1 Thaum tej no tiav tag huvsi cov Ixayees sawvdaws uas tuaj rau hauv Yeluxalees tawm mus rau Yahdah tej moos thiab tsoo tej ncej teev dab ua tej dwb daim thiab ntov tej ncej dab Aselas vau tag, thiab tsoo tej chaw siab teev dab thiab tej thaj thoob plaws Yahdah thiab Npeeyamees thiab Efa‑is thiab Manaxes tebchaws pob tag, mus txog thaum ua rau txhua yam puam tsuaj tag. Cov Ixayees sawvdaws li rov mus rau lawv tej Moos, nyias mus txog nyias vaj nyias tsev.

​

Tej Uas Pub Rau Cov Pov Thawj Thiab Cov Levis

2 Hexekhiyah faib cov pov thawj thiab cov Levis ua tej pab tej pawg, nyias nrog nyias pab raws li tej haujlwm uas cov pov thawj thiab cov Levis ua, yog ua kevcai hlawv xyeem thiab ua kevcai xyeem sib raug zoo thiab ua haujlwm ntawm (יחוח)Yahweh lub chaw nyob tej rooj loog thiab ua tsaug thiab qhuas (יחוח)Yahweh.  

3 Vajntxwv pub nws li qhov txhia chaw ua tej uas ua kevcai hlawv xyeem thaum sawv ntxov thiab thaum yuav tsaus ntuj thiab hlawv rau hnub Sabbath thiab hnub hli xiab thiab hlawv rau tej kevcai uas teem cia, raws li uas sau cia rau hauv (יחוח)Yahweh txoj kevcai.

4 Nws hais rau cov pejxeem uas nyob hauv Yeluxalees kom pub cov pov thawj thiab cov Levis li feem raws li uas teem cia lawd rau lawv, xwv lawv thiaj rau siab ua haujlwm raws li (יחוח)Yahweh txoj kevcai qhia.

5 Thaum nws tej lus nrov ncha mus, cov Ixayees kuj pub tej uas hais no ntau kawg li, yog thawj phaum qoob thiab cawv txiv hmab, roj, zib ntab thiab txhua yam uas tau hauv teb ntau kawg li, thiab coj ib feem kaum hauv txhua yam tuaj ntau nplua mias.

6 Cov Ixayees thiab cov Yahdah uas nyob hauv Yahdah tej moos kuj coj ib feem kaum hauv tej nyuj, tej yaj thiab hauv tej uas muab pub kiag cais ua yam uas dawb huv rau (יחוח)Yahweh uas yog lawv Tus Tswv, mas khaws tau tej niag pawg.

7 Lawv muab sau ua tej pawg thaum lub peb hlis mus txog lub xya hli li tiav tag.

8 Thaum Hexekhiyah thiab cov thawj tuaj pom tej pawg ntawd, lawv kuj qhuas (יחוח)Yahweh thiab foom koob hmoov rau (יחוח)Yahweh haiv neeg Ixayees.

9 Hexekhiyah thiaj nug cov pov thawj thiab cov Levis txog tej niag pawg ntawd. 10 Tus tuam pov thawj hlob Axaliyah uas yog Xadaus caj ces teb nws tias, txij thaum lawv coj tej qhov txhia chaw pub rau hauv (יחוח)Yahweh lub tuam tsev mas peb tau noj tsau npo thiab tseem muaj seem ntau, vim yog (יחוח)Yahweh foom koob hmoov rau nws cov tibneeg, peb thiaj tshuav seem ntau npaum li no.

11 Ces Hexekhiyah txawm hais kom lawv npaj tej chav hauv (יחוח)Yahweh lub tuam tsev.  Lawv thiaj npaj chaw.

12 Thiab lawv kuj ua ncaj ncees sau tej uas sawvdaws pub thiab tej uas yog ib feem kaum thiab tej uas pub kiag ua yam uas dawb huv los rau hauv.  Tus thawj uas saib xyuas tej ntawd yog Khaunaniyah uas yog ib tug Levis, thiab nws tus kwv Sime‑is ua tus pab nws.

13 Vajntxwv Hexekhiyah thiab Axaliyah uas yog tus thawj hauv (יחוח)Yahweh lub tuam tsev tsa Yehi‑ees, Axaxiyah, Nahaj, Axahees, Yelimaus, Yahxanpas, Eli‑ees, Imakhiyah, Mahas thiab Npenayah saib xyuas haujlwm pab Khaunaniyah thiab nws tus kwv Sime‑is.

14 Inas tus tub Khaules uas yog ib tug Levis thiab zov lub rooj loog sab hnub tuaj, ua tus uas saib xyuas tej uas luag zoo siab coj tuaj pub rau (יחוח)Yahweh, thiab faib tej uas muab pub rau (יחוח)Yahweh thiab tej uas xyeem dawb huv kawg nkaus.

15 Mas hauv cov pov thawj tej moos Edees, Miyamees, Yahshua, Semayah, Amaliyah thiab Sekhaniyah ua ncaj ncees pab Khaules faib rau lawv cov kwvtij tus hlob tus yau sib npaug zos raws li lawv tej pab tej pawg.

16 Lawv faib rau cov txivneej uas hnub nyoog peb xyoos rov saud txhua tus uas nkag rau hauv (יחוח)Yahweh lub tuam tsev raws li lawv pawg muaj haujlwm ua rau hnub ntawd, yog mus ua haujlwm raws li lawv pawg li feem ua, tsuas yog tseg tsis faib rau cov uas nce npe rau hauv lawv tej cum xwb.

17 Cov pov thawj nce npe ua pab ua pawg raws li lawv tej cum, cov Levis uas hnub nyoog nees nkaum xyoo rov saud kuj nce npe raws lawv tej haujlwm thiab raws li lawv tej pab tej pawg.

18 Cov pov thawj mas lawv tej menyuam yaus, lawv tej pojniam, tej tub, tej ntxhais, tag nrho lawv cov tibneeg sawvdaws kuj nce npe ua ke, rau qhov cov pov thawj mob siab tswj lawv tus kheej kom dawb huv mus li.

19 Hais txog Aloos caj ces uas ua pov thawj uas nyob hauv tej zej zog ib ncig tej moos, mas muaj cov txivneej hauv txhua lub moos uas muaj npe ua tus faib qhov txhia chaw rau txhua tus txivneej uas yog cov pov thawj cov tibneeg thiab faib rau txhua tus Levis uas nce npe lawd.

20 Hexekhiyah ua li no thoob plaws Yahdah tebchaws, thiab nws ua yam uas zoo thiab raug cai thiab ncaj ncees rau ntawm (יחוח)Yahweh uas yog nws Tus Tswv xub ntiag. 

21 Thiab txhua yam haujlwm uas nws ua pab (יחוח)Yahweh tej haujlwm hauv lub tuam tsev thiab qhov uas ua raws li txoj kevcai thiab (יחוח)Yahweh tej lus cob qhia, uas yog nrhiav nws Tus Tswv, nws ua kawg siab kawg ntsws, nws thiaj vam meej.