Yauxiyah Ua Vajntxwv Kav

(2 Vajntxwv 22:1-7)

1 Thaum Yauxiyah pib ua vajntxwv kav, nws hnub nyoog muaj yim xyoo, nws nyob hauv lub nroog Yeluxalees kav tau peb caug ib xyoos.  

2 Nws ua tej uas (יחוח)Yahweh pom tias zoo, thiab nws taug nraim nws yawg koob Daviv tus hneev taw, nws tsis tig mus rau sab xis lossis sab laug.

3 Xyoo yim uas nws ua vajntxwv, yog thaum nws tseem yau, nws pib nrhiav nws yawg koob Daviv Tus Tswv. Xyoo kaum ob uas nws ua vajntxwv, nws pib rhuav tshem tej chaw siab teev dab thiab tej ncej dab Aselas thiab tej dab mlom uas txaug thiab nchuav hauv Yahdah tebchaws thiab hauv Yeluxalees.

4 Lawv tsoo tej thaj teev dab Npa‑as tab meeg ntawm nws xub ntiag, thiab nws ntov lub txee uas hlawv xyab saum lub thaj pov tseg thiab nws tsoo tej ncej dab Aselas thiab tej dab mlom uas txaug thiab nchuav tawg tag thiab muab tsoo ua hmoov coj mus w rau saum cov tibneeg uas xyeem tsiaj rau tej dab mlom ntawd tej qhov ntxa.

5 Nws kuj muab cov pov thawj tej pob txha hlawv rau saum lawv tej thaj, thiaj ntxuav tau Yahdah thiab Yeluxalees.

6 Tej moos hauv Manaxes thiab Efa‑is thiab Xime‑oos thiab mus txog ntua Nathalis, thiab tej uas pob tag ib ncig tej moos ntawd,

7 nws kuj rhuav tshem tej thaj thiab tsoo tej ncej dab Aselas thiab tej dab mlom ua hmoov, thiab ntov tej thaj hlawv xyab huvsi vau tag thoob plaws Ixayees tebchaws, ces nws li rov qab los rau hauv Yeluxalees.  

8 Xyoo kaum yim uas nws ua vajntxwv, thaum nws ntxuav lub tebchaws thiab lub tuam tsev, nws txib Safas uas yog Axaliyah tus tub thiab Ma‑axeyah uas yog tus thawj kav lub nroog, thiab Yahahas tus tub Yahas yog tus uas sau ntawv keeb kwm, mus kho (יחוח)Yahweh uas yog nws Tus Tswv lub tuam tsev.

9 Lawv tuaj cuag tus tuam pov thawj hlob Hikhiyah thiab muab tej nyiaj uas cov pejxeem coj tuaj rau hauv (יחוח)Yahweh lub tuam tsev cob rau nws, yog tej nyiaj uas cov Levis uas zov qhov rooj sau ntawm cov Manaxes thiab cov Efa‑is thiab ntawm cov Ixayees uas tseem tshuav nyob thiab ntawm cov Yahdah thiab cov Npeeyamees sawvdaws thiab ntawm cov uas nyob hauv Yeluxalees.

10 Lawv muab nyiaj rau cov tub zog uas tu (יחוח)Yahweh lub tuam tsev.  Cov tub zog uas ua haujlwm hauv (יחוח)Yahweh lub tuam tsev muab siv kho lub tuam tsev kom zoo li qub.

11 Lawv muab rau cov Kws ntoo thiab cov Kws ua tsev tau siv yuav tej pob zeb uas txaug thiab tej las ntoo uas ua qhab thiab dau rau tej chav tsev uas Yahdah tej vajntxwv muab tsoo pob tag lawm.

12 Cov tibneeg muaj lub siab dawb paug ua haujlwm. Cov uas saib xyuas lawv yog Yahas thiab Obadyah uas yog xeem Levis, yog Melalis caj ces, thiab Xekhaliyah thiab Mesulas uas yog Khauhas caj ces. Cov Levis txhua tus uas txawj ntaus tej cuab yeej phim suab nkauj,

13 ua cov uas saib xyuas cov tibneeg kwv nra thiab qhia txhua yam hauj lwm rau cov tub zog sawvdaws ua. Cov Levis qee leej ua cov uas sau ntawv thiab cov uas tu haujlwm thiab cov uas zov tej rooj loog.

​

Nrhiav Tau ()Yahweh Phau Kevcai

(2 Vajntxwv 22:8-20, 23:1-3)

14 Thaum lawv nqa tej nyiaj uas coj tuaj rau hauv (יחוח)Yahweh lub tuam tsev lawm tawm los, tus pov thawj Hikhiyah nrhiav tau phau kevcai uas (יחוח)Yahweh kom Mauxes qhia.

15 Mas Hikhiyah hais rau Safas uas yog tus tub sau ntawv tias, kuv tshawb tau phau ntawv kevcai nyob hauv (יחוח)Yahweh lub tuam tsev. Ces Hikhiyah txawm muab phau ntawv ntawd rau Safas.

16 Safas coj phau ntawv ntawd mus cev rau vajntxwv thiab qhia tej haujlwm rau vajntxwv tias, txhua yam uas muab cob rau koj cov tub qhe ntawd lawv tab tom ua.

17 Lawv nchuav tej nyiaj uas nyob hauv (יחוח)Yahweh lub tuam tsev thiab muab cob rau hauv cov uas tu haujlwm thiab cov tub zog txhais tes.

18 Mas Safas uas yog tus tub sau ntawv hais rau vajntxwv tias, tus pov thawj Hikhiyah muab ib phau ntawv rau kuv. Thiab Safas muab nyeem rau vajntxwv mloog.

