Cov Cuav Xibhwb

1 Tiamsis twb muaj cov cuav xibhwb cev lus uas tshwm rau hauv cov tibneeg ntawd lawm, mas yeej yuav muaj cov cuav xibhwb hauv nej ib yam nkaus. Lawv yuav nyiag coj tej lus qhia cuav uas ua kom puam tsuaj tuaj. Lawv kuj tsis lees yuav Tus Tswv uas them nqe yuav lawv, mas thiaj coj kev puam tsuaj los raug lawv sai kawg. 2 Yuav muaj tibneeg coob ua qias vuab tsuab raws li lawv ua, mas txojkev tseeb yuav raug thuam, vim yog tim lawv. 3 Lawv ua lub siab hlob, lawv thiaj hais tej lus dag ntxias nej kom lawv tau tshaj thawj. Kev rau txim twb teem cia rau lawv ntev los lawm, yuav tshuav tsis ntev.

Qhov uas lawv yuav raug puam tsuaj, kuj tsis tsaug zog lawm.

4 Rau qhov Abba (יחוח)Yahweh  tsis zam txim rau cov tubtxib saum ntuj uas ua txhaum thaum ub, nws muab lawv laim rau hauv ntuj txiag teb tsaus, thiab rau hauv tej qhov uas tsaus ntuj nti mus txog lub sijhawm uas txiav txim. 5 Thiab nws tsis zam txim rau cov tibneeg txheej thaum ub, tiamsis thaum Abba (יחוח)Yahweh  tso dej los nyab lub ntiajteb uas cov tibneeg tsis hwm Abba (יחוח)Yahweh  nyob, nws tsom kwm Nau‑as uas tshaj tawm txojkev ncaj ncees thiab xya leej.

6 Thiab Abba (יחוח)Yahweh  rau txim rau lub moos Xaudoos thiab lub moos Kaumaulas, ua kom puam tsuaj ciaj tshauv tag, kom thiaj ua yam ntxwv rau cov tibneeg tsis hwm Abba (יחוח)Yahweh , uas nyob yav tom qab. 7 Thiab nws cawm tau Lauj dim. Lauj yog tus ncaj ncees thiab ntxhov siab heev rau tej kev qias vuab tsuab uas cov tibneeg phem ua. 8 Rau qhov thaum tus ncaj ncees ntawd, nyob hauv lawv nruab nrab, tej kev phem uas nws niaj hnub pom thiab hnov lawv ua ntawd, ua rau nws lub siab uas ncaj ncees ntxhov tag.

9 Yog li ntawd, Abba (יחוח)Yahweh  yeej paub tias yuav cawm cov uas hwm Abba (יחוח)Yahweh  dim txojkev sim siab tau li cas. Thiab paub tias yuav muab cov tibneeg phem rau txim li cas, mus txog hnub uas txiav txim rau sawvdaws.

10 Qhov loj kawg yog txiav txim rau cov tibneeg uas ua phem ua qias, raws li lawv lub cev nqaij tawv ntshaw thiab saib tsis taus cov uas muaj hwjchim kav. Lawv ua siab tuab siab twm xeeb, lawv tsis ntshai qhov uas hais lus saib tsis taus cov tubtxib saum ntuj uas muaj hwjchim ci ntsa iab. 11 Txawm yog cov tubtxib saum ntuj uas muaj zog thiab muaj hwjchim loj dua cov xibhwb cuav ntawd los, lawv twb tsis thuam thiab tsis nkaug rau Abba (יחוח)Yahweh  hais tias cov cuav xibhwb ntawd ua txhaum.

12 Tiamsis cov cuav xibhwb no zoo nkaus li tej tsiaj txhu uas tsis txawj xav abtsi, thiab ua raws li nws lub siab ntshaw, yug los rau luag ntes thiab muab tua xwb. Lawv hais lus saib tsis taus tej uas lawv tsis nkag siab, lawv yuav raug kev puam tsuaj ib yam li tej tsiaj txhu ntawd.

13 Lawv yuav raug kev txom nyem pauj lawv tej kev phem. Lawv suav tias qhov uas ua nqaj ua nqug, noj seem noj so, nruab hnub yog kev lomzem. Lawv yog tej teev uas dub thiab qias puas tsuas. Thaum lawv nrog nej noj haus ua ke, lawv qw ua nqaj ua nqug, qaug dej qaug cawv. 14 Lawv lub qhov muag tsuas yog xia plias rau tej kev ua nkauj ua nraug xwb, lawv tej kev ua txhaum yeej tsis paub txaus li. Lawv ntxias cov uas siab mos siab muag mus ua kev txhaum. Lawv xyaum ua tibneeg siab hlob. Abba (יחוח)Yahweh  twb foom tsis zoo rau lawv lawm.

15 Lawv muab txojkev raug cai tso tseg, yuam kev mus raws Npe-aus tus tub Npala‑as txojkev, yog tus uas nyiam tej nqe ntiav uas tau ntawm tej kev ua tsis ncaj. 16 Nws kuj raug thuam rau qhov uas nws tsis mloog lus. Nws tus nees luav uas tsis txawj hais lus, cia li hais tau lus li tibneeg, thiab txwv tsis pub nws mus ua dog ua dig li tej tibneeg vwm ua.

17 Cov xibhwb ntawd, yog lub qhov dej qhuav thiab cov huab uas cua daj cua dub ntsawj ya mus. Twb npaj qhov tsaus ntuj nti cia rau lawv lawm. 18 Lawv hais lus khav theeb qhuav qhuav, thiab muab tej kev phem uas lub cev nqaij tawv ntshaw, los ntxias cov tibneeg uas tabtom khiav dim, ntawm cov tibneeg uas ua lub neej yuam kev lawm. 19 Lawv cog lus tias, yuav pub cov tibneeg ntawd nyob ywj pheej, tiamsis lawv tus kheej tseem ua tej kev puam tsuaj qhev, rau qhov leejtwg kov tsis yeej yam twg, nws kuj ua yam ntawd qhev.

20 Thaum lawv khiav dim txhua yam kev qias hauv ntiajteb lawm, vim yog paub (יהושע)Yahshua Messiah uas yog peb Tus Tswv thiab yog peb tus Cawmseej, yog lawv rov mus mag thiab swb tej kev qias ntawd dua, mas thaum kawg, lawv yimhuab raug kev phem dua thaum chiv thawj. 21 Rau qhov yog lawv tsis paub txojkev ncaj ncees ntawd kiag li kuj tseem zoo dua li uas lawv paub lawm, los tseem tig nrob qaum rau txoj kevcai dawb huv uas muab cob rau lawv ntawd.

22 Tej uas tshwm los rau lawv, kuj yog raws li lo paj lug uas hais tseeb tias, dev rov noj dev cov ntuav, thiab tus npua uas muab ntxuav huv lawm, tseem rov qab mus da pas av dua.

​