Yahsafas Kov Yeej Cov Mau‑as Thiab Cov Asmoos

1 Los rau tom qab no cov Mau‑as thiab cov Asmoos nrog cov Me-unis qee leej tuaj ua rog rau Yahsafas.

2 Muaj tibneeg tuaj hais rau Yahsafas tias, muaj ib pab tub rog coob heev tuaj ntawm Edoos tebchaws tuaj, yog tuaj ntawm hiav txwv sab tim ub tuaj tawm tsam koj.  Saib maj, lawv tuaj txog Haxaxoos Thamas lawm. (Haxaxoos Thamas yog Eekedis).  

3 Ces Yahsafas txawm ntshai heev thiab nws mob siab nrhiav (יחוח)Yahweh thiab tshaj tawm thoob plaws Yahdah tebchaws kom yoo mov.

4 Mas cov Yahdah tuaj txoos ua ke nrhiav kev pab ntawm (יחוח)Yahweh. Lawv tuaj hauv Yahdah txhua lub moos tuaj ua nug rau (יחוח)Yahweh.

5 Mas Yahsafas sawv ntsug ntawm cov Yahdah thiab cov tibneeg Yeluxalees uas tuaj txoos ua ke ntawd, hauv (יחוח)Yahweh lub tuam tsev ntawm lub tshav puam tshiab,

6 thiab nws hais tias, Au (יחוח)Yahweh uas yog peb tej poj koob yawm txwv Tus Tswv, koj tsis yog Tus Tswv uas nyob saum ntuj lov? Koj tsis kav tag nrho txhua haiv neeg tej tebchaws lov? Koj txhais tes muaj hwjchim thiab muaj zog, thiaj tsis muaj leejtwg tawm tsam tau koj.

7 Au peb Tus Tswv, koj tsis tau ntiab cov tibneeg hauv lub tebchaws no khiav tawm ntawm koj haiv neeg Ixayees xub ntiag lov, thiab muab lub tebchaws rau koj tus kwv luag Anplaham caj ces mus ib txhis lov?

8 Lawv tau nyob rau hauv thiab tau ua lub chaw rau koj lub npe nyob, thiab hais tias,

9 yog muaj xwm txheej phem tshwm tuaj rau peb, tsis hais hniav ntaj, kev teem txim, mob kis thiab kev tshaib plab los yog, peb yuav sawv ntsug ntawm lub tuam tsev no rau ntawm koj xub ntiag, vim koj lub npe nyob hauv lub tuam tsev no, thiab peb yuav nyob hauv kev txom nyem nyuaj siab no quaj thov koj, mas koj yuav mloog thiab cawm kom dim.

10 Nimno cov Asmoos thiab cov Mau‑as thiab cov uas nyob saum lub roob Xe‑is, yog tej tebchaws uas koj tsis kheev cov Ixayees txeem mus rau hauv rau thaum lawv tawm hauv Iziv tebchaws los, mas lawv thiaj lug tsis ua kom puam tsuaj, 11 saib maj, lawv cov ntawd ua pauj rau peb li no.  Lawv tuaj ntiab peb tawm hauv lub tebchaws uas koj muab ua qub txeeg qub teg rau peb.

12 Au peb Tus Tswv, koj yuav tsis rau txim rau lawv lov? Rau qhov peb tsis muaj hwj chim uas yuav tiv thaiv tau pab tub rog coob heev uas tuaj ua rog rau peb no. Peb tsis pom qab yuav ua li cas, peb lub qhov muag saib ntsoov rau koj xwb. 13 Thaum ntawd Yahdah cov txivneej sawvdaws thiab lawv tej pojniam thiab tej menyuam yaus, menyuam mos kuj sawv ntawm (יחוח)Yahweh xub ntiag.

14 Mas (יחוח)Yahweh Tus Ntsuj Plig Dawb Huv los rau hauv Xekhaliyah tus tub Yahaxi‑ees rau thaum nws nyob hauv ib tsoom tib neeg ntawd. Nws yawg yog Npenayah, nws yawg koob yog Ye‑i‑ees, nws yawg suab yog Mathaniyah, yog xeem Levis, yog Axas cum.

15 Yahaxi‑ees hais tias, cov Yahdah sawv daws thiab cov uas nyob hauv Yeluxalees, thiab vajntxwv Yahsafas, nej cia li mloog.

(יחוח)Yahweh hais li no rau nej tias, tsis txhob ntshai, tsis txhob poob siab rau pab tub rog coob heev ntawd, rau qhov kev ua rog tsis yog nej li tiamsis yog (יחוח)Yahweh li.

16 Tagkis nej cia li nqis mus ua rog rau lawv. Lawv yuav nce taug txojkev ntawm lub moos Xib tuaj.  Nej yuav ntsib lawv ntawm lub hauv hav hauv tebchaws moj sab qhua Yelu‑ees.

17 Zaum rog no tsis txog nej yuav tawm tsam li. Yahdah thiab Yeluxalees es, cia li npaj txhij rau ntawm lub chaw ua rog, sawv twj ywm, thiab saib (יחוח)Yahweh kov yeej rau nej. Tsis txhob ntshai, tsis txhob poob siab.  Tagkis cia li mus tawm tsam lawv, thiab (יחוח)Yahweh yuav nrog nraim nej.

18 Ces Yahsafas txawm nyo hau ua lub plhu ti nkaus hauv av thiab cov Yahdah sawvdaws thiab cov tibneeg Yeluxalees cia li khwb nkaus ntawm (יחוח)Yahweh xub ntiag pe hawm (יחוח)Yahweh.

