Yauxiyah Ua Kevcai Hla Dhau

(2 Vajntxwv 23:21-23)

1 Yauxiyah ua kevcai Hla Dhau hauv Yeluxalees rau (יחוח)Yahweh.  Lawv tua tej menyuam yaj ua kevcai hla dhau rau hnub xiab kaum plaub, lub ib hlis.

2 Nws tsa cov pov thawj nyias ua nyias tej haujlwm thiab txhawb lawv lub zog ua hauj lwm rau hauv (יחוח)Yahweh lub tuam tsev.  

3 Nws hais rau cov Levis uas ua tus qhia cov Ixayees sawvdaws thiab twb tu lawv tus kheej kom dawb huv rau (יחוח)Yahweh lawd tias, muab lub phij xab uas dawb huv cia rau hauv lub tuam tsev uas Daviv tus tub Xalaumoos uas yog cov Ixayees tus vajntxwv ua cia.  Nej tsis txhob muab kwv dua li lawm. Nimno cia li ua koom tu (יחוח)Yahweh uas yog nej Tus Tswv thiab ua koom tu nws cov tibneeg Ixayees.

4 Cia li npaj nej cov tibneeg nyias nyob nyias pab hauv nyias cum raws li Ixayees tus vajntxwv Daviv tau sau qhia cia thiab raws li nws tus tub Xalaumoos tau sau qhia cia lawd.  

5 Thiab sawv ntsug rau hauv lub chaw dawb huv ntawm cov pejxeem uas muab faib ua tej cum, thiab cia cov Levis ib feem pab dua ib pawg.

6 Thiab tua tus yaj ua kevcai Hla Dhau thiab tu nej tus kheej kom dawb huv thiab npaj txhua yam rau nej cov kwvtij xwv thiaj ua tau raws li tej lus uas (יחוח)Yahweh kom Mauxes hais.

7 Yauxiyah muab peb caug txhiab tus tsiaj uas yog yaj, menyuam yaj, menyuam tshis, thiab peb txhiab tus txiv nyuj pub rau cov pejxeem uas tuaj ua kevcai ntawd sawvdaws ua kevai Hla Dhau.  Tej no yeej yog vajntxwv li.

8 Thiab nws cov thawj kuj zoo siab pub rau cov pejxeem thiab rau cov pov thawj thiab cov Levis. Hikhiyah thiab Xekhaliyah thiab Yehi‑ees uas ua thawj saib xyuas (יחוח)Yahweh lub tuam tsev kuj muab ob txhiab rau pua tus menyuam yaj thiab menyuam tshis, thiab peb puas tus txiv nyuj pub rau cov pov thawj ua kevcai Hla Dhau.  

9 Khaunaniyah thiab nws ob tug kwvtij yog Semayah thiab Nethanees, thiab Hasanpiyah thiab Ye‑i‑ees thiab Yahxanpas, uas yog cov Levis cov thawj, kuj muab tsib txhiab tus menyuam yaj thiab menyuam tshis, thiab tsib puas tus txiv nyuj pub rau cov Levis ua kevcai Hla Dhau.

10 Thaum npaj txhua yam txhij lawm, cov pov thawj sawv ntsug rau ntawm lawv lub chaw, thiab cov Levis nyob ua tej pawg raws li vajntxwv tau hais cia lawd.

11 Ces lawv txawm tua tej menyuam yaj ua kevcai Hla Dhau, mas cov pov thawj coj cov ntshav ntawm lawv mus nchos, hos cov Levis laws tej tsiaj ntawd.

12 Lawv kuj muab tej uas yuav hlawv xyeem rho cia rau ib cag xwv thiaj tau faib rau cov pejxeem tej pawg uas muab faib raws li lawv cum rau lawv coj mus xyeem rau (יחוח)Yahweh, raws li muab sau cia rau hauv Mauxes phau kevcai. Lawv muab tej txiv nyuj ua ib yam nkaus li ntawd.

13 Lawv muab tej yaj uas ua kevcai Hla Dhau ci raws li kevcai. Lawv muab tej uas xyeem dawb huv hau rau hauv lauj kaub, hauv hwj thiab yias, thiab nqa nrawm nroos mus rau cov pejxeem sawv daws. 

14 Dhau ntawd lawv mam li npaj rau lawv tus kheej thiab rau cov pov thawj, rau qhov cov pov thawj uas yog Aloos caj ces tseem ua haujlwm ua kevcai hlawv huvsi xyeem thiab hlawv tej hlab hluas roj xyeem mus txog tsaus ntuj.  Cov Levis thiaj npaj rau lawv tus kheej thiab rau cov pov thawj uas yog Aloos caj ces li no.

