mov ntau zaus, thiab tiv no thiab liab qab. 28 Dua li ntawd, qhov uas kuv txhawj txog txhua pawg ntseeg, tseem niaj hnub ua rau kuv nyuaj siab.

29 Leejtwg tsis muaj zog ces kuv kuj tsis muaj zog thiab? Leejtwg raug ntxias kom yuam kev es kuv yuav tsis ntxhov siab?

30 Yog tsim nyog kuv qhuas, kuv yuav qhuas txog tej uas qhia kom pom tias kuv qaug zog.

31 Abba (יחוח)Yahweh uas yog peb tus Cawmseej (יהושע)Yahshua Messiah Leej Txiv, yog tus uas tsim nyog qhuas mus ib txhis, nws paub tias kuv tsis dag.

32 Tus uas vajntxwv Alethas tsa kav lub nroog Dama-xakas, txib tibneeg zov lub nroog Damaxakas yuav ntes kuv, 33 tiamsis kuv raug nyob hauv lub tawb loj, muab tso ntawm qhov rais hauv lub ntsa loog nqes dauv rau sab nraud, kuv thiaj khiav dim ntawm tus thawj uas kav lub nroog txhais tes.

​