Ahas Ua Vajntxwv Kav Yahdah

(2 Vajntxwv 16:1-20)

1 Thaum Ahas pib ua vajntxwv kav, nws hnub nyoog muaj nees nkaum xyoo, nws nyob hauv Yeluxalees kav tau kaum rau xyoo. Nws ua tej uas tsis haum

(יחוח)Yahweh lub siab, nws tsis ua raws li nws yawg koob Daviv tau ua,

2 tiamsis nws taug nraim Ixayees tej vajntxwv tus hneev taw. Nws kuj nchuav tej dab mlom los teev dab Npa‑as thiab.

3 Nws hlawv xyab rau hauv lub hav Npeehinoos, thiab muab nws tej tub hlawv xyeem rau dab ua raws li tej kevcai qias vuab tsuab uas lwm haiv neeg ua, yog cov uas (יחוח)Yahweh ntiab tawm ntawm cov Ixayees hauv ntej mus. 

4 Nws xyeem tsiaj thiab hlawv hmoov xyab rau saum tej chaw siab teev dab thiab rau saum tej pov roob thiab hauv txhua tsob qab ntoo ntsuab.

5 Vim li no (יחוח)Yahweh uas yog nws Tus Tswv thiaj muab nws cob rau hauv cov Alas tus vajntxwv txhais tes, uas ntaus yeej Ahas thiab ntes tau cov pejxeem coob coob coj mus rau hauv lub nroog Damaxakas. Thiab Ahas raug muab cob rau hauv cov Ixayees tus vajntxwv txhais tes, uas kov yeej nws thiab tua tibneeg coob heev.

6 Pekhas uas yog Lemaliyah tus tub tua cov Yahdah tuag 120,000 leej rau tib hnub, puav leej yog cov uas siab loj siab tuab, vim yog lawv twb tso (יחוח)Yahweh uas yog lawv tej poj koob yawm txwv Tus Tswv tseg lawm.

7 Xikhis uas yog tibneeg Efa‑is muaj zog heev muab vajntxwv tus tub Ma‑axeyah thiab Alikhas uas yog tus saib xyuas vajntxwv lub tsev thiab Eekhanas uas yog tus loo ntawm vajntxwv, tua pov tseg.

8 Cov Ixayees ntes lawv cov kwvtij 200,000 leej, muaj pojniam, muaj tub, muaj ntxhais, thiab lwg tau qhov txhia chaw ntau coj los rau hauv lub nroog Xamalis.

9 Muaj ib tug xibhwb cev (יחוח)Yahweh lus nyob ntawd hu ua Audes. Nws txawm tuaj ntsib cov tub rog uas rov los rau hauv Xamalis thiab hais rau lawv tias, saib maj, (יחוח)Yahweh uas yog nej tej poj koob yawm txwv Tus Tswv chim rau cov Yahdah, nws thiaj muab lawv cob rau hauv nej txhais tes, tiamsis qhov uas nej muab lawv tua ua npau taws vog twb nrov mus txog saum ntuj lawm.

10 Thiab nimno nej tseem yuav quab yuam cov Yahdah thiab cov Yeluxalees tsis hais pojniam txiv neej kom ua nej qhev. Nej tsis ua txhaum muaj txim rau (יחוח)Yahweh uas yog nej Tus Tswv lov?

11 Nimno cia li mloog kuv hais.  Cia li xa nej cov kwvtij uas nej ntes tau no rov qab mus, rau qhov (יחוח)Yahweh txojkev npau taws nyob rawv saum nej lawm.

12 Muaj qee leej uas ua thawj hauv cov Efa‑is, yog Yahkanas tus tub Axaliyah thiab Mesilemaus tus tub Npelekhiyah, thiab Salus tus tub Yehikhiyah, thiab Halais tus tub Amaxas, mas lawv sawv tav cov uas mus ua rog los,

13 thiab hais rau lawv tias, nej tsis txhob coj cov uas nej ntes tau los rau hauv no, rau qhov nej yuav coj lub txim uas ua txhaum rau (יחוח)Yahweh los raug peb, tsav rau lub txim thiab tej kev txhaum uas nimno peb twb muaj lawm.  

Rau qhov peb lub txim kuj loj kawg lawm, thiab (יחוח)Yahweh txojkev npau taws heev twb muaj rau cov Ixayees lawm.

