Hexekhiyah Ua Kevcai Hla Dhau

1 Hexekhiyah hais mus rau cov Ixayees thiab cov Yahdah sawv daws, thiab sau ntawv mus rau cov Efa‑is thiab cov Manaxes kom lawv sawvdaws tuaj rau ntawm (יחוח)Yahweh lub tuam tsev hauv Yeluxalees mas yuav ua kevcai Hla Dhau xyeem rau (יחוח)Yahweh uas yog cov Ixayees Tus Tswv.

2 Vajntxwv thiab nws cov thawj thiab cov pejxeem hauv Yeluxalees twb sablaj cia yuav ua kevcai Hla Dhau rau lub ob hlis,

3 rau qhov lawv ua zaum kevcai ntawd tsis tau raws li sijhawm uas teem cia, vim yog cov pov thawj tsis tau tu lawv kom dawb huv txaus npaum li uas ua tau haujlwm, thiab cov pejxeem kuj tsis tau tuaj txoos ua ke txhij rau hauv Yeluxalees.

4 Mas tej uas lawv txiav txim siab ua ntawd vajntxwv thiab ib tsoom pejxeem sawvdaws pom zoo.

5 Lawv thiaj hais haum tias yuav tshaj tawm thoob plaws Ixayees tebchaws, txij ntawm lub moos Npe‑awsenpas mus txog lub moos Daj, kom cov pejxeem yuav tau tuaj ua kevcai Hla Dhau xyeem rau (יחוח)Yahweh uas yog cov Ixayees Tus Tswv rau hauv Yeluxalees, rau qhov cov uas ua kevcai Hla Dhau raws li uas teem cia tsis muaj coob.

6 Yog li ntawd thiaj muaj tib neeg xa xov mus thoob plaws Ixayees thiab Yahdah tebchaws raws li vajntxwv hais, nqa cov ntawv uas vajntxwv thiab nws cov thawj sau, hais tias, tibneeg Ixayees es, cia li rov los cuag (יחוח)Yahweh uas yog Anplaham, Ixaj, thiab Ixayees Tus Tswv, xwv nws thiaj rov tig los cuag nej cov uas tseem tshuav nyob, yog cov uas dim ntawm Axilias tej vajntxwv txhais tes.

7 Tsis txhob zoo thooj li nej tej poj koob yawm txwv thiab nej tej kwvtij uas ntxeev siab rau (יחוח)Yahweh uas yog lawv tej poj koob yawm txwv Tus Tswv, (יחוח)Yahweh thiaj ua rau lawv piam tag li uas nej pom ntsoov.

8 Nimno nej tsis txhob tawv ncauj yam li nej tej poj koob yawm txwv. Cia li muab nej tus kheej cob rau (יחוח)Yahweh thiab tuaj rau ntawm qhov chaw uas pe hawm (יחוח)Yahweh uas nws twb tu kom dawb huv cia mus ib txhis, thiab ua koom tu (יחוח)Yahweh uas yog nej Tus Tswv, xwv nws txojkev chim npau taws heev thiaj li thim ntawm nej mus.

9 Yog nej rov los cuag (יחוח)Yahweh, nej cov kwvtij thiab nej cov menyuam yuav tau txais txojkev hlub ntawm cov uas ntes lawv coj mus, thiab yuav tau rov los rau hauv lub tebchaws no dua thiab. (יחוח)Yahweh uas yog nej Tus Tswv, yog tus uas hlub thiab zam txim. Yog nej rov los cuag nws, nws yuav tsis fee plhu ntawm nej.

10 Cov uas xa ntawv thiaj mus ib lub moos dhau ib lub moos thoob plaws Efa‑is thiab Manaxes tebchaws thiab mus txog ntua Xenpuloos tebchaws. Tiamsis tej tibneeg ntawd thuam luag lawv thiab saib tsis taus lawv.

11 Tsuas yog cov tibneeg Asaws thiab Manaxes thiab Xenpuloos qee leej thiaj txo hwjchim thiab tuaj rau hauv Yeluxalees xwb.

12 (יחוח)Yahweh txhais tes kuj nyob rawv saum cov Yahdah, ua rau lawv koom ib lub siab ua raws li tej lus uas (יחוח)Yahweh kom vajntxwv thiab cov thawj hais.

13 Cov pejxeem ntau leej tuaj ua ke ua kevcai noj ncuav tsis xyaw keeb rau hauv Yeluxalees rau lub ob hlis, lawv tuaj txoos ua ke coob kawg li.

14 Lawv nqis tes rhuav tej thaj xyeem dab uas nyob hauv Yeluxalees, thiab lawv muab tej thaj hlawv xyab nqa mus pov rau hauv lub hav Khiloos.

