Xenakhawlis Tuaj Ntaus  Yeluxalees

(2 Vajntxwv 18:13-37, 19:14-19, 35-37; Isayah 36:1-22, 37:8-38)

1 Thaum dhau tej xwm txheej no thiab tej haujlwm uas Hexikhiyah mob siab ua no lawd, Axilias tus vajntxwv Xenakhawlis txawm tuaj ua rog rau Yahdah thiab tsuam chaw vij tej moos uas muaj ntsa loog, npaj siab yuav txeeb kom tau.

2 Thaum Hexekhiyah pom tias Xenakhawlis tuaj yuav ua rog rau Yeluxalees,

3 nws txawm nrog nws cov thawj rog thiab cov tub rog siab loj siab tuab ntaus tswvyim txhub tej qhov dej txhawv uas nyob ib ncig lub nroog, mas lawv kuj pab nws ua.

4 Cov pejxeem coob heev sau zog ua ke tuaj, mas lawv txhub txhua lub qhov dej txhawv thiab txhub lub hauv dej uas ntws hla lub tebchaws. Lawv hais tias, ua cas yuav cia Axilias tej vajntxwv tuaj ntsib tej dej uas ntau li no?

5 Hexekhiyah rau siab ntso ua tej ntsa loog uas pob tag dua tshiab thiab ua tej chaw tsom faj saum ntsa loog, thiab tseem ua dua ib txheej ntsa loog rau sab nraud, thiab nws ua lub loog Milaus hauv Daviv lub nroog khov dua. Nws kuj ua tej cuab yeej ua rog thiab tej daim hlau thaiv ntau kawg.

6 Nws tsa cov thawj rog saib xyuas cov pejxeem thiab sau lawv los ua ke rau hauv lub tshav puam ntawm rooj loog los rau nws thiab hais lus txhawb lawv lub siab hais tias,

7 cia li ua khov kho thiab ua siab loj siab tuab. Tsis txhob ntshai, tsis txhob poob siab rau Axilias tus vajntxwv thiab tej pab tub rog coob coob uas nrog nws tuaj ntawd, rau qhov tus uas nrog peb loj dua tus uas nrog nws.

8 Nws tsuas yog muaj txhais npab nqaij tawv xwb tiamsis peb muaj (יחוח)Yahweh uas yog peb Tus Tswv nrog nraim peb uas pab peb thiab nyob peb chaw ua rog. Hexekhiyah tej lus thiaj txhawb tau cov pejxeem lub zog.

9 Dhau ntawd thaum Axilias tus vajntxwv Xenakhawlis thiab nws cov tub rog huvsi tseem tab tom vij lub moos Lakhis, mas nws tso nws cov tub teg tub taws mus rau lub nroog Yeluxalees mus cuag Yahdah tus vajntxwv Hexekhiyah thiab cuag cov tibneeg Yahdah sawvdaws uas nyob hauv Yeluxalees, hais tias,

10 Axilias tus vajntxwv Xenakhawlis hais li no tias, nej vam khom abtsi es nej yuav nyob hauv Yeluxalees thev qhov uas raug vij li no?  

11 Thaum Hexekhiyah hais rau nej tias, (יחוח)Yahweh uas yog peb Tus Tswv yuav cawm peb dim hauv Axilias tus vajntxwv txhais tes, tsis yog Hexekhiyah coj nej yuam kev mus tuag tshaib tuag nqhis lov?

12 Tus Hexikhiyah no nws tsis yog tus uas rhuav tshem (יחוח)Yahweh tej chaw siab thiab tej thaj uas xyeem rau (יחוח)Yahweh lov? Thiab hais rau cov Yahdah thiab cov hauv Yeluxalees tias, nej yuav tau pe hawm rau tib lub thaj thiab hlawv xyeem rau lub thaj ntawd xwb.

13 Nej tsis paub tias kuv thiab kuv tej poj koob yawm txwv twb ua li cas rau txhua haiv neeg hauv lwm tebchaws lawm lov? Cov tibneeg hauv tej tebchaws ntawd li dab pab cawm tau lawv tej tebchaws dim hauv kuv txhais tes lov?

14 Tej dab huvsi hauv tej tebchaws uas kuv tej poj koob yawm txwv muab ua puam tsuaj tag nrho muaj ib tug dab twg uas pab tau nws cov tibneeg dim hauv kuv txhais tes? Mas nej Tus Tswv tseem yuav pab tau nej dim hauv kuv txhais tes lov?

15 Vim li no tsis txhob cia Hexekhiyah dag ntxias nej lossis coj nej yuam kev, tsis txhob ntseeg nws, rau qhov tsis muaj ib tug dab hauv haiv neeg twg thiab lub tebchaws twg uas cawm tau nws haiv neeg dim hauv kuv txhais tes lossis hauv kuv tej poj koob yawm txwv txhais tes.  Nej Tus Tswv yim huab tsis txawj pab nej dim hauv kuv txhais tes li!

16 Xenakhawlis cov tub teg tub taws tseem thuam (יחוח)Yahweh thiab Hexekhiyah uas yog (יחוח)Yahweh tus tub qhe ntau tshaj qhov no.

17 Thiab Xenakhawlis tseem sau ntawv hais saib tsis taus (יחוח)Yahweh uas yog cov Ixayees Tus Tswv thiab thuam hais tias, cov tibneeg hauv ib tsoom tebchaws tej dab pab tsis tau lawv haiv neeg dim hauv kuv txhais tes li cas, Hexekhiyah Tus Tswv kuj yuav pab tsis tau nws haiv neeg dim hauv kuv txhais tes li ntawd thiab.

