Ahaxiyah Ua Vajntxwv Kav

(2 Vajntxwv 8:25-29,9:21-28)

1 Cov tibneeg hauv Yeluxalees tsa Yahlas tus tub ntxawg Ahaxiyah ua vajntxwv nyob nws txiv chaw, rau qhov nws cov tijlaug sawvdaws raug ib pab tub rog uas nrog cov Alas tuaj rau hauv lub yeej muab tua tuag tag lawm.  Yog li ntawd Yahlas tus tub Ahaxiyah thiaj ua tus kav Yahdah.

2 Thaum Ahaxiyah pib ua vajntxwv kav ntawd, nws muaj nees nkaum ob xyoos, nws nyob hauv Yeluxalees kav tau ib xyoos.  Nws niam npe hu ua Athaliyah, yog Oolis li xeeb ntxwv.

3 Ahaxiyah taug nraim Ahaj caj ces tus hneev taw, rau qhov nws niam yog tus uas taw qhia nws ua phem.  

4 Nws ua tej uas (יחוח)Yahweh pom tias phem kawg ib yam li Ahaj caj ces ua, rau qhov thaum nws txiv tuag lawd, lawv cov ntawd ua nws lub chaw sablaj thiaj ua rau nws raug kev puam tsuaj.  

5 Nws ua raws li uas lawv qhia, nws thiaj nrog Ahaj tus tub Yahlas mus ua rog rau cov Alas tus vajntxwv Haxa‑ees ntawm Lamaus Kile‑as, mas cov Alas tua raug Yahlas mob.  

6 Yahlas txawm rov qab mus kho mob rau ntawm lub moos Yile‑ees, yog mus kho qhov mob uas nws raug ntawm Lamas rau thaum uas nws ua rog rau cov Alas tus vajntxwv Haxa‑ees. Mas Yahlas tus tub Ahaxiyah uas ua vajntxwv kav Yahdah thiaj mus saib Ahaj tus tub Yahlas rau hauv lub moos Yile‑ees vim yog Yahlas raug mob.

7 (יחוח)Yahweh siv lub sijhawm uas Ahaxiyah mus saib Yahlas ntawd txov kom nws puam tsuaj. Thaum nws mus ntawd nws nrog Yahlas mus ntsib Nisis tus tub Yahus, uas (יחוח)Yahweh twb hliv roj ywg tsa cia ua tus txov Ahaj caj ces lawm.  

8 Thaum Yahus tab tom rau txim rau Ahaj caj ces, nws ntsib Yahdah cov thawj thiab Ahaxiyah cov tijlaug cov tub uas ua haujlwm rau Ahaxiyah, ces nws txawm muab lawv tua pov tseg tag.  

9 Nws kuj nrhiav Ahaxiyah. Mas Ahaxiyah raug ntes rau hauv lub nroog Xamalis uas nws khiav nkaum, thiab raug coj los rau ntawm Yahus thiab raug muab tua pov tseg. Lawv muab nws faus rau qhov lawv hais tias, nws yog Yahsafas uas nrhiav (יחוח)Yahweh kawg siab kawg ntsws tus xeeb ntxwv.  Ahaxiyah caj ces tsis muaj ib tug yuav sawv tau los ua vajntxwv kav lub tebchaws lawm.

​

Athaliyah Txeeb Kav Tebchaws

(2 Vajntxwv 11:1-3)

10 Thaum Athaliyah uas yog Ahaxiyah niam pom tias nws tus tub tuag lawm ces nws txawm sawv tsees tua Yahdah tej vajntxwv caj ces huvsi pov tseg.

11 Tiamsis vajntxwv Yahlas tus ntxhais Yahsanpis tau coj Ahaxiyah tus tub Yahas nyiag khiav tawm hauv vajntxwv cov tub uas yuav raug tua mus lawm. Nws muab Yahas thiab tus uas tu nws zais rau hauv ib lub txaj pw. Yahlas tus ntxhais Yahsanpis uas yog Ahaxiyah tus muam thiab yog tus pov thawj Yahyadas tus pojniam thiaj muab Yahas zais ntawm Athaliyah li no, xwv Athaliyah thiaj tua tsis tau nws.

12 Yahas khiav nkaum rau hauv (יחוח)Yahweh lub tuam tsev nrog lawv nyob tau rau xyoo, rau ncua sijhawm uas Athaliyah kav lub tebchaws.