15 Lawv tua tej menyuam yaj uas ua kevcai Hla Dhau rau hnub xiab kaum plaub lub ob hlis. Cov pov thawj thiab cov Levis kuj txaj muag, lawv thiaj tu lawv tus kheej kom dawb huv thiab coj tej uas ua kevcai hlawv xyeem tuaj rau hauv (יחוח)Yahweh lub tuam tsev.

16 Lawv thiaj mus nyob rau lawv tej chaw uas teem cia raws li (יחוח)Yahweh tus tibneeg Mauxes txoj kevcai. Cov pov thawj thiaj li txais tej ntshav ntawm cov Levis txhais tes coj mus nchos.

17 Cov pejxeem uas tuaj txoos ua ke ntawd muaj coob leej uas tsis tau tu lawv tus kheej kom dawb huv.  Vim li no cov Levis yuav tau tua txhua tus uas tseem qias tsis huv tus menyuam yaj uas ua kevcai Hla Dhau, xwv thiaj ua tau tus menyuam yaj dawb huv rau (יחוח)Yahweh.

18 Txawm yog cov pejxeem coob ntawd muaj cov uas tuaj Efa‑is, Manaxes, Ixakhas thiab Xenpuloos tebchaws tuaj coob heev uas tsis tau tu lawv tus kheej kom dawb huv, los lawv tseem noj pluas mov kevcai Hla Dhau ntawd mas txhaum tsis raws li tu tseg. Hexekhiyah thiaj thov (יחוח)Yahweh pab lawv hais tias, thov (יחוח)Yahweh uas zoo kawg nkaus zam txim rau txhua tus,

19 yog cov uas muaj siab nrhiav (יחוח)Yahweh, uas yog lawv tej poj koob yawm txwv Tus Tswv, txawm yog lawv tsis dawb huv raws li lub chaw pe hawm (יחוח)Yahweh tej kab ke kuj xij.

20 (יחוח)Yahweh kuj mloog Hexekhiyah tej lus thov thiab kho cov pejxeem.

21 Cov Ixayees uas tuaj rau hauv Yeluxalees tau ua kevcai noj ncuav tsis xyaw keeb zoo siab xyiv fab heev tau xya hnub, thiab cov Levis thiab cov pov thawj kuj niaj hnub qhuas (יחוח)Yahweh. Lawv hu nkauj qhuas (יחוח)Yahweh muaj cuab yeej phim suab nkauj nrov xyeem rau (יחוח)Yahweh.

22 Thiab Hexekhiyah hais lus txhawb cov Levis sawvdaws uas txawj txawj ua haujlwm ua koom tu (יחוח)Yahweh. Cov pejxeem thiaj noj rooj mov kevcai Hla Dhau ntawd tau xya hnub thiab tua tsiaj ua kevcai xyeem sib raug zoo thiab ua (יחוח)Yahweh uas yog lawv tej poj koob yawm txwv Tus Tswv tsaug.  

23 Mas ib tsoom pejxeem sawvdaws hais haum yuav ua qhov kevcai ntawd dua xya hnub thiab. Ces lawv txawm ua kevcai zoo siab xyiv fab xya hnub ntxiv.

24 Yahdah tus vajntxwv Hexekhiyah pub ib txhiab tus txiv nyuj thiab xya txhiab tus yaj rau cov pejxeem ua kevcai xyeem, thiab cov thawj kuj pub ib txhiab tus txiv nyuj thiab kaum txhiab tus yaj rau cov pejxeem.  Thiab cov pov thawj kuj tu lawv tus kheej kom dawb huv coob kawg.  

25 Ib tsoom tibneeg Yahdah thiab cov Levis thiab cov pov thawj thiab ib tsoom tibneeg uas tuaj Ixayees tebchaws tuaj thiab lwm haiv neeg uas tuaj Ixayees teb chaws tuaj thiab lwm haiv neeg uas nyob hauv Yahdah tebchaws, sawvdaws zoo siab xyiv fab.

26 Yog li no thiaj muaj kev zoo siab loj kawg rau hauv Yeluxalees.  Txij thaum Daviv tus tub Xalaumoos ua vajntxwv kav Ixayees tsis tau muaj li zaum no rau hauv Yeluxalees.  

27 Mas cov pov thawj thiab cov Levis sawv ntsug foom koob hmoov rau cov pejxeem. (יחוח)Yahweh kuj hnov lawv lub suab, thiab lawv tej lus thov kuj mus txog (יחוח)Yahweh lub chaw nyob dawb huv saum ntuj.