Lub Tawb Txiv Ntoo Ntuj Qhua

1 (יחוח)Yahweh  qhia tshwm rau kuv pom li no. Muaj ib lub tawb txiv ntoo ntuj qhua.

2 Nws hais rau kuv tias, Amosyah es, koj pom abtsi? Kuv teb tias, pom ib lub tawb txiv ntoo ntuj qhua. Mas (יחוח)Yahweh  hais rau kuv tias, hnub kawg los txog kuv haiv neeg Ixayees lawm. Kuv yuav tsis zam lawv dua li lawm.

3 (יחוח)Yahweh  hais tias, hnub ntawd lub suab nkauj hauv lub tuam tsev yuav ntxeev ua lub suab quaj nyiav. Yuav muaj cev tuag ntau kawg li, muab pov tseg thiab ntsiag to rau txhua qhov.

4 Nej cov uas tsuj yuam cov tibneeg txom nyem, thiab rhuav tshem cov pluag hauv lub tebchaws, cia li mloog tej lus no. 5 Nej hais tias, thaum twg li dhau lub hli xiab, peb thiaj tau muag peb tej qoob? Thaum twg li dhau hnub Sabbath, peb thiaj muab lub sekhees ua kom loj, thiab muab rab teev tsis haum txiaj los ntxo luag, 6 thiab muab nyiaj yuav tau tej tibneeg pluag, thiab muab ib nkawg khau ntuag yuav tau cov uas txom nyem, thiab muag tej npluag mog.

7 (יחוח)Yahweh  tuav Yakhauj lub meej mom cog lus twv hais tias, tej uas lawv ua kuv yeej yuav nco ntsoov txhua yam huvsi mus ib txhis.

8 Lub tebchaws yuav tsis ntseeg nkaws rau zaj no lov? Txhua tus uas nyob hauv lub tebchaws no yuav tsis quaj ntsuag lov? Lub tebhcaws yuav phwj tuaj yam li tus dej Nais, yuav ntas mus ntas los thiab rov nqeg ib yam li tus dej Nais hauv Iziv tebchaws.

9 (יחוח)Yahweh  hais tias, hnub ntawd kuv yuav ua rau lub hnub poob thaum tav su, thiab ua rau lub ntiajteb tsaus ntuj thaum nruab hnub nrig.

10 Kuv yuav muab qhov uas nej npaj noj npaj haus ntxeev ua kev quaj lwj siab ntsuav, thiab muab nej tej suab nkauj huvsi ntxeev ua lub suab quaj ntsuag. Kuv yuav muab khaub seev tsaj rau sawvdaws sia ntawm duav, thiab ua rau txhua lub taubhau do hau cuas. Kuv yuav ua kom quaj ntsuag ib yam li quaj ntsuag tib tug tub uas tuag lawd, thiab lub sijhawm kawg yuav zoo yam li hnub uas lwj siab kawg.

11 (יחוח)Yahweh  hais tias, saib nawj, lub caij lub nyoog tabtom los, mas kuv yuav tso kev tshaib kev nqhis los rau hauv lub tebchaws no, tiamsis tsis yog tshaib nqhis mov noj lossis dej haus, yog tshaib nqhis (יחוח)Yahweh  tej lus.

12 Lawv yuav mus mus los los sab hiav txwv no mus txog sab hiavtxwv tim ub, thiab sab ped mus txog sab hnub tuaj. Lawv yuav khiav mus khiav los nrhiav (יחוח)Yahweh  tej lus, tiamsis lawv nrhiav tsis tau.

13 Hnub ntawd tej hluas nkauj zoo nkauj thiab tej tub hluas yuav tsaus muag ntog vim yog nqhis dej.

14 Cov uas tuav dab Asimas hauv Xamalis lub npe twv thiab hais tias, Daj es, koj tus dab muaj txojsia nyob pom, thiab hais tias, tus dab ntawm Npe-awsenpas muaj txojsia nyob pom, lawv cov ntawd yuav ntog tag, yuav tsis sawv los dua li lawm.