18 Ces lawv txawm qw tej lus ntawd nrov nrov ua lus Yahdah rau cov tib neeg Yeluxalees uas nyob saum lub ntsa loog hnov es kom lawv ntshai thiab poob siab heev xwv thiaj li txeeb tau lub nroog ntawd.

19 Lawv hais txog Yeluxalees Tus Tswv ib yam li lawv hais txog ib tsoom tibneeg hauv ntiajteb tej dab uas yog tibneeg txhais tes ua.

20 Ces vajntxwv Hexekhiyah thiab Amoj tus tub Isayah uas yog xibhwb cev (יחוח)Yahweh lus, txawm quaj thov txog tej no rau saum ntuj.

21 (יחוח)Yahweh thiaj txib ib tug tubtxib saum ntuj los mas nws tua cov tub rog siab loj siab tuab thiab cov thawj tub rog thiab cov uas kav tej pab tub rog huvsi tuag tag rau hauv vajntxwv Axilias lub yeej. Yog li no Xenakhawlis thiaj li rov qab mus rau nws lub tebchaws yam poob ntsej muag kawg.  Thaum nws mus rau hauv lub tsev uas teev nws tus dab, nws cov tub qee leej xuas ntaj muab nws tua rau qhov ntawd lawm.

22 (יחוח)Yahweh thiaj cawm Hexekhiyah thiab cov uas nyob hauv Yeluxalees dim hauv Axilias tus vajntxwv Xenakhawlis txhais tes thiab hauv nws tej yeeb ncuab sawvdaws txhais tes li no. (יחוח)Yahweh pub lawv tau so tsis ua rog rau txhua fab.

23 Tibneeg coob coj qhov txhia chaw tuaj rau hauv Yeluxalees pub rau (יחוח)Yahweh thiab coj tej uas tsim txiaj tuaj pub rau Yahdah tus vajntxwv Hexekhiyah, Hexekhiyah thiaj tau koob meej tab meeg ib tsoom tebchaws sawv daws txij thaum ntawd los.

​

Hexekhiyah Mob

(2 Vajntxwv 20:1-3,12-21; Isayah 38:1-3,39:1-8)

24 Lub sijhawm ntawd Hexekhiyah mob nyhav heev twb yuav tuag, mas nws thov (יחוח)Yahweh. (יחוח)Yahweh kuj teb nws thiab ua ib yam txujci tseem ceeb tshwm rau nws.

25 Tiamsis Hexekhiyah tsis nco tej txiaj ntsig uas (יחוח)Yahweh pab nws, vim yog nws lub siab khav theeb. Vim li no txojkev npau taws thiaj los raug nws thiab cov Yahdah thiab Yeluxalees.

26 Ces Hexekhiyah txawm txo nws lub siab khav theeb ntawd thiab cov tibneeg uas nyob hauv Yeluxalees kuj ua ib yam li nws, ces (יחוח)Yahweh txojkev npau taws thiaj tsis los raug lawv rau hauv Hexekhiyah sim neej.

​

Hexekhiyah Nplua Nuj

27 Hexekhiyah muaj nyiaj muaj txiaj ntau kawg thiab muaj koob meej loj, mas nws ua tej txhab nyiaj rau nws rau nyiaj rau kub, rau tej qe zeb hlaws muaj nqis, rau txuj lom, rau tej daim phiaj hlau thaiv thiab tej twj siv tsim txiaj txhua yam. 28 Thiab nws ua txhab rau qoob, rau cawv txiv hmab thiab roj, thiab ua nkuaj rau txhua yam tsiaj txhu thiab nkuaj yaj.

29 Thiab nws tsim tej moos rau nws thiab nws muaj tej pab yaj, tej pab tshis, tej pab nyuj ntau nplua mias, vim yog (יחוח)Yahweh pub cuab txhiaj cuab tam rau nws ntau heev.

30 Tus vajntxwv Hexekhiyah no yog tus uas cais lub hauv dej Kihoos sab ped kom ntws mus rau Daviv lub nroog sab hnub poob. Hexekhiyah vam meej rau nws tej haujlwm huvsi.

31 Thaum cov thawj hauv lub nroog Npanpiloos txib tibneeg tuaj nug txog tej txujci tseem ceeb uas tshwm rau hauv lub tebchaws, mas (יחוח)Yahweh muab Hexekhiyah tso nyob ywj siab, saib nws yuav teb lawv li cas, xwv thiaj sim tau nws thiab paub txhua yam uas nyob hauv nws lub siab.

32 Lwm yam haujlwm uas Hexekhiyah ua thiab tej yam zoo uas nws ua, twb muab sau cia rau hauv tej txoj yog toog uas Amoj tus tub Isayah uas yog xibhwb cev (יחוח)Yahweh lus hais nyob rau hauv phau ntawv uas hais txog Yahdah thiab Ixayees tej vajntxwv lawm.

33 Ces Hexekhiyah txawm tuag mus nrog nws tej poj koob yawm txwv nyob. Lawv muab nws faus rau saum caj qaum roob uas yog Daviv caj ces li toj ntxa. Tag nrho cov Yahdah thiab cov uas nyob hauv Yeluxalees sawvdaws tuaj pam nws thiab ua lub ntees loj kawg hwm nws. Mas nws tus tub Manaxes sawv nws chaw ua vajntxwv kav.