Yahus Ntuas Vajntxwv Yehausafas

1 Cov Yahdah tus vajntxwv Yahsafas rov qab mus txog nws tsev hauv Yeluxalees zoo.

2 Hananis tus tub Yahus uas ua xibhwb hais pom tom hauv ntej txawm tawm mus ntsib vajntxwv Yahsafas thiab hais rau nws tias, tsim nyog koj pab cov tibneeg phem thiab hlub cov uas ntxub (יחוח)Yahweh lov? Vim li no, (יחוח)Yahweh txojkev npau taws poob rau saum koj lawm.

3 Txawm li cas kuj xij, koj muaj ib qhov zoo vim yog koj rhuav tshem tej ncej dab Aselas tawm hauv lub tebchaws no thiab rau siab nrhiav (יחוח)Yahweh.

​

Yahsafas Tsa Cov Uas Tu Plaub

4 Yahsafas nyob hauv Yeluxalees, thiab tawm mus saib tej pejxeem txij ntawm lub moos Npe‑awsenpas mus txog pem toj siab Efa‑is tebchaws dua ib zaug, thiab coj lawv rov los cuag (יחוח)Yahweh uas yog lawv tej poj koob yawm txwv Tus Tswv.

5 Nws tsa cov uas tu plaub rau hauv Yahdah tej moos uas muaj ntsa loog txhua lub thoob plaws lub tebchaws.

6 Thiab hais rau cov uas tu plaub ntawd tias, cia li ua tib zoo xav txog tej uas nej yuav ua, rau qhov tsis yog nej tu plaub kom haum tibneeg, tiamsis nej tu kom haum (יחוח)Yahweh xwb, nws yeej nrog nraim nej tu plaub.

7 Yog li no nej yuav tau paub ntshai (יחוח)Yahweh, thiab ceev faj tej uas nej ua, rau qhov (יחוח)Yahweh uas yog peb Tus Tswv tsis ntxeev cai thiab tsis saib leejtwg ntsej muag thiab tsis yuav nyiaj xiab.

8 Tsis tag li ntawd xwb Yahsafas tsa cov Levis thiab cov pov thawj qee leej thiab Ixayees cov thawj hauv txhua xeem hauv Yeluxalees ua cov uas tu tej plaub uas ntsig txog (יחוח)Yahweh kevcai thiab tu tej plaub ntug uas hais tsis haum. Lawv ua haujlwm rau hauv Yeluxalees xwb.  

9 Thiab nws qhia rau lawv tias, nej yuav tau paub ntshai (יחוח)Yahweh ua tej haujlwm no.  Nej yuav tau mob siab ua kom kawg nej lub siab lub ntsws txhob tso tseg.  

10 Thaum nej cov kwvtij uas nyob hauv lawv tej moos coj lawv tej plaub tuaj txog nej, tsis hais kev sib tua lossis plaub ua txhaum txoj kevcai thiab tej lus cob qhia thiab tej kab ke thiab tej kevcai twg kuj xij mas nej yuav tau qhuab ntuas lawv kom lawv tsis txhob ua txhaum rau (יחוח)Yahweh, mas (יחוח)Yahweh txojkev npau taws thiaj tsis poob rau saum nej thiab nej cov kwvtij. Nej yuav tau ua li no nej thiaj tsis muaj txim.

11 Tus pov thawj hlob Amaliyah kuj kav nej rau hauv txhua yam uas ntsig txog (יחוח)Yahweh, thiab Yisama‑ees tus tub Xenpa-diyah uas ua thawj hauv xeem Yahdah kuj kav nej rau txhua yam uas ntsig txog vajntxwv, thiab cov Levis yuav ua tub teg tub taws pab nej. Nej cia li ua siab loj siab tuab ua haujlwm. Thov (יחוח)Yahweh nrog nraim tus uas ua ncaj.