2 VAJ KEEB KWM 25

Amaxiyah Ua Vajntxwv Kav Yahdah

(2 Vajntxwv 14:2-7)

1 Thaum Amaxiyah pib ua vajntxwv kav, nws hnub nyoog muaj nees nkaum tsib xyoos, nws nyob hauv Yeluxalees kav tau nees nkaum cuaj xyoo.  Nws niam npe hu ua Yahadas, yog tibneeg hauv Yeluxalees.

2 Nws ua tej uas (יחוח)Yahweh pom tias zoo tiamsis tsis yog muaj siab dawb paug ua.

3 Thaum nws muaj hwjchim kav lub teb chaws hauv nws txhais tes ruaj khov lawm nws txawm muab cov tub teg tub taws uas tua nws txiv tua pov tseg.

4 Tiamsis nws tsis tau tua lawv tej tub, raws li uas muaj sau cia rau hauv Mauxes phau ntawv kevcai uas (יחוח)Yahweh hais tias, leej txiv yuav tsis ris nws tej menyuam lub txim tuag, thiab tej menyuam yuav tsis ris leej txiv lub txim tuag. Cia txhua tus nyias ris nyias lub txim tuag.

5 Amaxiyah hu cov Yahdah tuaj txoos ua ke, thiab tsa cov thawj uas kav ib txhiab leej thiab kav ib puas leej rau hauv nyias cum tag nrho cov Yahdah thiab cov Npeeyamees huvsi.

Nws suav cov uas muaj nees nkaum xyoo rov saud, mas pom tias yog cov tub rog uas txawj tshaj plaws thiab npaj txhij ua rog thiab tuav rawv hmuv thiab daim phiaj hlau mas muaj 300,000 leej.

6 Dua li ntawd nws muab ib puas talas nyiaj ntiav cov tub rog Ixayees siab loj siab tuab 100,000 leej.

7 Tiamsis (יחוח)Yahweh ib tug tibneeg tuaj cuag nws thiab hais tias, Au vajntxwv, koj tsis txhob cia Ixayees pab tub rog nrog koj mus, rau qhov (יחוח)Yahweh tsis nrog nraim cov Ixayees, nws yeej tsis nrog cov tibneeg Efa‑is sawvdaws no lawm.

8 Tiamsis yog koj xav tias qhov uas ua li no yuav ua rau koj muaj zog ua rog, mas (יחוח)Yahweh yuav ua rau koj puam tsuaj tag rau hauv koj cov yeeb ncuab txhais tes. Rau qhov (יחוח)Yahweh muaj hwjchim pab kom kov yeej lossis ua kom puam tsuaj.

9 Ces Amaxiyah hais rau (יחוח)Yahweh tus tibneeg tias, kuv yuav ua li cas rau ib puas talas nyiaj uas kuv muab rau cov Ixayees pab tub rog lawm? (יחוח)Yahweh tus tibneeg teb hais tias, (יחוח)Yahweh muaj peev xwm yuav muab ntau dua li ntawd pub rau koj.

10 Ces Amaxiyah txawm tso cov tub rog uas tuaj pem Efa‑is tebchaws tuaj rov qab mus tsev.  Lawv thiaj chim heev rau cov Yahdah thiab rov qab mus tsev ua npau taws kawg.

11 Ces Amaxiyah muaj siab tuab thiab coj nws cov tub rog tawm mus rau lub hav Ntsev mas ntaus cov Xe‑is tuag kaum txhiab leej.  

12 Cov Yahdah ntes tau dua kaum txhiab leej cov uas tseem ciaj sia coj mus rau saum lub roob tsuas, mas muab lawv pov poob saum hauv tsua los. Lawv sawvdaws poob los ntsawm ntuag ua tej dwb daim.

13 Tiamsis cov tub rog uas Amaxiyah muab tso rov mus tsis cia lawv nrog nws mus ua rog ntawd, txawm mus ntaus Yahdah tej moos txij ntua Xamalis mus txog lub moos Npe Hauloos, thiab tua cov pejxeem tuag peb txhiab leej thiab lwg tau tej qhov txhia chaw ntau kawg.

14 Thaum Amaxiyah mus tua cov Edoos rov los, nws txawm coj cov tibneeg Xe‑is tej dab mlom los teev ua nws li dab, thiab nws pe hawm thiab xyeem qhov txhia chaw rau tej dab mlom ntawd.

15 Vim li ntawd (יחוח)Yahweh thiaj chim rau Amaxiyah thiab txib ib tug xibhwb cev lus tuaj cuag nws hais rau nws tias, ua cas koj nrhiav lwm haiv neeg tej dab uas tsis txawj pab lawv haiv neeg dim hauv koj txhais tes?

