Manaxes Ua Vajntxwv Kav

(2 Vajntxwv21:1-9, 17-18)

1 Thaum Manaxes pib ua vajntxwv nws hnub nyoog muaj kaum ob xyoos, nws nyob hauv Yeluxalees kav tau tsib caug tsib xyoos.

2 Nws ua tej uas (יחוח)Yahweh pom tias phem kawg li, nws ua raws li tej kevcai qias vuab tsuab uas lwm haiv neeg ua, yog cov uas (יחוח)Yahweh ntiab tawm ntawm cov Ixayees hauv ntej mus.

3 Nws rov ua tej chaw siab teev dab uas nws txiv Hexekhiyah twb muab rhuav tag lawd, thiab nws ua tej thaj teev dab Npa‑as thiab ua tej ncej dab Aselas, thiab nws pe hawm hnub, pe hawm hli thiab tej hnub qub saum nruab ntug huvsi thiab ua koom tu tej ntawd.

4 Nws ua tej thaj teev dab rau hauv (יחוח)Yahweh lub tuam tsev, uas yog lub chaw uas (יחוח)Yahweh twb hais tias, kuv lub npe yuav nyob rau hauv Yeluxalees mus ib txhis.

5 Nws ua tej thaj xyeem rau hnub hli, tej hnub qub saum nruab ntug huvsi rau hauv ob lub tshav puam hauv (יחוח)Yahweh lub tuam tsev.

6 Nws muab nws tej tub tua hlawv xyeem rau dab rau hauv lub hav Npeehinoos, thiab nws saib caij, saib yaig, saib sij thiab ua khaws koob yees siv, nws mus nug tej txiv neeb txiv yaig thiab tej uas muaj dab leej nkaub.  Nws ua tej uas

(יחוח)Yahweh pom tias phem kawg nkaus li zes ua rau (יחוח)Yahweh npau taws.

7 Tus dab mlom uas nws txaug, nws kuj muab txawb rau hauv (יחוח)Yahweh lub tuam tsev uas (יחוח)Yahweh twb hais rau Daviv thiab nws tus tub Xalaumoos lawm hais tias, lub tuam tsev no thiab lub nroog Yeluxalees uas kuv twb xaiv hauv txhua xeem Ixayees los mas kuv yuav cia kuv lub npe nyob hauv mus ib txhis.  

8 Kuv yuav tsis rho cov Ixayees txhais kotaw tawm hauv lub tebchaws uas kuv tu tseg rau nej tej poj koob yawm txwv lawd dua li lawm, yog tias lawv ceev faj ua txhua yam uas kuv hais rau lawv, yog txoj kevcai huvsi thiab tej kab ke thiab tej kevcai uas kuv tau kom Mauxes hais rau lawv.

9 Manaxes ntxias cov Yahdah thiab cov uas nyob hauv Yeluxalees yuam kev, lawv thiaj ua phem heev dua tej haiv neeg uas (יחוח)Yahweh twb muab ua puam tsuaj tag rau ntawm lawv hauv ntej.

10 (יחוח)Yahweh hais rau Manaxes thiab nws cov pejxeem tiamsis lawv tsis mloog.

11 Vim li no (יחוח)Yahweh thiaj coj cov thawj rog uas kav Axilias tus vajntxwv cov tub rog tuaj tawm tsam lawv. Lawv xuas nqe lauj cab Manaxes mus thiab muab saw tooj liab khi nws thiab coj nws mus rau Npanpiloos.

12 Thaum Manaxes raug kev txom nyem heev, nws thov (יחוח)Yahweh uas yog nws Tus Tswv pab nws thiab nws txo nws lub hwjchim qis kawg rau ntawm nws tej poj koob yawm txwv Tus Tswv.

