Uxiyah Ua Vajntxwv Kav Yahdah

(2 Vajntxwv 14:21-22, 15:1-7)

1 Cov pejxeem sawvdaws hauv Yahdah txawm muab Uxiyah uas hnub nyoog muaj kaum rau xyoo tsa ua vajntxwv nyob nws txiv Amaxiyah chaw.

2 Thaum vajntxwv Amaxiyah tuag mus nrog nws tej poj koob yawm txwv nyob mas Uxiyah tsim kho lub moos Elas thiab rov muab rau Yahdah kav.

3 Thaum Uxiyah pib kav, nws hnub nyoog muaj kaum rau xyoo thiab nws nyob hauv Yeluxlees kav tau tsib caug ob xyoos. Nws niam npe hu ua Yekhau-liyah yog tibneeg hauv Yeluxalees.

4 Nws ua tej uas (יחוח)Yahweh pom tias zoo, ib yam li txhua yam uas nws txiv Amaxiyah tau ua lawd.

5 Nws rau siab ntso nrhiav (יחוח)Yahweh tag Xekhaliyah sim neej uas qhia nws paub ntshai (יחוח)Yahweh.  Thiab ncua sijhawm uas nws nrhiav (יחוח)Yahweh, mas (יחוח)Yahweh pub nws vam meej.

6 Nws tawm mus ua rog rau cov Filixatees mas tsoo lub moos Nkas thiab lub moos Yanes thiab lub moos Asadaus tej ntsa loog pob tag.  Thiab nws tsim muaj moos rau hauv Asadaus li ciam teb thiab rau lwm qhov hauv Filixatees tebchaws. 7 (יחוח)Yahweh pab nws ua rog ntaus cov Filixatees thiab cov Alas uas nyob hauv thaj tebchaws Kunpa‑as, thiab ntaus cov Me‑unis.

8 Cov Asmoos kuj them se rau Uxiyah mas nws lub koob meej thiaj nrov nto moo mus txog Iziv ciam teb, rau qhov nws muaj zog heev.

9 Dua li ntawd Uxiyah tseem tsim tej chaw tsom faj hauv Yeluxalees rau ntawm lub rooj loog ntawm lub kaum loog thiab lub Rooj Loog Hav thiab rau ntawm lub kaum ntsa loog, thiab ua kom ruaj khov.

10 Thiab nws tsim tej chaw tsom faj rau hauv tebchaws moj sab qhua, thiab khawb ntau lub pas dej rau ntawm tej pov roob Sefelas thiab rau nram tiaj nrag, vim nws muaj tsiaj txhu coob thiab nws muaj cov tibneeg ua teb thiab cov uas tu txiv hmab pem tej roob thiab rau hauv tej teb uas qoob zoo, vim nws nyiam ua teb. 

11 Dua li ntawd Uxiyah muaj tej pab tub rog uas npaj txhij ua rog muab faib ua tej pab raws li Ye‑i‑ees uas yog tus tub sau ntawv thiab tus thawj rog Ma‑axeyah tau txheeb cia, raws li vajntxwv tus tub teg tub taws Hananiyah qhia.

12 Cov thawj hauv txhua cum uas kav cov tub rog siab loj siab tuab huvsi muaj ob txhiab rau pua leej.

13 Cov no ua thawj kav 307,500 leej tub rog uas muaj zog ua tau rog uas yuav pab tau vajntxwv tawm tsam yeeb ncuab.

14 Thiab Uxiyah npaj daim hlau thaiv thiab hmuv thiab mom hlau thiab tsho hlau thiab rab hneev thiab qe zeb uas yuav fiav ntawm txoj hlua.  

15 Hauv Yeluxalees, nws muab tej qhaub uas tej Kws txawj ua nruab rau saum tej chaw tsom faj thiab ntawm tej kaum loog cia thiaj tau tua rab xub thiab qe zeb loj.  Nws lub koob meej nrov nto moo mus deb, vim yog nws tau txais kev pab ntau kawg mus txog thaum nws muaj zog heev.

16 Tiamsis thaum nws muaj zog lawd, nws txawm ua lub siab khav theeb thiaj li ua rau nws raug kev puam tsuaj. Nws ua tsis ncaj rau (יחוח)Yahweh uas yog nws Tus Tswv. Nws nkag mus hlawv hmoov tshuaj tsw qab rau saum lub thaj uas hlawv tshuaj tsw qab hauv (יחוח)Yahweh lub tuam tsev.

17 Mas tus pov thawj Axaliyah thiab (יחוח)Yahweh cov pov thawj yim caum leej uas siab loj siab tuab raws vajntxwv mus rau hauv.

18 Lawv tav vaj ntxwv Uxiyah thiab hais rau nws tias, Uxiyah, tsis yog koj li haujlwm mus hlawv tshuaj tsw qab xyeem rau (יחוח)Yahweh, yog cov pov thawj uas yog Aloos caj ces uas twb tu kom dawb huv lawd li haujlwm hlawv tshuaj tsw qab.  Koj cia li tawm hauv lub chaw pe hawm (יחוח)Yahweh no mus, rau qhov koj ua txhaum lawm, thiab koj yuav tsis tau koob meej abtsi ntawm (יחוח)Yahweh li.

19 Ces Uxiyah txawm chim kawg. Nws tseem tuav rawv lub yias rau ncaig taws hauv nws txhais tes yuav hlawv tshuaj tsw qab, ces thaum nws chim rau cov pov thawj ntawd, mob lig mob ruas txawm tshwm plaws rau ntawm nws hauv pliaj tab meeg cov pov thawj ntawm lub thaj hlawv tshuaj tsw qab ib sab hauv (יחוח)Yahweh lub tuam tsev.  

20 Tus pov thawj hlob Axaliyah thiab cov pov thawj sawvdaws saib ntsoov Uxiyah, ua ciav nws mob ruas rau ntawm nws hauv pliaj. Ces lawv txawm ceev nrooj muab nws thawb tawm mus.  Thiab nws maj nroos tawm mus, rau qhov (יחוח)Yahweh nplawm nws lawm.

21 Ces vajntxwv Uxiyah txawm mob ruas mus txog hnub uas nws tuag. Vim yog nws mob ruas nws thiaj nyob nws ib lub tsev, vim nws raug muab txiav tawm hauv (יחוח)Yahweh lub tuam tsev. Nws tus tub Yahthas ua tus uas saib xyuas vajntxwv lub tsev thiab kav cov pejxeem.

22 Lwm yam haujlwm uas Uxiyah ua txij thaum pib mus txog thaum kawg mas Amoj tus tub Isayah uas yog xibhwb cev (יחוח)Yahweh lus twb muab sau cia lawm.  

23 Uxiyah thiaj li tuag mus nrog nws tej poj koob yawm txwv nyob mas lawv muab nws faus ze nws tej poj koob yawm txwv rau hauv thaj teb uas yog vajntxwv li, rau qhov lawv hais tias, nws yog ib tug mob ruas. Mas nws tus tub Yahthas sawv nws chaw ua vajntxwv kav.