14 Yog li ntawd cov tub rog thiaj li tso cov tibneeg uas ntes tau thiab tej qhov txhia chaw uas lwg tau los ntawd tseg rau ntawm cov thawj thiab cov pejxeem sawvdaws xub ntiag.

15 Mas cov txivneej uas twb hais npe lawd, txawm sawv pes tsees muab tej ris tsho uas lwg tau los ntawd cev rau txhua tus uas lawv ntes los es tsis muaj ris tsho hnav. Lawv muab kho rau cov ntawd hnav thiab muab khau rau lawv rau thiab npaj zaub mov thiab dej haus rau lawv thiab muab roj pleev lawv tej mob. Thiab muab cov uas tsis muaj zog caij nees luav xa lawv rov mus cuag lawv cov kwvtij hauv lub moos Yelikhaus, uas yog lub moos toov laj. Ces lawv li rov qab los rau ntawm lub nroog Xamalis.

16 Thaum ntawd vajntxwv Ahas txib tibneeg mus thov Axilias tus vajntxwv pab nws,

17 rau qhov cov Edoos rov txeem tuaj rau hauv lub tebchaws dua ib zaug thiab kov yeej cov Yahdah thiab ntes ib txhia coj mus lawm.

18 Cov Filixatees kuj txeem mus ua rog rau tej moos ntawm tej pov roob Sefelas thiab hauv Nekes hauv Yahdah tebchaws, thiab txeeb tau lub moos Npesemes, Aiyaloos thiab Kedelaus, thiab txeeb tau lub moos Xaukhaus, Thinaj thiab Kixaus thiab tej zej zog ib ncig tej moos ntawd. Thiab lawv los nyob rau hauv.

19 (יחוח)Yahweh ua rau cov Yahdah poob qis, vim yog tim Ahas uas yog Yahdah tus vajntxwv, vim yog Ahas rhuav tej kevcai hauv Yahdah thiab tsis muab lub siab xib rau (יחוח)Yahweh. 

20 Axilias tus vajntxwv Thika-pinexaws txawm tuaj tawm tsam nws thiab ua rau Ahas raug txom nyem tsis yog tuaj txhawb nws lub zog.  

21 Rau qhov Ahas muab tej qhov txhia chaw hauv (יחוח)Yahweh lub tuam tsev thiab hauv vajntxwv tsev thiab hauv cov thawj tej tsev, them se rau Axilias tus vajntxwv. Qhov uas nws ua li ntawd tsis pab nws kiag li.  

22 Thaum tus vajntxwv Ahas no raug kev txom nyem ntawd, nws yim huab ntxeev siab rau (יחוח)Yahweh.

23 Nws tua tsiaj xyeem rau lub nroog Damaxakas tej dab uas ua rau nws swb, thiab hais tias, vim cov Alas tej vajntxwv li dab tau pab lawv lawm, kuv yuav tua tsiaj xyeem rau tej dab ntawd kom pab kuv thiab. Tiamsis tej dab ntawd ua rau nws thiab cov Ixayees sawvdaws puam tsuaj xwb.

24 Thiab Ahas sau zog tej twj siv hauv (יחוח)Yahweh lub tuam tsev thiab muab txiav ua tej dwb daim, thiab muab (יחוח)Yahweh lub tuam tsev tej qhov rooj kaw cia thiab nws ua tej thaj xyeem dab rau nws siv rau txhua qhov hauv lub nroog Yeluxalees.

25 Nws ua tej chaw siab rau hauv Yahdah txhua lub moos, hlawv tsiaj xyeem rau luag tej dab, zes ua rau (יחוח)Yahweh uas yog nws tej poj koob yawm txwv Tus Tswv chim.

26 Lwm yam haujlwm uas Ahas ua thiab nws lub neej huvsi txij thaum pib mus txog thaum kawg twb muab sau cia rau hauv phau ntawv uas hais txog Yahdah thiab Ixayees tej vaj ntxwv lawm.

27 Ahas tuag mus nrog nws tej poj koob yawm txwv nyob mas lawv muab nws faus rau hauv lub nroog Yeluxalees, tiamsis lawv tsis muab faus rau hauv tej qhov ntxa uas faus Ixayees tej vajntxwv. Nws tus tub Hexekhiyah sawv nws chaw ua vajntxwv kav.