13 Nws thov (יחוח)Yahweh mas (יחוח)Yahweh txais nws tej lus thiab mloog nws tej lus thov, thiab coj nws rov los rau hauv Yeluxalees rov kav nws lub tebchaws. Thaum ntawd Manaxes paub tias (יחוח)Yahweh yog Tus Tswv tiag.

14 Los rau tom qab, nws tsim lub ntsa loog txheej sab nraud rau Daviv lub nroog rau hauv lub hav sab dej Kihoos uas hnub poob mus txog ntawm txojkev nkag rau hauv lub Rooj Loog Ntses, thiab mus rau ib sab lub pov roob Aufees. Nws xov lub ntsa loog siab heev. Nws xa cov thawj uas kav cov tub rog mus nyob rau hauv Yahdah txhua lub moos uas muaj ntsa loog.

15 Nws muab lwm haiv neeg tej dab thiab tus dab mlom rho hauv (יחוח)Yahweh lub tuam tsev mus thiab muab tej thaj huvsi uas nws ua rau saum lub roob uas muaj (יחוח)Yahweh lub tuam tsev thiab tej uas ua rau hauv Yeluxalees rho pov tseg rau sab nraum lub nroog.

16 Thiab nws kho (יחוח)Yahweh lub thaj thiab ua kevcai xyeem sib raug zoo thiab xyeem ua tsaug rau saum lub thaj ntawd. Nws kuj hais kom cov Yahdah ua koom tu (יחוח)Yahweh uas yog cov Ixayees Tus Tswv.

17 Txawm li ntawd los cov pejxeem tseem xyeem tsiaj rau ntawm tej chaw siab, tiamsis yog xyeem rau (יחוח)Yahweh uas yog lawv Tus Tswv xwb.

18 Lwm yam haujlwm uas Manaxes ua thiab nws tej lus thov (יחוח)Yahweh thiab tej lus uas cov xibhwb uas hais pom tom hauv ntej tau tuav (יחוח)Yahweh uas yog cov Ixayees Tus Tswv lub npe hais rau nws mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

19 Nws tej lus thov thiab qhov uas (יחוח)Yahweh txais nws tej lus thov, thiab nws tej kev txhaum huvsi thiab nws tej kev ntxeev siab, thiab thaj chaw uas nws ua tej chaw siab teev dab thiab txhos tej ncej dab Aselas thiab tej dab mlom ua ntej uas tsis tau txo hwjchim, twb muab sau cia rau hauv phau ntawv keeb kwm uas cov xibhwb hais pom tom hauv ntej sau cia lawm.

20 Manaxes txawm tuag mus nrog nws tej poj koob yawm txwv nyob. Lawv muab nws faus rau hauv nws lub tsev, mas nws tus tub Asmoos sawv nws chaw ua vajntxwv kav.

​

Asmoos Ua Vajntxwv Kav

(2 Vajntxwv21:19-26)

21 Thaum Asmoos sawv ua vajntxwv kav nws hnub nyoog muaj nees nkaum ob xyoos, nws nyob hauv Yeluxalees kav tau ob xyoos.

22 Nws ua tej uas (יחוח)Yahweh pom tias phem kawg li, ib yam nkaus li nws txiv Manaxes tau ua lawd. Asmoos tua tsiaj xyeem rau tej dab mlom huvsi uas nws txiv Manaxes ua cia thiab ua koom tu tej dab mlom ntawd.

23 Nws tsis txo nws lub hwjchim rau ntawm (יחוח)Yahweh yam li nws txiv Manaxes tau txo. Tus Asmoos no ua txhaum muaj txim ntau zuj zus.

24 Nws cov tub teg tub taws ntaus tswvyim ntxeev siab rau nws thiab muab nws tua rau hauv nws lub tsev.

25 Tiamsis cov pej xeem muab txhua tus uas ntaus tswvyim ntxeev siab rau vajntxwv Asmoos tua huvsi lawm, thiab cov pejxeem tsa nws tus tub Yauxiyah ua vajntxwv nyob nws chaw.