15 Cov tub hu nkauj uas yog Axas caj ces kuj nyob rau ntawm lawv lub chaw raws li Daviv thiab Axas thiab Hemas thiab Yeduthus uas yog vajntxwv tus xibhwb uas hais pom tom hauv ntej tau hais cia lawd. Cov uas zov tej rooj loog, nyias zov nyias lub rooj loog, tsis txog lawv tso hauj lwm tseg, rau qhov lawv cov kwvtij Levis twb npaj rau lawv lawm.  

16 Lawv thiaj npaj txhua yam ua koom tu (יחוח)Yahweh rau hnub ntawd li no xwv thiaj ua tau kevcai Hla Dhau thiab xyeem tej uas hlawv huvsi xyeem rau saum (יחוח)Yahweh lub thaj raws li vajntxwv Yauxiyah hais.

17 Cov Ixayees uas nyob ntawd kuj ua kevcai Hla Dhau rau hnub ntawd thiab ua kevcai noj ncuav tsis xyaw keeb xya hnub.

18 Txij thaum Xamuyees uas yog xibhwb cev (יחוח)Yahweh lus nyob, tsis tau muaj ib zaug kevcai Hla Dhau rau hauv cov Ixayees zoo yam li no.  Ixayees tej vajntxwv tsis muaj ib tug twg uas coj kevcai Hla Dhau zoo yam li Yauxiyah thiab cov pov thawj thiab cov Levis thiab cov Yahdah thiab cov Ixayees uas tuaj ua ke sawv daws thiab cov uas nyob hauv Yeluxalees coj li zaum no.  

19 Lawv ua kevcai Hla Dhau no rau xyoo kaum yim uas Yauxiyah ua vajntxwv kav.

​

Yauxiyah Tuag

(2 Vajntxwv 23:28-30)

20 Los rau tom qab, thaum Yauxiyah kho tej kevcai uas siv hauv lub tuam tsev tiav lawd, Iziv tus vajntxwv Nekhaus mus ua rog rau ntawm lub moos Kakhemis ntawm tus dej Yufetis ces Yauxiyah txawm tawm mus ua rog rau nws.

21 Tiamsis Nekhaus txib tibneeg mus hais rau Yauxiyah tias, cov Yahdah tus vajntxwv, kuv thiab koj muaj teeb meem abtsi?  Hnub no kuv tsis tau tuaj ua rog rau koj, kuv tuaj ua rog rau cov uas nrog kuv ua rog xwb, thiab (יחוח)Yahweh tau hais kom kuv cia li maj nroos. Koj tsis txhob tawm tsam (יחוח)Yahweh uas nrog nraim kuv tsam ces nws ua rau koj puam tsuaj.

22 Txawm li ntawd los Yauxiyah kuj tsis thim ntawm Nekhaus mus, nws tseem hloov tsoos tsho ua cuav tsab mus tawm tsam Nekhaus. Nws tsis mloog Nekhaus tej lus uas tawm hauv (יחוח)Yahweh lub qhov ncauj los, nws cia li ua rog rau Nekhaus hauv lub tiaj Mekidaus.

23 Mas cov uas tua hneev thiaj tua raug vajntxwv Yauxiyah.  Vajntxwv thiaj hais rau nws cov tub teg tub taws tias, cia li coj kuv rov mus, rau qhov kuv raug mob sab heev lawm.

24 Nws cov tub teg tub taws txawm muab nws rho hauv nws lub tsheb ua rog los thiab muab nws lub tsheb uas ob thauj nws los rau hauv Yeluxalees.  Nws txawm tuag lawm mas lawv muab nws faus rau hauv nws tej poj koob yawm txwv tej qhov ntxa. Cov Yahdah thiab cov Yeluxalees sawvdaws quaj ntsuag txog Yauxiyah.

25 Yeremyah kuj hais tej lus quaj ntsuag txog Yauxiyah thiab.  Tej tub, tej ntxhais hu nkauj sawvdaws kuj hu txoj nkauj quaj ntsuag txog Yauxiyah los txog niaj hnub nimno. Lawv muab tej txoj no ua ib txoj kev cai rau cov Ixayees coj thiab muab sau cia rau hauv phau ntawv Quaj Ntsuag.

26 Lwm yam haujlwm uas Yauxiyah ua thiab tej haujlwm zoo uas nws ua raws li uas sau cia rau hauv (יחוח)Yahweh phau kevcai,

27 thiab nws tej haujlwm txij thaum pib mus txog thaum kawg twb muab sau cia rau hauv phau ntawv uas hais txog Ixayees thiab Yahdah tej vajntxwv lawm.