1 Yahsafas kuj tuag mus nrog nws tej poj koob yawm txwv nyob thiab lawv muab nws faus nrog nws tej poj koob yawm txwv ua ke rau hauv Daviv lub nroog mas nws tus tub Yahlas sawv nws chaw ua vajntxwv kav.

2 Yahlas cov kwv uas yog Yahsafas cov tub yog Axaliyah, Yehi‑ees, Xekhaliyah, Axaliyah, Mikha‑ees thiab Sefathiyah.  Cov no yog Yahdah tus vajntxwv Yahsafas cov tub.

3 Lawv txiv pub tej qhov txhia chaw uas xuas nyiaj xuas kub ua thiab tej uas muaj nqis heev, thiab pub tej moos hauv Yahdah uas muaj ntsa loog rau lawv. Tiamsis nws pub lub tebchaws rau Yahlas kav rau qhov nws yog tus tub hlob.

​

Yahlas Ua Vajntxwv Kav

(2 Vajntxwv 8:16-24)

4 Thaum Yahlas sawv los nyob saum nws txiv lub zwm txwv thiab ua vajntxwv ruaj khov lawm, nws xuas ntaj tua nws cov kwv huvsi thiab tua Yahdah cov thawj qee leej pov tseg.  

5 Thaum Yahlas pib ua vajntxwv kav, nws hnub nyoog muaj peb caug ob xyoos, nws nyob hauv Yeluxalees kav tau yim xyoo.

6 Nws taug nraim cov Ixayees tej vajntxwv tus hneev taw, yog ua raws li Ahaj caj ces, vim yog nws yuav Ahaj tus ntxhais ua poj niam. Tej uas nws ua mas (יחוח)Yahweh pom tias phem.

7 Txawm li cas los (יחוח)Yahweh yeej tsis ua rau Daviv caj ces puam tsuaj tag, vim yog tej lus uas nws nrog Daviv cog tseg, thiab vim nws twb cog lus tseg tias nws yuav pub ib lub teeb ci rau Daviv thiab rau Daviv caj ces mus ib txhis.

8 Ntu uas Yahlas ua vajntxwv mas Edoos ntxeev siab rau Yahdah thiab tsa dua ib tug vajntxwv kav lawv.

9 Mas Yahlas thiaj coj nws cov thawj rog thiab nws tej tsheb ua rog huvsi ua ke hla mus.  Thaum hmo ntuj nws txawm mus ntaus cov Edoos uas tuaj vij nws thiab nws cov thawj uas kav nws tej tsheb ua rog.  

10 Cov Edoos thiaj ntxeev siab tsis zwm rau cov Yahdah los txog niaj hnub nimno.  Thiab lub sijhawm ntawd lub moos Linas kuj ntxeev siab tsis zwm rau Yahlas lawm, rau qhov nws tau tso (יחוח)Yahweh uas yog nws tej poj koob yawm txwv Tus Tswv tseg.

11 Dua li ntawd nws tseem ua tej chaw siab teev dab rau saum Yahdah tej roob, thiab coj cov tibneeg hauv Yeluxalees tso (יחוח)Yahweh tseg thiab ua rau cov Yahdah yuam kev lawm.

12 Mas muaj ib tsab ntawv tuaj ntawm Eliyah uas ua xibhwb cev (יחוח)Yahweh lus tuaj hais tias, (יחוח)Yahweh uas yog koj yawg koob Daviv Tus Tswv hais li no tias, vim yog koj tsis tau ua raws nraim li koj txiv Yahsafas txojkev thiab tsis ua raws li Yahdah tus vajntxwv Axas txojkev,

13 tiamsis koj taug nraim Ixa-yees tej vajntxwv tus hneev taw thiab coj cov Yahdah thiab cov tibneeg hauv Yeluxalees tso (יחוח)Yahweh tseg, ib yam li Ahaj caj ces coj cov Ixayees tso (יחוח)Yahweh tseg, thiab vim koj tau tua koj cov kwv uas yog koj txiv caj ces thiab lawv zoo dua koj,

14 saib maj, (יחוח)Yahweh yuav tso tej mob phem loj los raug koj cov tibneeg thiab koj cov menyuam thiab koj tej pojniam thiab koj tej qhov txhia chaw huvsi.

15 Koj yuav raug ntau yam mob, koj tej plab tej nyhuv yuav mob heev mus txog thaum tej plab nyhuv tawm los hnub tag hnub thiab yuav tsis txawj zoo. 

16 (יחוח)Yahweh ua rau cov Filixatees thiab cov Alas uas nyob ze cov tibneeg Ithi-aupiam chim rau Yahlas.  

17 Ces lawv thiaj tuaj ua rog rau Yahdah thiab txeem mus rau hauv lub tebchaws, mas txeeb tej qhov txhia chaw hauv vajntxwv tsev huvsi thauj mus thiab coj nws tej tub, tej pojniam mus tsis tshuav tub nrog nws nyob li, tsuas yog tshuav Ahaxiyah uas yog tus tub ntxawg xwb.

18 Thaum dhau tej xwm txheej ntawd lawm, (יחוח)Yahweh ua rau Yahlas tej plab nyhuv mob kho tsis tau li.

19 Dhau ob xyoos tom qab, nws tej plab nyhuv tawm los tag, ces nws txawm tuag vim tim tus mob ntawd. Nws cov pejxeem tsis rauv ib cub tawg loj heev ua koob meej rau nws ib yam li lawv rauv rau nws tej poj koob yawm txwv.

20 Thaum Yahlas pib kav, nws muaj peb caug ob xyoos, nws ua vajntxwv kav hauv Yeluxalees tau yim xyoo.  Nws tuag tsis muaj leejtwg nco li. Lawv muab nws faus rau hauv Daviv lub nroog, tiamsis tsis yog faus rau hauv vajntxwv tej qhov ntxa.