Yahyadas Tsa Yahas Ua Vajntxwv

(2 Vajntxwv 11:4-21)

1 Xyoo uas xya Yahyadas muaj siab tuab thiab nrog cov thawj rog uas kav ib puas leej sib cog lus, yog Axaliyah tus tub Yelauhas, Yahkanas tus tub Yisama‑ees, Aunpes tus tub Axaliyah, Adayah tus tub Ma‑axeyah thiab Xikhis tus tub Elisafas.

2 Lawv mus thoob plaws Yahdah tebchaws thiab sau cov Levis hauv Yahdah txhua lub moos thiab cov thawj hauv Ixayees tej cum tuaj, mas lawv tuaj rau hauv Yeluxalees.

3 Lawv cov uas tuaj txoos ua ke ntawd cog lus rau vajntxwv hauv ()Yahweh lub tuam tsev.  Yahyadas hais rau lawv tias, saib maj, no yog vajntxwv tus tub. Cia nws ua vajntxwv kav raws li uas (יחוח)Yahweh hais cia txog Daviv cov tub.

4 Nej yuav tau ua li no.  Nej cov pov thawj thiab cov Levis uas tuaj ua haujlwm rau hnub Sabbath, mas muab faib ua peb feem, ib feem yuav nyob zov tej rooj loog,

5 ib feem yuav zov ntawm vajntxwv lub tsev thiab ib feem yuav zov ntawm lub Rooj Loog Muaj Taw Tiag. Cov pejxeem sawvdaws yuav tau tuaj nyob rau hauv tej tshav puam ntawm (יחוח)Yahweh lub tuam tsev.

6 Tsis txhob kheev leejtwg nkag mus rau hauv (יחוח)Yahweh lub tuam tsev, tsuas yog cia cov pov thawj thiab cov Levis uas ua hauj lwm nkag mus xwb. Lawv nkag tau xwb, vim lawv yog cov dawb huv, tiamsis cov pejxeem sawvdaws yuav tau ua raws li (יחוח)Yahweh hais.

7 Cov Levis yuav tau nyob vij vajntxwv, txhua tus nyias tuav rawv nyias tej cuab yeej. Leejtwg nkag rau hauv lub tuam tsev, yuav raug muab tua. Nej yuav tau nrog nraim vajntxwv rau thaum nws nkag los thiab tawm mus.

8 Cov Levis thiab cov Yahdah sawvdaws ua raws li tus pov thawj Yahyadas hais rau lawv txhua yam, nyias coj nyias cov tub rog tuaj, tsis hais cov uas so haujlwm rau hnub Sabbath thiab cov uas yuav nkag mus ua haujlwm rau hnub Sabbath, rau qhov tus pov thawj Yahyadas tsis kheev ib pab twg so haujlwm li.

9 Mas tus pov thawj Yahyadas muab vajntxwv Daviv cov hmuv thiab cov phiaj hlau thaiv, tsis hais daim me daim loj uas nyob hauv (יחוח)Yahweh lub tuam tsev rau cov thawj rog.

10 Nws tsa cov pejxeem sawvdaws ua cov uas zov vajntxwv, txhua tus tuav rawv nyias li cuab yeej nyob vij nkaus lub thaj thiab vij (יחוח)Yahweh lub tuam tsev sab ped sab nrad huvsi.

11 Ces nws txawm coj vajntxwv tus tub tawm los thiab muab lub mom vajntxwv ua rau ntoo thiab muab (יחוח)Yahweh tej kevcai rau nws thiab lawv tshaj tawm tias nws ua vajntxwv. Yahyadas thiab nws cov tub muab roj hliv ywg tsa nws, thiab lawv hais tias, thov kom vajntxwv muaj txojsia loj siav ntev.

12 Thaum Athaliyah hnov cov pejxeem lub suab dhia thiab qhuas vajntxwv, nws txawm mus rau ntawm cov pejxeem hauv (יחוח)Yahweh lub tuam tsev.

13 Thaum nws tsa muag saib, nws pom tus vajntxwv sawv ntawm tus ncej uas nyob ib sab qhov rooj tuam tsev, thiab muaj cov thawj rog thiab cov uas tshuab raj xyu nyob ib sab ntawm vajntxwv, thiab cov pej xeem thoob tebchaws sawvdaws zoo siab thiab tshuab raj xyu, thiab cov tub hu nkauj muaj suab cuab yeej phim nkauj coj sawv daws hu zoo siab xyiv fab. Mas Athaliyah kuj dua rhe nws lub tsho qw hais tias, ntxeev siab lauj, ntxeev siab lauj!

14 Pov thawj Yahyadas txawm coj cov thawj rog uas kav cov tub rog tawm los thiab hais rau lawv tias, cia li coj Athaliyah tawm hauv cov tub rog mus.  

Yog leejtwg raws nws qab mas xuas ntaj tua pov tseg. Rau qhov tus pov thawj hais tias, tsis txhob tua nws rau hauv (יחוח)Yahweh lub tuam tsev.

15 Lawv thiaj ntes nws, mas nws taug txojkev mus rau hauv Rooj Loog Nees ntawm vajntxwv lub tsev ces lawv muab nws tua rau qhov ntawd lawm.

16 Mas Yahyadas kom cov pejxeem sawv daws thiab tus vajntxwv nrog nws cog lus tseg tias, lawv yuav ua (יחוח)Yahweh haiv neeg.  

17 Mas cov pejxeem sawvdaws mus rau ntawm lub tsev dab Npa‑as thiab muab lub tsev ntawd rhuav pov tseg. Lawv muab lub thaj thiab tej dab mlom Npa‑as tsoo ua tej dwb daim tag, thiab tua tus pov thawj Mathas uas teev dab Npa‑as rau ntawm tej thaj ib sab.

18 Qhov uas zov (יחוח)Yahweh lub tuam tsev Yahyadas muab tso rau cov pov thawj uas yog xeem Levis thiab rau cov Levis uas Daviv tau tsa cia kom saib (יחוח)Yahweh lub tuam tsev thiab tua tsiaj hlawv xyeem rau (יחוח)Yahweh raws li uas sau cia rau hauv Mauxes txoj kev cai, thiab lawv yuav hu nkauj zoo siab kawg raws li Daviv tu cia.  

19 Nws tso cov uas zov tej rooj loog kom zov tej rooj loog hauv (יחוח)Yahweh lub tuam tsev xwv thiaj tsis muaj ib tug uas tsis huv qhov twg nkag tau mus rau hauv.

20 Nws coj cov thawj rog, thiab cov uas ua hlob thiab cov uas kav pejxeem thiab cov pejxeem sawvdaws nrog nws mus, mas lawv coj tus vajntxwv nqis ntawm (יחוח)Yahweh lub tuam tsev taug txojkev hauv lub rooj loog sab ped mus rau hauv vajntxwv lub tsev. Thiab lawv muab nws txawb zaum rau saum vajntxwv lub zwm txwv.

21 Cov pejxeem thoob tebchaws sawvdaws zoo siab heev thiab lub nroog kuj nyob tus yees rau thaum Athaliyah raug xuas ntaj tua lawm.