19 Thaum vajntxwv hnov tej lus hauv txoj kevcai ntawd lawd, nws txawm dua rhe nws lub tsho.  

20 Thiab vajntxwv hais rau tus pov thawj Hikhiyah thiab Ahikhas uas yog Safas tus tub thiab Adoos uas yog Mikhayah tus tub thiab Safas uas yog tus tub sau ntawv thiab Axayah uas yog vajntxwv tus tub teg tub taws hais tias,

21 nej cia li mus ua nug rau (יחוח)Yahweh rau kuv thiab rau cov uas tseem tshuav nyob hauv Ixayees thiab Yahdah hais txog tej lus hauv phau ntawv no uas tshawb tau lawm. (יחוח)Yahweh txojkev npau taws uas nchuav los raug peb ntawd loj heev, vim yog peb tej poj koob yawm txwv tsis tuav rawv (יחוח)Yahweh tej lus thiab tsis ua raws li txhua yam uas sau cia rau hauv phau ntawv no.

22 Ces Hikhiyah thiab cov uas vajntxwv txib mus txawm mus cuag tus pojniam xibhwb Hudas uas cev (יחוח)Yahweh lus uas yog Salus tus pojniam. Salus yog tus uas tu vajntxwv tej tsoos tsho thiab yog Thivas tus tub thiab yog Hauhas tus xeeb ntxwv. Tus pojniam xibhwb ntawd nyob hauv Yeluxalees ceg kaum nroog uas ua tshiab, ces lawv txawm hais tej ntawd rau nws.

23 Tus pojniam ntawd hais rau lawv tias, (יחוח)Yahweh uas yog cov Ixayees Tus Tswv hais li no tias, cia li hais rau tus uas txib nej tuaj cuag kuv tias,

24 (יחוח)Yahweh hais li no tias, saib nawj, kuv yuav tso tej xwm txheej phem los raug lub chaw no thiab raug tej tibneeg uas nyob hauv raws li txhua lo lus tsawm foom uas sau cia rau hauv phau ntawv uas tau muab nyeem rau Yahdah tus vajntxwv ntawd.

25 Vim lawv twb tso kuv tseg thiab hlawv xyab xyeem rau luag tej dab thiaj ua rau kuv chim rau txhua yam uas lawv txhais tes ua, vim li no kuv txojkev chim yuav npau tshwm plaws rau lub chaw no yuav tav tsis tau li.

26 Tiamsis Yahdah tus vajntxwv uas txib nej tuaj ua nug rau (יחוח)Yahweh ntawd, nej cia li hais li no rau nws tias, (יחוח)Yahweh uas yog cov Ixayees Tus Tswv hais li no tias, hais txog tej lus uas koj tau hnov ntawd,

27 vim koj ntxeev dua siab thiab koj txo koj lub hwjchim rau ntawm (יחוח)Yahweh rau thaum koj hnov nws hais li cas tawm tsam lub chaw no thiab cov tibneeg uas nyob hauv, thiab vim koj tau txo koj tus kheej rau ntawm kuv thiab dua rhe koj lub tsho quaj rau ntawm kuv xub ntiag, mas kuv kuj hnov lawm. (יחוח)Yahweh hais li no ntag.

28 Vim li no, saib nawj, kuv yuav coj koj mus nrog koj tej poj koob yawm txwv nyob thiab mus rau hauv koj lub qhov ntxa ua siab tus yees, thiab koj lub qhov muag yuav tsis pom tej xwm txheej phem huvsi uas kuv yuav coj los raug lub chaw no thiab cov tibneeg uas nyob hauv. Lawv kuj coj tej lus ntawd los hais rau vajntxwv mloog.

2 9Ces vajntxwv txawm hais kom sau zog Yahdah thiab Yeluxalees cov kev txwj laug sawvdaws tuaj.

30 Mas vajntxwv mus rau hauv (יחוח)Yahweh lub tuam tsev. Cov Yahdah huvsi thiab cov uas nyob hauv Yeluxalees thiab cov pov thawj thiab cov Levis thiab cov pejxeem, cov hlob thiab cov yau sawvdaws nrog nws mus. Ces nws txawm nyeem tag nrho phau ntawv cog lus tseg uas tshawb tau hauv (יחוח)Yahweh lub tuam tsev los rau lawv mloog.  

31 Vajntxwv sawv ntsug ntawm nws lub chaw nrog (יחוח)Yahweh cog lus tias nws yuav ua lub neej raws nraim (יחוח)Yahweh thiab tuav rawv nws tej lus cob qhia thiab nws tej lus sam hwm thiab nws tej kab ke kawg siab kawg ntsws, yuav ua raws nraim li tej lus sib cog tseg uas sau cia rau hauv phau ntawv ntawd.

32 Thiab vajntxwv kom cov uas tuaj rau hauv Yeluxalees thiab cov Npeeyamees koom nrog cog tej lus no. Cov tibneeg Yeluxalees kuj ua raws li (יחוח)Yahweh tej lus cog tseg, uas yog lawv tej poj koob yawm txwv Tus Tswv.

33 Thiab Yauxiyah muab tej uas qias vuab tsuab huvsi rho tawm hauv tej chaw uas cov Ixayees nyob mus, thiab ua rau sawvdaws uas nyob hauv Ixayees tebchaws ua koom tu (יחוח)Yahweh uas yog lawv Tus Tswv. Lawv tsis tso (יחוח)Yahweh uas yog lawv tej poj koob yawm txwv Tus Tswv tseg mus tag Yauxiyah sim neej.