16 Thaum tus xibhwb tab tom hais, vajntxwv hais rau nws tias, peb tau tsa koj ua vajntxwv lub chaw sablaj lov? Tsis txhob hais ntxiv.  Ua cas koj yuav yeem tuag?

Tus xibhwb cev (יחוח)Yahweh lus txawm tseg thiab hais tias, kuv paub tias (יחוח)Yahweh txiav txim siab yuav ua rau koj puam tsuaj, rau qhov koj tau ua tej no thiab tsis mloog tej lus uas kuv hais.

Ua Rog Rau Cov Ixayees

(2 Vajntxwv 14:8-20)

17 Cov Yahdah tus vajntxwv Amaxiyah sab laj mas txib tibneeg mus cuag Yahas uas ua vajntxwv kav Ixayees, Yahas txiv yog Yahahas, nws yawg yog Yahus, mas hais tias, cia li tuaj, es wb yuav ua rog tim ntsej tim muag.

18 Mas Yahas uas ua vajntxwv kav Ixayees xa xov mus rau Amaxiyah uas ua vajntxwv kav Yahdah hais tias, ib tsob pos pem lub roob Lenpanoos xa xov mus rau ib tsob ntoo ciab saum roob Lenpanoos hais tias, cia li muab koj tus ntxhais qua rau kuv tus tub. Ces muaj ib tug tsiaj qus nyob pem Lenpanoos txawm hla mus muab tsob pos ntawd tsuj pes kiag.  

19 Koj hais tias, saib maj, kuv twb ntaus yeej cov Edoos lawm, mas koj lub siab thiaj tsab ua loj khav theeb li no. Cia li nyob twjywm hauv tsev nawb. Ua cas koj yuav tshum kom muaj kev kub ntxhov ua rau koj thiab cov Yahdah puam tsuaj ua ke?

20 Tiamsis Amaxiyah tsis mloog, vim tej no yog (יחוח)Yahweh ua kom thiaj muab tau lawv cob rau hauv yeeb ncuab txhais tes, rau qhov lawv mus nrhiav Edoos tej dab.

21 Cov Ixayees tus vajntxwv Yahas thiaj li mus mas nws thiab cov Yahdah tus vajntxwv Amaxiyah thiaj sib ntsib ua rog rau ntawm lub moos Npesemes hauv Yahdah tebchaws.

22 Cov Yahdah txawm swb cov Ixayees, txhua tus thiaj khiav rov mus rau hauv nyias vaj nyias tsev tag lawm.

23 Cov Ixayees tus vajntxwv Yahas kuj ntes cov Yahdah tus vajntxwv Amaxiyah uas yog Yahas tus tub thiab yog Ahaxiyah tus xeeb ntxwv ntawm Npesemes, mas coj nws mus rau ntawm Yeluxalees thiab muab lub ntsa loog tsoo pob tag plaub puas tshim, txij ntua lub Rooj Loog Efa‑is mus txog ntua lub rooj loog ntawm lub kaum loog.

24 Yahas muab tej kub, tej nyiaj huvsi thiab tej twj siv huvsi uas nyob hauv (יחוח)Yahweh lub tuam tsev thiab ntes tau Aunpes Edoos. Nws kuj muab tej uas nyob hauv tej txhab nyiaj hauv vajntxwv tsev thiab yuam ib co tibneeg coj huvsi rov qab mus rau lub nroog Xamalis.

25 Thaum Yahahas tus tub Yahas uas yog cov Ixayees tus vajntxwv tuag lawm, Yahas tus tub Amaxiyah uas ua Yahdah tus vajntxwv tseem nyob tau kaum tsib xyoos ntxiv thiab.

26 Lwm yam hawjlwm uas Amaxiyah ua txij thaum pib mus txog thaum kawg mas twb muab sau cia rau hauv phau ntawv uas hais txog Yahdah thiab Ixayees tej vajntxwv lawm.

27 Txij thaum Amaxiyah tso (יחוח)Yahweh tseg, cov pejxeem txawm ntaus tswvyim ntxeev siab rau nws hauv Yeluxalees mas nws thiaj khiav mus rau lub moos Lakhis. Ces lawv tso tibneeg mus caum tau nws ntawm Lakhis mas muab nws tua qhov ntawd.  

28 Lawv muab nws lub cev tuag rau nees thauj los faus nrog nws tej poj koob yawm txwv ua ke rau hauv Daviv lub nroog.