Yauthas Ua Vajntxwv Kav Yahdah

(2 Vajntxwv 15:32-38)

1 Thaum Yahthas pib ua vajntxwv kav, nws hnub nyoog muaj nees nkaum tsib xyoos, nws nyob hauv Yeluxalees kav tau kaum rau xyoo.  Nws niam npe hu ua Yelusas, yog Xadaus tus ntxhais.

2 Yahthas ua tej uas (יחוח)Yahweh pom tias zoo ib yam li txhua yam uas nws txiv Uxiyah tau ua, tsuas yog tseg tsis nkag mus rau hauv (יחוח)Yahweh lub tuam tsev xwb.  Tiamsis cov pejxeem tseem pheej ua tej kev phem kev qias.

3 Nws tsim kho (יחוח)Yahweh lub rooj loog tuam tsev sab ped, thiab tsim kho lub ntsa loog ntawm Aufees ntau heev.

4 Dua li ntawd nws tsim tej moos pem toj siab hauv Yahdah tebchaws thiab ua tej chaw zov khuav thiab tej chaw tsom faj rau hauv tej hav zoov.

5 Nws mus ua rog ntaus yeej cov Asmoos tus vajntxwv. Mas xyoo ntawd cov Asmoos pub ib puas talas nyiaj thiab kaum txhiab Khuas mog thiab kaum txhiab Khuas qeb rau nws.  Xyoo ob thiab xyoo peb cov Asmoos kuj them ib yam nkaus li no.

6 Yahthas thiaj muaj zog tuaj, rau qhov nws ua lub neej raws nraim li nws Tus Tswv txojkev.

7 Lwm yam haujlwm uas Yahthas ua thiab nws tej kev ua rog huvsi thiab nws lub neej, twb muab sau cia hauv phau ntawv uas hais txog Ixayees thiab Yahdah tej vajntxwv lawm.

8 Thaum nws pib ua vajntxwv kav, nws hnub nyoog muaj nees nkaum tsib xyoos, nws nyob hauv Yeluxalees kav tau kaum rau xyoo.

9 Yahthas tuag mus nrog nws tej poj koob yawm txwv nyob. Lawv muab nws faus rau hauv Daviv lub nroog, mas nws tus tub Ahas sawv nws chaw ua vajntxwv kav.