Sha-ul Ua Yog Toog

1 Kuv yuav tsum qhuas. Txawm yog tsis muaj qabhau, los kuv yuav hais txog zaj yog toog thiab tej uas Abba (יחוח)Yahweh qhia tshwm los.  2 Thaum kaum plaub xyoos uas dhau los lawm, kuv paub ib tug yawg uas nyob hauv (יהושע)Yahshua Messiah, nws raug coj mus rau saum ntuj txheej uas peb. Kuv kuj tsis paub, xyov nws mus kiag lub cev los yog tus ntsuj plig mus xwb, qhov ntawd tsuas yog Abba (יחוח)Yahweh thiaj li paub xwb. 3 Kuv paub hais tias, tus yawg ntawd raug coj mus rau hauv lub chaw uas zoo kawg nkaus lawm. Tiamsis, ua li kuv twb hais lawm uas, kuv kuj tsis paub hais tias, xyov nws mus kiag lub cev los yog tus ntsuj plig mus xwb, qhov ntawd tsuas yog Abba (יחוח)Yahweh thiaj li paub xwb. 4 Thaum nws mus txog saud, nws hnov lawv hais tej lus uas tsis tau hnov dua, uas yog tej uas tibneeg ntiaj teb tsis txawj yuav hais tau kiag li. 5 Tus yawg ntawd kuv qhuas tau, tiamsis kuv tus kheej mas kuv yuav tsis qhuas, tsuas yog qhuas txog qhov uas kuv qaug zog xwb. 6 Yog kuv xav qhuas los kuv kuj tsis yog tibneeg ruam, vim tias kuv hais lus tseeb. Tiamsis kuv tsis qhuas xwv thiaj tsis muaj leejtwg xam pom kuv loj dua li uas lawv tau pom kuv tus kheej lossis hnov kuv hais.

7 Xwv thiaj tsis pub kuv tsab ua loj, vim tej uas Abba (יחוח)Yahweh qhia tshwm rau kuv pom ntau kawg ntawd, thiaj ua kom muaj pos chob kuv lub cev, yog Xatas tus tubtxib uas pheej nplawm kuv, kom kuv thiaj tsis tsab ua loj dhau.

8 Tus pos ntawd, kuv twb thov Abba (יחוח)Yahweh peb zaug kom tawm hauv kuv lub cev mus. 9 Tiamsis Abba (יחוח)Yahweh hais rau kuv tias, kuv txojkev hlub txaus rau koj lawm, vim qhov twg tsis muaj zog, kuv lub hwjchim yuav tshwm puv nkaus rau qhov ntawd. Vim li no, kuv yuav zoo siab qhuas txog qhov uas kuv tsis muaj zog heev dua, xwv (יהושע)Yahshua Messiah lub hwjchim thiaj roos kuv.

10 Vim saib rau (יהושע)Yahshua Messiah, kuv thiaj txaus siab rau qhov uas tsis muaj zog, thiab raug kev thuam luag, raug kev txom nyem, raug kev tsim txom, thiab raug kev ceeblaj nyuaj siab, vim kuv qaug zog thaum twg, kuv kuj muaj zog thaum ntawd.

​

Sha-ul Txhawj Pawg Ntseeg Hauv Corinthians

11 Kuv ua tibneeg ruam lawm lauj. Vim yog nej yuam kuv, kuv thiaj ua tibneeg ruam.

Tsim nyog nej qhuas kuv, rau qhov, txawm yog kuv tsis tsim txiaj abtsi los, kuv tseem tsim txiaj ib yam li cov tibneeg uas nej hu tias, cov tubtxib uas zoo tshaj ntawd thiab. 12 Kuv twb ua siab ntev ua tej txujci uas ua tubtxib rau hauv nej, yog tej txujci tseem ceeb thiab txujci phimhwj, thiab tej haujlwm uas muaj hwjchim. 13 Nej tu ncua abtsi uas lwm pawg ntseeg tsis tau txais? Tsuas yog qhov uas kuv tsis ua lub nra hnyav rau nej xwb. Qhov kev txhaum no thov nej zam txim rau kuv nawj.

14 Nimno kuv npaj txhij yuav tuaj saib nej zaum peb, thiab kuv yuav tsis ua lub nra hnyav rau nej, vim tias kuv tsis cheem tsum nej tej qhov txhia chaw, tiamsis kuv cheem tsum nej tus kheej xwb. Rau qhov tsis tsim nyog menyuam yuav npaj cia rau niam txiv, tiamsis niam txiv npaj cia rau menyuam xwb.

15 Kuv kuj zoo siab kawg uas yuav siv kuv tej nyiaj txiag qhov txhia chaw thiab kuv tus kheej ua haujlwm pab nej. Yog kuv hlub nej ntau zuj zus, ces nej yuav hlub kuv tsawg zuj zus lov? 

16 Tej zaum nej kuj lees tias kuv tsis ua lub nra hnyav rau nej, tiamsis nej tseem hais tias kuv siv tswvyim phem ntes tau nej. 17 Kuv siv cov tibneeg uas kuv txib tuaj cuag nej, ib tug twg noj nej tug lov? 18 Kuv thov Titus tuaj thiab tso ib tug kwvtij nrog nws tuaj. Titus tau noj nej tug lov? Peb tsis koom ib lub siab ua haujlwm thiab taug tib tug neev taw lov?

19 Nej xav ib txwm tias, peb hais daws peb zaj xwb lov?

Peb hais hauv (יהושע)Yahshua Messiah tab meeg Abba (יחוח)Yahweh, thiab ua txhua yam tsim tsa kom nej cov uas peb hlub loj hlob tuaj. 20 Rau qhov kuv ntshai tsam thaum kuv tuaj txog, yuav pom tias nej zoo tsis thooj li uas kuv xav, thiab nej kuj yuav pom tias kuv zoo tsis thooj li uas nej xav, thiab ntshai tsam yuav muaj kev sib cav, sib khib, sib chim, sib txeeb, ib leeg hais phem rau ib leeg, taug xaiv, khav theeb, thiab ua ntxhov hnyo.

21 Kuv ntshai tsam thaum kuv rov tuaj dua, Abba (יחוח)Yahweh yuav ua rau kuv poob ntsej muag ntshaus tag rau ntawm nej, thiab kuv yuav ntxhov siab qhov uas muaj ntau leej ua txhaum, thiab tsis tau ntxeev dua siab ntawm tej kev phem kev qias, tej kev ua nkauj ua nraug, thiab tej kev ua dev uas lawv ua.

​