19 Ces cov Levis uas yog Khauhas caj ces thiab Khaulas caj ces thiaj li sawv tsees tsa suab nrov qhuas (יחוח)Yahweh uas yog cov Ixayees Tus Tswv. 

20 Tagkis tom qab lawv sawv ntxov mus rau hauv tebchaws moj sab qhua Thekhau‑as. Thaum lawv tawm mus Yahsafas sawv ntsug hais tias, cov Yahdah thiab cov uas nyob hauv Yeluxalees cia li mloog kuv hais. Cia li ntseeg (יחוח)Yahweh uas yog nej Tus Tswv mas nej yuav nyob ruaj khov. Cia li ntseeg (יחוח)Yahweh cov tibneeg uas cev lus mas nej yuav ua tau kom tiav.

21 Thaum nws sablaj rau cov pejxeem lawm, nws tsa cov uas yuav hu nkauj rau (יחוח)Yahweh thiab hnav tej tsoos tsho muaj meej mom dawb huv qhuas (יחוח)Yahweh, thiab mus ua cov tub rog ntej hu tias, cia li ua

(יחוח)Yahweh tsaug, rau qhov nws txojkev hlub ruaj khov nyob mus ib txhis.

22 Thaum lawv pib hu nkauj thiab qhuas,(יחוח)Yahweh npaj cov uas zov kev tos tawm tsam cov Asmoos, thiab cov Mau‑as thiab cov uas nyob saum lub roob Xe‑is uas tau tuaj ua rog rau cov Yahdah, lawv thiaj li swb tawg khiav tag lawm. 23 Rau qhov cov Asmoos thiab cov Mau‑as sawv tsees tawm tsam cov pem roob Xe‑is, ua rau lawv puam tsuaj tag. Thaum lawv ua rau cov Xe‑is puam tsuaj tag, lawv sawvdaws kuj rov sib tua ua rau lawv puam tsuaj tag thiab.

24 Thaum cov Yahdah nce mus rau saum lub chaw tsom faj uas saib rau tebchaws moj sab qhua, lawv saib mus rau pab tub rog coob heev ntawd, ua ciav pom cev tuag pawg lug rau hauv av, tsis tshuav ib tug dim li.

25 Thaum Yahsafas thiab nws cov tub rog tuaj khaws luag tej qhov txhia chaw, mas lawv pom tej tsiaj coob kawg thiab tej cuab yeej thiab tsoos tsho thiab tej yam uas muaj nqis, lawv khaws mus txog thaum ris tsis taus lawm.  Lawv khaws tej uas txeeb tau ntawd

tau peb hnub, vim yog muaj ntau kawg li.  

26 Hnub uas plaub lawv tuaj txoos ua ke rau hauv lub hav Npelakhas, thiab qhuas (יחוח)Yahweh qhov ntawd.  Vim li no thiaj hu lub chaw ntawd tias lub hav Npelakhas los txog niaj hnub nimno.

27 Ces Yahsafas txawm coj cov Yahdah thiab cov Yeluxalees txhua tus rov los rau hauv Yeluxalees yam kaj siab lug, rau qhov (יחוח)Yahweh ua rau lawv zoo siab kawg li, vim yeeb ncuab swb tag lawm.

28 Lawv thiaj muaj suab nkauj nog ncas me suab nkauj nog ncas loj thiab suab raj xyu rov los rau hauv Yeluxalees thiab los rau ntawm

(יחוח)Yahweh lub tuam tsev.

29 Ib tsoom teb chaws sawvdaws ntshai (יחוח)Yahweh rau thaum lawv hnov tias (יחוח)Yahweh tawm tsam Ixayees cov yeeb ncuab.

30 Yahsafas lub tebchaws thiaj li nyob tus yees, rau qhov nws Tus Tswv pub nws so tsis ua rog rau txhua fab.

​

Lub Sijhawm Kawg Uas Yahsafas Kav

(1 Vajntxwv 22:41-50)

31 Yahsafas ua vajntxwv kav Yahdah li no. Thaum nws pib ua vajntxwv kav, nws hnub nyoog muaj peb caug tsib xyoos, nws nyob hauv Yeluxalees kav tau nees nkaum tsib xyoos.  Nws niam npe hu ua Axunpas uas yog Sihis tus ntxhais.

32 Nws taug nraim nws txiv Axas tus hneev taw, tsis tig mus rau sab twg li. Nws ua tej uas (יחוח)Yahweh pom tias zoo.

33 Tiamsis tej chaw siab teev dab tseem tsis tau muab rhuav pov tseg, cov pejxeem tseem tsis tau muab siab npuab lawv tej poj koob yawm txwv Tus Tswv.

34 Lwm yam haujlwm uas Yahsafas ua txij thaum pib mus txog thaum kawg mas twb muab sau cia rau hauv Hananis tus tub Yahus phau ntawv keeb kwm, uas sau ua ke rau hauv phau ntawv uas hais txog cov Ixayees tej vajntxwv lawm.

35 Los rau tom qab no, cov Yahdah tus vajntxwv Yahsafas nrog cov Ixayees tus vajntxwv Ahaxiyah uas ua phem kawg sib raug zoo.  

36 Nws koom nrog ua tej nkoj txwg uas yuav mus rau lub moos Thasis, nkawv ua tej nkoj ntawd hauv lub moos Exi‑oos Kenpaws.

37 Mas Eliyexaws uas yog Daudayah tus tub hauv lub moos Malesas cev (יחוח)Yahweh lus rau Yahsafas tias, vim yog koj koom nrog Ahaxiyah ua haujlwm, (יחוח)Yahweh yuav ua rau tej uas koj ua puam tsuaj. Mas tej nkoj ntawd thiaj tawg piam tag mus tsis txog lub moos Thasis.